2 Korin 2 - Zanniat Bible

¹ Ciamanin ningmah lungsiaruai leh tuh tahin ning tlawng loin um tuh sawn ing tiin ruatcat zo ing.

² Zaimantifangin lung ning siaruai lengkhaw i anghnak bawntu aisu tang tuh nawn i? Ningmah lek heh i anghnak a bawn thaitute i si.

³ Ciamanin i lai kuathnak songah lung i awiruaitu ningmah in lung i siaruai leh tuh tahin kawi tuh lo sawn ing, tiin i nganhnak i. Zaimantifangin kaimah lung i awi fangin ningmah khai lung ning awi tlang ve i, ti sang ing.

⁴ Ning hnenah lai ngan fangin thinlung rit le multing in i mithli thawn ngan ing. Khiatih ai i ngan fangin ningmah lungsiaruai tuhin ilo i; ning vumah zaitlukin ithnak nai ing ti khiah ning linghnak tuh sawn in i.

Misual Ngaithiamhnak

⁵ Mi pakhat in midang vumah lungsiahnak hlengruai fangin kaimah vumah hlengruai i tihnak ilo i, a cateng tu ning hnenah hlengruai i. (Hetihin nem deuh in i relhnak tu i ponghnak heh a vumah kho ze i daih hang lo manin i).

⁶ Hebang ai lungsiahnak a hlengruaitu vumah mi tamsawn ai cawhhnak tu a cateng in tuar zo i.

⁷ Tunai panin ngaithiam tu ilai thazang pe tuhang ih; a lungsia ze lawmlam fangin a thinpit vansang tata pang tuh i.

⁸ Ning ithnak khiah a vumah larruai tu ih tiin ning ngen ing.

⁹ Ning hnenah khiami laikuat i nganhnak tu i thu heh hlun ngaingai ni maw, zaibang minungte ini ti ling nuam in ning cu ing.

¹⁰ Mi pakhatkhat thil a tisualtu ning ngaithiam fangin kai inkhai ngaithiam ve ing. Zaimantifangin mi i ngaithiam fangin (I ngaithiam kulhnak um ngaingai lekhaw) ningmah manin Khrih hmaiah ngaithiam ing.

¹¹ Ciatih ai i ngaithiamhnak tu Satan in kaimah heh i neh pang maseh ti i daih manin i. Satan ai tumtekhnak le ling sio fawn i ing.

Troas Khua Ah Paul Thinharhnak

¹² Khrih Thuthangpha phuang tuhin Troas khua i hleng fangin Bawipa in ciata ah a naper tuhin dawng i hon i ti hmu ing.

¹³ Ikhalselai i unau Titus ciata ah i hmu lo fangin thin i har ze i. Ciamanin anite tu hnuksat in Macedonia lamah feh ing.

Khrih Thawmin Nehhnak

¹⁴ Pathian hnenah thangphathnak um tuseh! Zaimantifangin Khrih thawn kin pehzomhnak thawmin Khrih ai nehhnak puai songah a fehtu ah Pathian in kin hoi zianzo i. Khrih thula tu khuahacang ah rimhmui bangin zairuai tuhin Pathian in kinmah kin hmang i.

¹⁵ Zaimantifangin kin tu Khrih in Pathian hnenai pehnak yihmui rimur bang i ing. Cia yihmui tu nunohnak lampui ai a feh hnelhno lai mite hnenah le pairalhnak lampui ai a vak hnelhno lai mite hnen ahkhai hleng sio i.

¹⁶ A pairal cuahco mite hnenah he rimhmui heh thihhnak rimsia i ai, nunohnak a ngah betbo lai mite ca ahcen nunhnak petu rimur i. Ciabang naper khung heh aisu in persuak thil tuh ini?

¹⁷ Kin tu Pathian thu heh man bai niu in a zuartute menma ilo i ing. Pathian ai hlathnak kin imanin Khrih naruaihtu i ing ti ling in a mithmuh ah thinlung takin a thu phuang i ing.