2 Korin 13 - Zanniat Bible

Ralring Pehnak Le Vaihlahnak

¹ Tun thawn heh ning tlawng a vel thumhnak i tuh i. Lai Thianghlim in, “Sualpuhhnak a um fangin lingpuitu pahnih maw, pathum maw in dingpui fang ian in dik i ti tuhhnak i,” tiin ti i.

² Kin hnua ai sualhnak a bawntute hnenah ituseh, midangte hnenah ituseh, he thu heh rel i nuam i. Kin hnua a vel hnihhnak ning tlawng fangin ning rel zo ing; ikhalselai lamhla ai i um can ahkhai rel leh tuh thio ing; ning hnen i hleng lehsal fangin aisu khai ning zah tuh lo ing.

³ Ciatihin Paul ai ponghnak heh Khrih ai ponkam ngaingai i awm? tiin ning tihnak de khiah hmu tuh sio i si. Khrih in ning vumai na a per fangin ṭawnṭai lo nakhaw; ningmah lakah a hathnak larruai i.

⁴ Zaimantifangin ṭawnṭai ngai in thinglamteh vumah rek tlang napui tun tu Pathian ai hathnak in nung i. Amah thawn kin pehzom dun fangin kin ṭawnṭai ve napui ningmah thawn kin pawlkomhnak ahcen a nunhnak songah Pathian ai hathnak hlawm tlang tuh ve ising.

⁵ Sanghnak songah um maw um lo ti lingfianghnak ah ningmah veve chek dun tu ih. Jesuh Khrih kin songah um taktak i ti thil aw i sim? Um taktak hlah lekhaw ning chek dun fangin mi hlawhtling lo i si.

⁶ Ikhalselai kinte tu hlawhtling i ing ti khiah ling tuh ning um ing.

⁷ Kin naperhnak ah hlawhtling i ing ti larruaihnak ilo in, kin heh a tlasam mi kin bang ita inkhai ning in tu a dik lomi bawn loin a dikmi sawn ning bawn tuhhnak in Pathian hnenah sawngen i ing.

⁸ Zaimantifangin thutak heh engsan thil tuh lo ising; a ṭanpui lek ṭanpui thai ising.

⁹ Kin tu kin ṭawnṭai napui ning tu ning hat manin lung kin awi i. Ciamanin mi semkhim ning cang tuhin kin inkhai sawngen tlang i ing.

¹⁰ Ciamanin lamhla inkhai ning hnenah he lai i nganhnak i; zaimantifangin Bawipa in thunaihnak i pehnak heh ningmah hnawmcanhnak tuhin ilo in tungdinghnak tuhin i ai ning hnen i hleng fangin kho ze in ning vumah i hmang kul tuh lohnak i tumhnak i.

¹¹ Tun tu u le naute, cak niu in um tu ih. Semkhim tuhin zuam tu ih. I ngenhnak khiah ngai tu ih; pakhat le pakhat thinlung rual niu in um tu ih; rem niu le dap niu in um tu ih. Cen ithnak Pathian le daphnak Pathian tu ningmah thawn um tuh i.

¹² Pakhat le pakhat a thianghlim thutdunhnak thawn hnuksatdun tu ih. Pathian ai mithiangte hmuahhmuah in hnuksathnak ning kuat ing.

¹³ Bawipa Jesuh Khrih ai ninghiohnak, Pathian ai ithnak le Rauhla Thianghlim ai pawlkomhnak tu ning veksen vumah um tu hram selaw.