2 Samuel 20 - Zanniat Bible

Sheba Raltho I

¹ Cialai ah Benjamin hin Bikari ai fapa Sheba tihnak mi pakhat um ai ani tu mihrokhrawl i. Cen Sheba tu thirhlung tum kongin, David hnenah covo nai lo ising, Jesse ai fapa zaikhai phathnem lo! Israel mite tlung tu sio ih,” tiin au dek do i.

² Ciamanin Israel mite in David tu zam tlang ai Bikri ai fapa Sheba hnenah feh tlang i. Ikhalselai Judah mite in David tu daih tlang thotho ai Jordan runpui in Jerusalem tian hlun i.

³ David tu Jerusalem a kumpibawi inn ah tlung ai a inn kilkhawltu tuhin a dahhnak a nuzawlte pahra lang ai palikte kilruai i. A kulhnak hmuahhmuah pe sio i. Ikhalselai anite hnenah it lo i. A thi nia tianin a dangniu in dah ai hmaitong bangin um tlang i.

⁴ Kumpibawi in Amasa ko ai, “Judah mite tu hmunkhat ah ko tu sio lai, tit fangin heta ah kawi tlang tu sio ih,” tiin ti i.

⁵ A tihnak bangin Amasa tu feh ai Judah mite heh ko i. Ikhalselai kumpibawi in a nitiamhnak nia ah Amasa tu tel lo i,

⁶ Ciamanin kumpibawi in Abishai ko ai, “Absalom tahin rin Sheba in harsahnak i pe tuh sawn i! Ciamanin ralkapte fehpui tulai Sheba hnawh tu ih, Cia lo fangin kulhhnak khuapui hrekkhat lang ngah pang tuhai kin kut songin luat ngah pang tuh i,” tiin ti i.

⁷ Ciamanin Joab ai minungte, Kereth mi, Peleth mi le ralkap dangte khai Abishai heh hlun tlang i. Sheba hnawh tuhin Jerusalem an suak tlang i.

⁸ Cen Gibeon ai umhnak lungto lianpui hleng fangin Amasa thawn tawk dun i. Joab tu a ralthuam sil ai a ralvang tu a cawng songah thun ai a elpen ah khaih i. Hmai lamah suak ai ciafangin a ralvang tlok lio i.

⁹ Cen Joab in Amasa hnenah, “I rual na cak awm?” ti ai a thut tum bangin a kiahhan lam kut in Amasa ai khahmul in pom i.

¹⁰ Joab in ralvang a awh khiah ling lo ai Amasa tu ralring lo i. Ciamanin Joab in Amasa heh a pum ah dawt ai a song rilte tu laipua lakah suak sio i. Dawt sal rin kul loin vaikhat pahin thi i. Cen Joab le a nau Abishai in Sheba hnawh kawm i.

¹¹ Amasa luang hiangah Joab ai ralkap pakhat ding ai, “David le Joab a ṭantu hmuahhmuah in Joab hlun tu ih,” tiin au i.

¹² Lampui laiteng ah Amasa ai luang tu thisan thawn um i. Ciami a hmutu hmuahhmuah in com de manin Joab ai ralkap pa in mithi luang heh lampui in hampalak ah duk ai pon pakhat in khuk i.

¹³ Ciatihin lampui in a luang a duk hnuaah Sheba hnawh tuhin amahte veksen in Joab heh hlun tlang i.

¹⁴ Israel miphun umhnak ram hmuahhmuah ah Sheba tu feh zianzo ai Abel Beth Maacah tihnak khuapui ah hleng i. Bikari miphunte kokhawm dun tlang ai ciami khuapui ah hlun i.

¹⁵ Cen Joab ai ralkapte khai hleng tlang ai ciami khuapui heh kulh i. A khuapui kulhhnak vingpui heh tlu tuseh tiin Joab ai ralkapte in a hnia ai laipua co dekdo i. Cen vingpui kanthilhnak tuhin a pua in laipua silh tlang i.

¹⁶ Ciami khuapui songah nupang fim pakhat um ai khua songai vingpui vuman, “Ngai tu ih, ngai tu ih! Joab tu heta ah kawiruai tu ih; a hnenah thu rel i nuam i,” tiin au i.

¹⁷ Joab tu feh ai, “Joab isim?” tiin zawt i. “Ing,” tiin Joab in ti i. “Bawipa, ngai rih tu,” tiin ani in ti i. “Ngai ing khaw.” tiin Joab in ti i.

¹⁸ Ciafangin nupang nu in, Hlanlaipui in, “Abel ah feh tu ilai thucat tuh i,” tiin ti de ai a tihnak bangin cat ngaingai de i.

¹⁹ Kin khua heh remdunhnak khua le a cuang ai sikhnak khuapui i ai, Israel ram songah mi kilkhawltu nu bang i. Zaimanin ciabang khua heh siatsuah tum isi? Pathian ai heh siatsuah tuh menma isim? tiin ti i.

²⁰ Ciafangin Joab in, “I lo i. Ning khuapui tu siatsuah tuh hrimhrim lo i ing.

²¹ Kin tumhnak khai ilo i. Epharaim tlang vum rammi Bikari ai fapa Sheba tihnak pa in kumpibawi David a tawng manin i. Ciami pa pakhat heh kin pe tu ilai hemi khua an let tuh i ing,” tiin ti i. Cen nupang nu in, “Ciami pa ai lu heh vingkulh vuman na hnenah lon tuh ing,” tiin ti i.

²² Feh ai a ruathnak hmuahhmuah heh khuasong mite hnenah rel i. Sheba ai lu tu tan tlang ngaingai ai Joab hnenah vingkulh vuman lon i. Joab in thirhlung tum ai, a ralkapte thawn ciami khuapui heh hlum ai amahte khua ah tlung tlang i. Joab tu kumpibawi hnen Jerusalem ah tlung i.

David Ai Tlangsuakte

²³ Joab tu Israel ralkapte hotu i. Jehoiada ai fapa Benaiah tu kumpibawi David ai inn kilkhawltu Kereth mi le Peleth mite hotu i.

²⁴ Adoniram tu lovai mite hmuahhmuah hotu i; cen Ahilud ai fapa Jehoshaphat tu laingantu i.

²⁵ Sheva tu zung cazipui i. Suangbawite tu Zadok le Abiathar i ai,

²⁶ Jair khuami Ira khai David ai suangbawi pakhat i ve i.