2 Korin 6 - Zanniat Bible

¹ Pathian thawn naper tlang kin imanin Amah ai ninghiohnak ning cohnak heh a lovang cangruai tuh hram loin ning ngen ing.

² Pathian ai relhnak heh ngai tu ih: “Ning hnenah i mithmai pha i larruaihnak can ahcen ning aw ning ngai ing; ningmah i nunohnak nia a hleng fangin ning bawm ing,” ti i. Ngai tu ih! Pathian mithmai pha ngah can heh tun can i; nunohnak co nia tu tun nia i.

³ Kin naperhnak heh aisu inkhai sawi tuh kin daih lo manin aisu ai lampui ah lungsui bahsaulhnak dah lo i ing.

⁴ Hnaihnokhnak, zinfehnak le harsahnak a phunphun tuar tlang ai ciatihin thinsau ngai in Pathian naruaihtu kin ihnak larruai i ing.

⁵ Vithnak, thawngtohhnak le misenpui ai hnawmcanhnak khai tawk tlang i ing. Kin taksa ai tuar ben nawn lo tianin naper tlang i ing; mitmu lo le rong loin um i ing.

⁶ Kin ziaza cianghlimhnak, lingthiamhnak, thinsauhnak, le ninghiohnak kin naihnak in ituseh, Rauhla Thianghlim le ithnak taktak in ituseh,

⁷ thutak kin phuanghnak le Pathian huham larhnak in ituseh, Pathian ai napertu kin ihnak larruai i ing. Dikcanghnak tu kin ralthuam i ai kinmah hupdunhnak in ituseh, kin hmainorhnak ah ituseh hmang i ing;

⁸ upathnak tawk tlang ai mualphohnak khai tuar tlang i ing; zohsuamhnak kin tuar can khai um ai thangphathnak kin ngah can khai um i. thudonrel kin hluk na pui ai thuhman rel i ing.

⁹ Aisu inkhai ling lo mi ah kin ruat i, ikhalselai mi zongzong ai ling mi i sawn ising. Mithi bangin kin ruat i, ikhalselai ning hmuhnak bangin kin nung hlen i. Reemhnak tuar napui kin rek lo i.

¹⁰ Lung kin siaruai de napui kin ang tlang ngio pah i. Fa kin rah ngai napui mi tampui milian cangruai i ing. Zaikhai nai lo napui ingkhaw zaizongza naitu i ing.

¹¹ Corinth khua ai rualpui pha pawl, ning hnenah cangkheng in pong ing; kin thinlung tluang ngai in dah i ing.

¹² Kin thinlung dawngkham ning kham lo i ing; ningmah sawn in kin kham i si.

¹³ I songsuak fate bangin ning rel ing. Ning vumai thinlung tluang kin naihnak ning inkhai nai tu ve ih. Ning thinlung kau ngai in hong tu ih!

Sanglotute Ai Zawlhnak Ralring Tu Ih

¹⁴ A sang lotute thawn kom dun mah ih. A cang thil lo i. Akontih in dikhnak le hnawmhnak tu kom dun thil tuh i? Akontih in tleuhnak le thimhnak tu um kawm thil tuh i?

¹⁵ Akontih in Khrih le khuasia tu amahte thinlung bang dun thil tuh i? A sangtu le sang lotu heh zaital pom kawm thilhnak um aw im?

¹⁶ Akontih in Pathian ai biakinn le khuasiate ai milimte tu rem dun thil tuh i? Zaimantifangin kin tu a nungmi Pathian ai biakinn ising. Pathian amah rori in: “I minung lakah i umhnak inn sa tuhai amahte hnenah um tuh ing. A Pathian i tuhai anite tu i minung i tuh i,” ti i.

¹⁷ Cen Bawipa in: “Anite hlum tu ilai khek tu ih. A cianghlimlomi khiah a dai in dai mah ih; Ciatihin ning cosang tuh ing.

¹⁸ Kai tu ning Pa ing ai, Ningte tu i fanu le i fapate i tuh i si, tiin Cungnungber Bawipa in ti i,” tiin ti i.