2 Korin 10 - Zanniat Bible

Paul In A Naper Thu A Ṭanhnak

¹ Hmunkhat ah kin um tlang fangin tu a nun pha i, ponkam nem i, i ti tlang ai kin khek hnuaah tu a mithmai thim ze i, ning tihnak kaimah Paul in Khrih ai ninghiohnak le nunnemhnak thinlung thawn,

² ning ngen ing: Ning hnen i hleng fangin mithmai thim in um kul tuhin um mah ih. Zaimantifangin a naperhnak heh laivum pamhaphnak thinlung thawn per tlang ngawn ilo im, kin titute hnenah puar ngai in ti thil ve ing.

³ Laivum ah a um mite ngaingai ising; ikhalselai laivum daihhnak thinlung thawn raltawng lo ising.

⁴ Raltawnghnak a dik lo ai thu el dun ai kin hmanghnak tu laivum ralthuam i lo i; a hat ngai Pathian ai ralthuam sawn i ai ralving kho ngaingai balhnak ai kin hmanghnak ralthuam i. A dik lo ai thu eldunhnak khai siat bal ising.

⁵ Pathian kin linghnak tuhin hngalhnak thawn dawlhnak khamtu hmuahhmuah bal sek i ing; minung ai ruathnak tu sal bangin pom ai Khrih thu ngaitu ah cangruai i ing.

⁶ Khrih thu ngaitu ning ihnak a semkhim liang in ning larruai hnuaah thu ngai lo pawl cawh thil tuh i ing.

⁷ Ning in thil heh a pualam hmel lek sik i si. Aisu tal in ciata ah kai tu Khrih naitu ing tiin a phuangtu um aw im? Ciatih bangin um lekhaw amah hlanlam ruat dun tuseh; zaimantifangin Khrih naihnak a i bangin kaimah khai i ve ing.

⁸ Bawipa ai i pehnak thu naihnak tu a luar deuh in porhdunhnak in hmang inglai khai zak i thi lo i; ciami thunaihnak tu ningmah hnawmcanhnak hrang ilo i, ningmah tungdinghnak hrang sawn i.

⁹ Hetih ai ilai kuathnak in ningmah thinlauruai tum hnelhno tuh i daih lo i.

¹⁰ Mi hrekkhat in, “Paul ai lai kuathnak tepawl heh kho ngai ai hmual khai nai roh lawnsi i; ikhalselai a minung ngaingai in kin hnenah a um fangin zaikhai i cuca lo i, a ponghnak khai hmual nai lo i,” ti tlang i si.

¹¹ Ciabang minungte in lamhla in kin nganhnak lai le ningmah thawn kin um fangin kin bawn tuhhnak dang lo i ti khiah lingthiam kul tlang i.

¹² Ciabang a sang ngai ai a ruatduntute thawn tu ruat dun ngam tuh lo ai santeh khai ngam tuh lo i ing. Thungai in ti fangin voi tlang zo i! Amahte veve tehdunhnak ah amahte hlanlam tehfung bawn tlang ai ciami tehfung in amahte veve thukhan dun i.

¹³ Ikhalselai kin tu porh dun inglai khai hlaifuan tuh lo i; Pathian in naper kin pehnak ramri song lek ah um tuhai cia ramri songah ningmah hnenah kin naperhnak tel i.

¹⁴ Cen ning tu ciami ramri songah a umtute ning imanin Khrih Thuthangpha keng in ning hnenah kin hleng fangin ramri pualam ah a vaktute ilo i ing.

¹⁵ Pathian in kin per tuhin a dahhnak ramri pualam ah napertute ai naperhnak ah porh dun tuh zaikhai nai lo i ing. Ciahnak tahin Pathian ai naperhnak ramri kin pehnak songah per ai ciatihin ningmah songah a lian le a kau sawn in per thil tlang tuhai ciatihin ning sanghnak khang tuh amam i, ti sawn heh kin umlamhnak i.

¹⁶ Ciatihin midang lo songai naperciahnak vumah porh dun loin hmundang sawn ah Thuthangpha rel tuh i ing.

¹⁷ Ikhalselai Lai Thianghlim in a ti zo bangin: “Aisu khai porh dun nuam lekhaw Bawipa ai a bawnhnak lek ah porh dun tuseh.”

¹⁸ Zaimantifangin mah veve i pha i, a tiduntu ilo in Pathian ai pha a tihnak sawn heh co i.