2 Samuel 10 - Zanniat Bible

David In Ammon Le Syria Neh I

¹ Can a rai deuh fangin Ammon kumpibawi Nahash tu thi ai a fapa Hanun heh kumpibawi cang i.

² Ciafangin David in, “A pa Nahash in i vumah upathnak le ninghiohnak a bawn zo bangin Hanun vumah hmuh tuh ve ing,” tiin ti ai a lungsia hnemtu tuhin mi hlat i.

³ Ikhalselai a hlathnak mite a hleng fangin Ammon mi hoitute in amahte kumpibawi Hanun hnenah, “Na lungsia hnemtu tuhin tiin David in hetihin mi hlat heh na pa upat manin i, tiin um aw sim?” I hrimhrim lo i! Kin neh nuam manin kin khuapui sikhliah nuam manin micultu heta ah hlat i,” tiin thusia forh tlang i.

⁴ Ciamanin David ai a hlathnak palaite tu Hanun in pom sio ai amahte khahmul a nakkhat lam ṭen a met sah hnuaah amahte korfualpui heh a el in tan sah ai hlat leh i.

⁵ Ciami thu David in a za fangin a palaite tawk tuhin mi hlat i. Zaimantifangin zakthi tlang ze manin a hnenah kawi ngam lo i. Jericho khua ah um tlang tuhin le amahte khahmul a sau leh fangin tlung tuhin thucah i.

⁶ Ciatihin David amahte ral ai a cangruai khiah Ammon mite in ling fiang fangin, Bethrehob le Zobah in Syria ralkapte thawng kul zawng i; Tob ralkapte thawng hlaihnih, le Maacah ram kumpibawi khai a ralkapte thawng khat thawn, zawng i.

⁷ Ciami thu David in a za fangin Joab heh a ralkap pha ber pawl thawn hlat i.

⁸ Ammon mite tu suak tlang huho ai Rabbah khuapui luthnak in ṭanghmun khuar tlang i. Syria ralkapte, Tob ralkapte le Maacah ralkapte khai nuamhmuncang in Israel mite heh bawh tlang i.

⁹ Joab in ralte in hmai lam le hnua lamin kin tawng tuh i, ti a ling fangin Israel ralkap lakah a pha ber pawl ril ai hmai lamai Syria ralkapte tawngtu tuhin dah i.

¹⁰ A ralkap dangte tu a naupa Abishai in hohahnak ah dah ai Abishai heh Ammon mite tawng tuhin ṭanghmun khuarruai i.

¹¹ Joab in a nau Abishai hnenah, “Syria ralkapte in kin nor deuh lekhaw kin bawm tu. Cen Ammon ralkapte in ning nor deuh lekhaw na bawm tuh i ing.

¹² Zaikhai lau malaw! Kin minungte le kin Pathian ai khuapuite caah a roh ngai in ṭang tuh ising. A pha ber heh Bawipa in bawn tuseh,” tiin ti i.

¹³ Ciafangin Joab le a ralkapte in tawng dekdo ai Syria ralkapte tu tlan tlang berh i.

¹⁴ Cen Ammon mite in Syria ralkapte tlan berh khiah a hmu fangin Abishai mithmuh ah tlan ve ai a khuapui songah let tlang berh i. Ammon mite a tawnghnak hmun an Joab heh let ai Jerusalem ah hleng leh i.

¹⁵ Israel mite in kin neh i, ti khiah Syria mite in a ling fangin a ralkapte hmuahhmuah khawm tlang lala i.

¹⁶ Euphrates Runpui in nisuah lamai a ummi Syria mite khai Hadadezer kumpibawi in ko sio ai Helam tihnak ah kawi ai Zobah kumpibawi Hadadezer ai ralkapte uktu ralbawi Shobach in ho ai um tlang i.

¹⁷ Ciami thu heh David in a za fangin Israel ralkapte kokhawm ai Jordan Runpui a tan hnuaah Halem lampui ah feh tlang i. Syria ralkapte tu Halem ah David tawng tuhin a roh ngai in ṭanghmun khuar tlang i. Tawng dun tlang dekdo ai,

¹⁸ Syria ralkapte tu Israel mite in hnawt sek i. David le a ralkapte in Syria siphuhleng khaltute za sarih le siphuh vumto ralkapte thawng sawmli rek berh ai, Syria ralbawipa Shobach khai maliam ai ciami hmunah thi i.

¹⁹ Kumpibawi Hadadezer kuthnia ai a ummi kumpibawi a dangte khai Israel mite in neh i, ti khiah a hmu fangin, Israel thawn remhnak bawn ai a kuthnia ah cang ta ihang. Cia hnuaah tu Syria mite in Ammon mite heh bawm ngam nawn lo ihang.