2 Samuel 2 - Zanniat Bible

David Tu Judah Kumpibawi Cang I

¹ Cia hnuaah David in, “Judah ramai khua pakhatkhat ah feh ngang maw?” tiin Bawipa zawt i, “Feh tu,” tiin Bawipa in ti i. Cen David in, “Akon khua ber ah feh tuh ing,” tiin zawt lala i. Ciafangin Bawipa in, “Hebron ah feh tu,” tiin ti i.

² Ciamanin David tu a nupuite pahnih, Jezreel khuami Ahinoam le Nabal ai thihsanhnak Karmel khuami Abigail kawm in Hebron ah feh i.

³ A minung ralkapte le a innsangte khai fehpui ai Hebron khua ah um i.

⁴ Cen Judah mite Hebron khua ah kawi tlang ai Judah kumpibawi tuhin David heh thau pawh i. Gilead ramai Jabesh khua mite in Saul khiah phum i ti khiah David in a ling fangin,

⁵ mi hlat ai, “Ning bawipa Saul vumah upathnak nai ai phatak niu in ning phum manin Pathian in hmuifu ning pe tuseh.

⁶ Bawipa tu ning vumah ninghio thinpemhnak a naimi le rinsantlak tuh ṭio Pathian i tu hram seh. Hetih bangin ning bawn manin kaimah inkhai phatak ngai in ning sik tuh ve ing.

⁷ Hat tu ilai ralpha tu ih. Ning kumpibawi Saul tu thi ai tun tu kaimah heh Judah mite in amahte kumpibawi tuhin thau i pawh zo ihang,” tiin thucah i.

Ishbosheth Tu Israel Kumpibawi Cang I

⁸ Ner ai fapa Abner, Saul ralkap hotu heh, Saul ai fapa Ishbosheth thawn tlan kawm ai Jordan runpui ralkhat Mahanaim ah hleng kawm i.

⁹ Ciata ah Abner in Ishbosheth heh kumpibawi ah cangruai ai Gilead, Asher, Jezreel, Epharaim le Benjamin ramte le Israel ram pumpuhluk uk i.

¹⁰ Kumpibawi a cang fangin a kum sawmli i ai kum hnih song uk i. Ikhalselai Judah miphun incen David ṭan tlang ai,

¹¹ David in Judah mite heh Hebron khua an kum sarih le a hrek song uk i.

Israel Le Judah Raltho I

¹² Abner le Ishbosheth ai ralkapte tu Mahanaim in suak ai Gibeon khuapui ah feh tlang i.

¹³ Joab (a nu tu Zeruiah i), le David ai ralkapte tu Hebron in suak ai Gibeon ah feh tlang ve i. Gibeon khua ai tili kamah tawk dun i. Abner le a ralkapte tu tili kam khat lamah ṭanghmun khuar tlang ai Joab le a ralkapte tu khat lam kamah ṭanghmun khuar tlang ve i.

¹⁴ Cen Abner in, “Kin tlangvalte hrekkhat suak tlang veve in pakhat le pakhat tawng dun selai pha tuh i,” tiin Joab heh ti i. Cen Joab in, “Pha i!” ti i.

¹⁵ Ciamanin Ishbosheth le Benjamin phun aiawh ah minungte hlaihnih suak ai David ai minungte aiawh ah hlaihnih suak tlang ve i.

¹⁶ A tawng dun fangin mah ai hmaicang ral khiah a lu in awh ai a thinhnai ah vang in dawt dun ai hmunkhat ah amahte veksen in tlu ai thi sio i. Ciamanin Gibeon khua hiang ciami hmun heh Helkath Hazzurim, “Ralvang Hmun,” tiin ko tata i.

¹⁷ Ciafangin raltawnghnak a roh ngai in um ai Abner le Israel mite tu David ralkapte in neh i.

¹⁸ Zeruiah ai fapate unau thum Joab, Abishai le Asahel khai tel ve i. Cen kiho tluk ai dawpcakmi Asahel in,

¹⁹ Abner heh hnawh ai khuadang her loin hnawh ngiarngo i.

²⁰ Ciafangin Abner in a hnua lam a her fangin, “Asahel isim,” tiin ti i. “I, Asahel ing,” tiin sawn i.

²¹ Abner in, “I hnawh nawn mahang. Ralkap pakhatkhat hnawh tu sawn lai a awhhnak sut tu sawn,” ti i. Ikhalselai Asahel in hnawh thotho i.

²² Cen Abner in, “I hnawh mahang! Na rek tuh ngaingai ingkhaw. Na rek lengkhaw akontih in na u Joab ai mithmai sik ngam tuh ing?” tiin ti i.

²³ Ikhalselai Asahel in a hnawh awl cuang lo i. Ciamanin Abner in a faipui khiah hnuakhawh in khawh ai Asahel heh a thinhnai ah hlehpet in khawh ngah i. Asahel khiah sawn ai thi i. Cen Asahel luang umhnak a hleng fangin aisusu khai com sio ai ciata ah ding tlang i.

²⁴ Ikhalselai Joab le Abishai in Abner heh hnawh kawm ai nitla cuahco fangin Giah in nisuah lam, Gibeon ram lak fehhnak lampui ai umhnak Ammah tlang ah hleng i.

²⁵ Benjamin mite tu Abner hnenah taikhawm leh ai tlang vumah ṭan hmun khuar tlang i.

²⁶ Cen Abner in Joab heh auh ai, “Hetihin maw a zomzet in tawng dun tuh ising? A hnuataber ah hua cianghlimdunhnak amam lek suak tuh i, ti khiah ling lo isim? Kinmah khai ning phunpui rori i ing! Na minungte in kaimah i hnawh heh dawn loin maw um tuh menma isi?” tiin ti i.

²⁷ Ciafangin Joab in, “Ciatihin pong hlah silai, a nungmi Pathian hming sal in na rel ing: i ralkapte in thangha tianin na hnawh tuhlai napui i,” tiin ti i.

²⁸ Cen Joab in thirhlung tum ai a ralkapte in Israel mite heh hnawh nawn lo ihang. Ciamanin raltawngdunhnak com tlang i.

²⁹ Abner le a ralkapte tu Jordan varkam phairawn ah zanvar in feh tlang ai, Jordan runpui a tan hnuaah a thangha sun hlan tian feh ai Mahanaim ah hleng i.

³⁰ Abner a hnawh nawn lo hnuaah Joab in a ralkapte heh khawm ai Asahel tel loin hlaikua thi i.

³¹ David ai ralkapte in a rekhnak Benjamin mi, Abner ralkapte tu za thum le sawmruk i.

³² Joab le a ralkapte in Asahel luang heh zawng tlang ai Bethlehem khua, amahte innsang hlanmual ah phum i. Cen zanvar feh ai a thangha zingniu in Hebron ah hleng tlang i.