2 Korin 11 - Zanniat Bible

Paul Le Nalang Khel Pawl

¹ I voi ta inkhai a or zia thiam tuhin i daih i! I or rih tu hram ih!

² Pathian in ning umhlah bangin kai inkhai ning umhlah ve ing. Ning tu Khrih amah thawn ian hoi dun tuhin i ham cia fenu thiang bang i si.

³ I lauhnak tu: rulpui in a leplehnak in Eve a zawl ngah bangin ning thinlung phatlohnak in ning zawl tuhai khim ngai le thiang ngai in Khrih ning hlunhnak heh hlum pang fangin tihnak i.

⁴ Zaimantifangin kin ai kin phuanghnak Jesuh ilo in Jesuh dang deuh thu a phuangtu ning hnenah a hleng inkhai lungawi thatho ngai in or ben tlang i si. Kin hnenin ning ngahciahnak Rauhla le Thuthangpha ilo in rauhla dangpui rel tlang fangin khai ning in pom tlang betbo manin i.

⁵ Ning in, “Nalang tumce” tiin ning tihnak mite tahin tlawmniu khai niam deuh in ruat dun ve lo ing.

⁶ Thurel lamah tu a thiam lo khai i thai ing; ikhalselai linghnak lamah tu i niam deuh hrimhrim lo i. Zaikom inkhai le aisu hnen ahkhai he thu tu fiang ngai in ning rel ing.

⁷ Pathian Thuthangpha ning hnenah i rel fangin rel man zaikhai lang lo ing. Ningmah sawn thupuiruai nuam in kai tu hniaah hla dun ing. Ciatih ai i um heh i mawh awm?

⁸ Ning hnenah naper i per laiah pawlpui dangdang in i cawm i. Ningmah bawmhnak ah amahte thilri sut ing ti tuh ing!

⁹ Cen ning hnenah i um songah paisa hmang tuh i kul ze inkhai ning tu ning hnaihnok awng lo ing; Macedonia in a hlengtu kin unaute in i kulhnak hmuahhmuah i sum sio i. Tun hlan bang thotho in hmai lam ahkhai phur ning ritruaitu i tuh lo ing.

¹⁰ Hetih ai i porhdunhnak heh Achaia peng song khuahacang ah aisu inkhai i dapruai tuh lo i tiin i songai a ummi Khrih ai thutak in thukham ing.

¹¹ Ning it lo manin hetihin i ponghnak i awm? Ning it ing ti khiah Pathian in ling i.

¹² Kin khai nalangte ve i ing a tiduntute in, “Amah bang thotho in kin khai naper ve i ing,” tiin porh dun thil tuh loin tunai i bawnhnak heh pehzom in bawn tuh betbo i ing.

¹³ Anite tu nalang taktak ilo i, nalang ngaingai lo pawl i. Anite naperhnak thu ah thudonrel tlang ai Khrih nalang ngaingai bangin ti khel tlang i.

¹⁴ Ciami heh ngaihsunur tuh zaikhai um lo i; Satan inrin a tleu vancungmi bang cang thiam i.

¹⁵ Ciamanin Satan ai napertute bangin bawn dun ita inkhai anite caah thil bai niu i. A tawphnak ah amahte naperdan bangin tuar tlang leh tuh i.

Nalang Imanin Paul Ai Tuarhnak

¹⁶ Not leh tuh ing: aisu inkhai mivoi ah i ruat maseh. Ikhalselai ning in i ruat le i sikhaw mivoi bangin i cosang tu ilai tlawmniu tal porh dun thil tuh ve ing.

¹⁷ Hetih ai i ponghnak heh Bawipa in i pongruaihnak ilo i; porhdunhnak thu ah mivoi bangin pong ing.

¹⁸ Ikhalselai minung taksa thu ah a porhduntu tampui manin kai khai porh dun tuh ve ing.

¹⁹ Ning tu mifim ze ning imanin mivoite or ben i si!

²⁰ Amah ai thuthu in ning nungruai nuamtu, ning zawl ai ning duaptu, thang in ning awktu, zoh ning suamtu le biang ning bengtute khai ong ben i si!

²¹ Kin tu ral kin hut ze ai kin tu ciatih bangin bawn ngam ve lo i ing tiin phuang tuh heh zak kin thi i. Ikhalselai aisu khai thil pakhatkhat thu ah porh ngam lekhaw, kai khai mivoi bangin pong tuh ing, anite tluk in ral i pha tuh ve i.

²² Anite tu Hebrew mite i awm? Kai khai i ve ing. Israel mi i awm? Kai khai i ve ing. Abraham ai tesinfate i awm? Kai khai i ve ing.

²³ Khrih ai cengfate i awm? Kai tu mivoi bang ing, ikhalselai thungai in anite tahin Khrih naruaihtu pha i sawn ing, Anite tahin in i naṭuan khung sawn i; vel tam sawn thawngtoh mi ing; vel tam sawn vithnak tuar ing, vel tampui thi dawn in tuar ing.

²⁴ Judah mite in vel sawmthum le vel kua in nawk nga rori i vit tlang i.

²⁵ Rome mite in vel thum i vit i, cen lungto sephnak vel khat tuar ing. Lawng hnawm vel thum tawk ing, vel khat tang tu nazi kulhluan li song tifingriat vumah i tang i.

²⁶ Vel tampui khual i tlawnghnak ah tilawi le damiahte manin thinlauhnak tawk ai i phunpui Judah mite hnenin le Gentile mite hnen inkhai kihkulhnak tawk ing. A kihkul a phunphun khuapui songah le hampalak ah ituseh, tifingriat vumah le rualpui ngaingai lo i naihnakte hnenin ituseh tawk ṭiode ing.

²⁷ Naper har catloin um ai vel tampui mitmu can nai loin um ing; rikam tihal in um ing; vel tampui buan hmun pha nai lo, aih tuh rong a kham in nai lo le hnikpon nai loin um ing.

²⁸ Cen midang thu rel loin pawlpui zawn in ruathnak hrimhrim manin nisiar thilrit bangin i net i.

²⁹ Mi pakhat ṭawnṭai lekhaw kai khai ṭawnṭai in ling dun ve ing; pakhatkhat sualhnak songah bah lekhaw thinharhnak in i dim i.

³⁰ Porh dun tuh ilengkhaw i ṭawnṭaihnak a larruaitu thil pakhat ah porh dun tuh ing.

³¹ Bawipa Jesuh ai pa le a Pathian kumzangza in a hming heh thangphat in um tuseh; Amah in thudonrel lo ing ti ling i.

³² Damascus khua songai i um laiah Kumpibawi Aretas kuthnia ai mangki bawi in khuapui kulhhnak kotka cangcang ah kaimah pomtu tuhin palikte dah i.

³³ Ikhalselai awngkua pakhat in sumpua ah bawm in i hla tlang ai ciatihin i luat i.