2 Korin 3 - Zanniat Bible

Thukham Thar A Napertute

¹ Hetihin kin ti fangin mah veve porh dun kin bang leh ni maw? Mihrekkhat bangin ning hnenah ituseh, ihlahle ning hnenin ituseh, lungkhimpuihnak lai ken kin kul ve ini im?

² Lai ken dang kin kul lo i, ningmah heh kin lai i si; mi zongzong ling tuhin le siar tuhin kin thinlung ai nganhnak lai i si.

³ Hemi lai a ngantu Khrih amah i ai kinte tu a phurtu i ing. Ciami lai heh laiti ai nganhnak ilo i, a nungmi Pathian ai Rauhla in nganhnak i; lungtlep vumah nganhnak ilo i, minung thinlung songai nganhnak i.

⁴ Hetih ai kin phuanghnak tu Khrih thawmin Pathian lamah ralphahnak nai manin i ing.

⁵ Hemi naper heh a per bentu i ing tiin phuang ngamhnak kinmah taksa vumah zaikhai um lo i. Kin per benhnak hmuahhmuah heh Pathian hnenin hlenghnak i.

⁶ Thukham thar a ruaihtu kin cangthilhnak heh Amah in thazang kin pe manin i. Cia thukham thar songah lai in nganhnak Thukham um lo i; Rauhla sawn um i. Thukham in thihhnak hlengruai i, ikhalselai Rauhla in nunhnak pe i.

⁷ Thukham tu cafang pakhat hnua pakhat lungtlep vumah nganhnak i ai ciami thukham pe awng laiah Pathian ai songlawihnak lar i. Moses mithmai vumah tleuhnak heh rang ngai in ziam leh napui a tleuhnak a tleu ze manin Israel mite in a mithmai heh hmaiton in sik ngam tlang lo i. Thihhnak a hlengpuitu thukham rin ciabangtluk songlawihnak thawn hleng lekhaw,

⁸ Rauhla naperhnak tu zaitluk songlawi amam in hleng tuh i?

⁹ Minung mawhphurh thukhanhnak thu ah rin ciatluk songlawihnak um lekhaw, minung nunohnak a hlengpuitu thu ah zaitlukin songlawihnak lian tuh sawn amam ini?

¹⁰ Hlanlaipui ai a tleu awng ze ve songlawihnak tu tunai a tleu amam songlawihnak manin a tleuhnak ziam zo i ti tuh ihang.

¹¹ Can comniu song a tleu khiah a songlawi ze ti lesingkhaw kumzangza a tleuhnak tu zaitlukin songlawi tuh amam ini?

¹² Hetluk in umlamhnak kin nai manin ral kin pha tlang ngai i.

¹³ Kin tu Moses bang ilo i ing. Moses in a mithmai tleu a ziam zianzo heh Israel mite in hmu thil maseh tiin a hmai khiah pon in khuk i.

¹⁴ Akontih ita inkhai amahte thinlung dawngkham heh pit thotho i. Tunnia tianin thukham hlun laibu siar cang fangin amahte thinlung heh pon in khuk tlang lai i. Minung tu Khrih thawn pehzom fang ian in cia pon heh hawk lai i.

¹⁵ Tunnia tianin Moses Thukham siar tlang fangin amahte thinlung heh pon in khuk thotho lai i.

¹⁶ Ikhalselai cia pon heh lon thil teu i; Lai Thianghlim in, “Moses tu Bawipa lamah a hoi fangin a pon hawk i,” tiin ti i.

¹⁷ Heta ai, “Bawipa,” a tihnak tu Rauhla a ti nuamhnak i. Cen Bawipa ai Rauhla umhnak cangcang ah zalenhnak um i.

¹⁸ Kin tu kin veksen in kin hmai pon in huphnak i nawn lo manin Bawipa ai songlawihnak heh hlalang bangin a larruaitu i ing. Ciami songlawihnak tu Rauhla tihnak Bawipa hnenin kawi manin kin nunhnak tu songlawi amam in le Amah bang amam in kin thleng zianzo i.