2 Korin 7 - Zanniat Bible

¹ I ithnak u le nau, he thukhamhnak hmuahhmuah heh kinmah hnenah khamhnakte i. Ciamanin kin taksa pum ituseh, kin rauhla ituseh a ningrimruaitu hmuahhmuah heh lon in thianghlim niu in um ngasing; Pathian upat kihzahhnak thawn nung ngasing.

Paul Ai Anghnak

² Kin caah ning thinlung lawngruai tu ih. Aisu khai zawl lo i ing, aisu khai siatsuah lo i ing, aisu khai zohsuam in nautat lo i ing.

³ Hemi heh kaimah in ning hnawl manin i tihnak i lo i; zaimantifangin a hlanai i pong zo bangin ningmah heh ning daih manin nung khai nung tlang tuh, thi inkhai thi tlang tuh ising.

⁴ I uar ngai mi i si. I mithmai i pharuaitu khai ningmah i si. Harsa vansanghnak i tawk inkhai umlamhnak nai thotho ing. I anghnak tu let tliatlo i!

⁵ Macedonia kin hleng hnuaah khai dap niu in cawlum can nai lo ing. Khuahacang ah hnaihnokhnak um i: midang thawn tawngdunhnak a pualam ah um ai kin thinlung songah thinlauhnak um fawn i.

⁶ Ikhalselai thinnau mite thinkhohnak a petu Pathian in Titus hlenghnak thawmin kin thinlung khoruai i.

⁷ Titus hleng manin thin kin nuam lek zolo in amah thazang ning pehnak kin za fangin tha kin tho tlang ngai i. Zaitluk in kaimah hmu tuh ning hiamdan, ning sirdundan le kaimah lakai ning ṭangdan khiah i rel i; ciamanin tun hlan tahin i ang ze i.

⁸ Zaimantifangin khiatih ai lai i kuathnak manin lung ning sia inkhai i sir lo i. Can tlawmniu song rin ikhalselai, khiatih ai lai i kuathnak in lung ning siaruai i, ti i hmu fangin kai khai thin i nuam ve lo i.

⁹ Ikhalselai tun tu i ang ngai ihang; lung ning sia manin i ang ilo in ning lungsiahnak in ning nun thleng manin i. Khiatih in lung ning siahnak khiah Pathian in hmang ai kin thil bawnhnak manin zaikhai siat ning suah lo i.

¹⁰ Pathian in lungsiahnak tu thinlung thlenghnak ah hmang ai nunohnak suakruai i. Ciamanin ciami lungsiahnak manin sir tuhhnak zaikhai um lo i. Ikhalselai minung lungsiahnak menma lekhaw thihhnak suakruai i.

¹¹ Pathian in ning lungsiahnak a hmangdan heh sik tu ih: zaitlukin thasuahhnak ah ning bawn i; ning mawh lohnak larruai tuhin ning laudan heh! Thil sual bawnhnak ning hmu fangin thin ning tok i, thin ning lau i, thin ning raw i, pum pe ai thil bawn sualhnak cawh tuhin ring cialep i si. Hemi thu hmuahhmuah ah mawhhnak nai lo i si ti khiah larruai i si.

¹² Ciamanin khiatih ai lai i nganhnak heh thil sual bawntu a um manin le thil sual bawnhnak a tuartu a um manin i hang lo i. Thungai in ti fangin kin caah ning pumpehnak heh zaitluk i, tiin Pathian mithmuh ah lar tuhin i nganhnak i.

¹³ Ciamanin thin kin nuam ai tha kin tho i. Tha kin tho i ti lek ilo i. Ning veksen in Titus bawm tlang ai a thin nuamruaihnak thu Titus in kin rel fangin kin anghnak rel cawk lo i ing.

¹⁴ Titus hnenah ningmah manin porh dun hnelhno ing. Ning inkhai tha i siaruai lo i si. Ning hnenah thudik rel ṭiode ing; ciatih bangin Titus hnenai porhdunhnak khai thudik ah cang i.

¹⁵ Cen Titus ai relhnak ning veksen in ning bawn nuamdan le upathnak le kihzahhnak thawn ning hmuakdante a ruat leh zianzo fangin amah in ning ithnak heh nisiar in khang amam i.

¹⁶ I thinlung veksen in ning rinsan thil heh i ang ngai i!