2 Korin 12 - Zanniat Bible

Paul In Thular Hmuhnak

¹ Zaikhai hnempuihnak a um ta lo inkhai porh dun kul ing. Ikhalselai tun tu Bawipa ai i pehnak thular le thuphuan thute rel tuh ing.

² Kin hnua kum hlaili laiah i linghnak awng Khristian pakhat heh van thuah thumhnak ah hon dang teu in um i. (A ruangpum rori in maw, ilo ti ling lo ing; Pathian ian in ling i).

^3-4 Not leh tuh ing; hemi pa tu Paradis ah hon dang teu i, ti ling ing. (I ti zohnak bangin a taksa in cang ngaingai maw, larhnak a hmuhnak ini maw, ti ling lo ing; Pathian ian in ling i). Ciata ah ciami pa in minung in rel le phuang thil lohnak le rel siang lohnak thu za i.

⁵ Ciamanin he pa ai thu ah porh dun tuh ing; i ṭawnṭaihnak larruaitu thil ti lo ah kaimah ai thu ahcen porh dun tuh lo ing.

⁶ Porh dun ngaingai ita inkhai mivoi i tuh hang lo ing, zaimantifangin thudik rel tuh manin i. Ikhalselai porh dun tuh lo ing. Zaimantifangin i bawnhnak a hmutu le i ponghnak a zatu in i ihnak taktak amahte zahnak tahin sang deuh in i sik tuh khiah i daih lo i.

⁷ Ikhalselai khuaruahharkul thil tampui i hmuhnak manin i puarthau lohnak tuhin i taksa songah ah hling i pe i. Cia hling in Satan palai bangin naper ai tluangkhawng lohnak tuhin i vittu le i khamtu i.

⁸ Vel thum tian Bawipa hnenah sawngen ai he thil heh lon tuh teu in ngen ing.

⁹ Ikhalselai ani i sawn ai, “I ninghiohnak heh nangmah caah tawk zo i; zaimantifangin na ṭawnṭai ber can heh i hat ber can i,” ti i. Ciamanin Khrih hathnak le huphimhnak heh i hnenah a umhnak tuhin i ṭawnṭaihnak ahkhai hmaihngal ngai in lung i awi i.

¹⁰ Ciatihin Khrih manin i ṭawnṭai fangin ituseh, zohsuam nautathnak, mangbang vansanghnak, reemhnak le harsahnak ah ituseh, lungkhim ngai in um thil zo ing. Zaimantifangin i ṭawnṭai laitak heh i hat laitak i.

Paul In Amahte Ngaihharhnak

¹¹ Mivoi nundan in nung ing; ningmah in ciatih ai nung tuhin i bawn i si! I vumai lungkhimhnak a larruaitu tuh heh ningmah i si. Zaikhai i ita lo inkhai, “Nalang hlaice pawl,” tahin tu tlawmniu khai i niam ve lo i.

¹² Thinsauhnak thawn ningmah lakah khuaruahhar le ngaihsunurkul tampui bawn ai ciami tu nalang taktak i ihnak larruai i.

¹³ A dang pawlpuite tahin zai bangin sia deuh in ning bawn ing? Paisa bawmhnak ngen in ning hnaihnok awng lo lek heh ilo im? I khelhhnak heh i ngaithiam tu hram ih.

¹⁴ Tun heh ning tlawng tuhin i tum a vel thumhnak ihang, zaikhai ning ngen tuh lo ing. I daihhnak tu ning paisa ilo i, ningmah i si. Thungai in ti fangin fate in mah ai nu le pa heh cawm tuhhnak ihang cuanglo i; nu le pa sawn in fate tu cawm tuh sawnhnak i.

¹⁵ Ningmah bawmhnak ah i naihnak hmuahhmuah le i taksa pum heh hmang sek i nuam i. Hebang in ning it ze manin i ngaih tlang tuh sawn lo i sim?

¹⁶ Kai tu ning caah thilrit ilo ing ti khiah ning inkhai ling tuh hlen i si. Ikhalselai mi hrekkhat in, mileple i, zawlhnak thang in kin awk i, ti tlang i si.

¹⁷ Ciami tu akontih in cang thil ini? Ning hnenah palai i hlathnakte khiah zawlhnak thawn miathnak si tuhin i hmanghnak i awm?

¹⁸ Titus tu ning tlawng tuhin ngen ai amah thawn feh kawm tuhin kin Khristian unau pakhat khai hlat ing. Titus in amah ai miathnak ah kin hmang i tiin ti nga i sim?. Amah le kaimah heh thinlung khat nai in naper tlang ai kin nundan khai bang dun i, ilo im?

¹⁹ Ning hmaiah kin ihnak ṭan in a pongtu ṭio kin bang thai pang i. Ciami tu hman lo i! Pathian ai mithmuh ah Khrih in pongruai kin daihsahhnak pong i ing. I ithnak u le nau, zaizongza kin bawnhnak heh ningmah bawmhnak ciang in kin bawnhnak i.

²⁰ Ikhalselai ning hnen i hleng fangin ciatihin cang selai tiin i daihsahhnak bangin ilo pang fangin ti khiah i lau ai, kai khai ciatih inglai ti ning daih sah bangin ilo pang fangin ti khai i lau ve i. Ning lakah tawngdunhnak, zohsuam le relsiatdunhnak, puarthauhnak le buaihnak thawn um in ning hmu pang fangin ti khiah i lau i.

²¹ Ning hnenin hleng leh fangin i Pathian in ning mithmuh ah zakthi in i bawn tuh i ti i lau i; ciatihin kin hnua lam can ai sualhnak a bawntute, thil ningrim a phunphun, taksa hiamhnak le nupa sual amahte bawnhnak sirhnak nai tlang lo manin kap hnelhno pang tuh ing ti i lau i.