2 Korin 1 - Zanniat Bible

¹ Pathian lungkhimhnak in rilhnak Khrih Jesuh ai nalang kaimah Paul le kin unau Timothy in Corinth khua ai a ummi Pathian pawlpui le Achaia peng khuahacang ai a ummi Pathian ai minung hmuahhmuah ning hnenah lai ning kuat ing.

² Kin Pa Pathian le Bawipa Jesuh Khrih ai ninghiohnak le daphnak tu ning hnenah um tu hram seh.

Pathian Hnenah Anghnak Thu Rel I

³ Kin Bawipa Jesuh Khrih ai Pa le a Pathian, mi ninghiotu kin Pa, zaizongza ah bawmhnak kin petu Pathian tu thangphat ngasing!

⁴ Harsahnak a phunphun lakah kin bawmtu Amah i; ciatihin Pathian hnenin kin cohnak bawmhnak heh hmang in harsa vansanghnak a phunphun a tawktute khiah bawm thil ve ising.

⁵ Zaimantifangin Khrih tuarhnak a phunphun songai a teltu kin i bangin Pathian ai bawmhnak song ahkhai Khrih thawmin tel ve ising.

⁶ Harsa kin tawkhnak heh ningmah ai hnem tuhhnak le nunohnak caah i. Kinmah bawmhnak ngah lesingkhaw harsahnak kin tuarhnak heh thinsauhnak thawn ning khai tuar ben tuh ve in bawmhnak le thazang a ngahtute i si.

⁷ Ciatih imanin ning vumah umlamhnak i naihhnak bo awng lo i. Zaimantifangin kin tuarhnak kin tuarpui bangin hnemhnak kin cohnak ahkhai kin hnempui ve i si, ti ling i ing.

⁸ U le naute, Asia ramai harsa kin tuarhnak ning lingruai kin nuam i. Kin vumah phurhhnak thilrit heh a lian ze ai hlaiah a rit ze fawn ai nung tuhin rin ruat nawn lo i ing.

⁹ Thi tuhin relcat ciamite i ing, tiin ruat dun i ing. Ikhalselai he bangtluk ai thu a um heh kinmah veve rinsan dun loin thihhnak in mi a thoruailehtu Pathian kin rinsanhnak tuh sawn in i.

¹⁰ Ciabang a kihkul thihhnak songin Pathian in kin o ai hmai lam ahkhai kin o tuh i. Sawngenhnak in kin bawm zo manin,

¹¹ kin o leh tuh ngawn i, tiin Pathian vumah umlamhnak nai i ing. Ciatihin kin caah ning sawngenhnakte tu Pathian in ling tuhai Amah in hmuifu kin burh tuh i. Cen kin aiawh in mi tampui in Pathian hnenah anghnak thu rel tlang tuh i.

Paul In A Feh Tuhhnak Thawn I

¹² Kin hmaihngalhnak pakhat um i; ciami tu zai i tifangin: Laivum ai nundan le a hlaice in ningmah thawn kin pehzomhnak ah minung fimhnak ai ukhnak ilo in Pathian ninghiohnak huham in kin uk ai, Amah Pathian ai kin pehnak pong cangkheng le thin taktak in kin nundan heh kin thinlung hnawm le pha thiathiamhnak in kin lingpuihnak i.

¹³ Ning hnenah lai i ngan fangin ning siarthilhnak le ning lingthilhnak lekin ngan ing. Tun incen ning in i lingdan heh a hrekkhat lek i; ikhalselai semkhim ngai in i ling leh tuhin umlamhnak nai ing,

¹⁴ ciatihin Bawipa Jesuh ai Nia ah kinmah heh ning hmaihngalhnak i tuh i ing ai ningmah khai kin hmaihngalhnak i tuh ve i si.

¹⁵ Hemi thu heh fiang ngai in ling manin vel hnih hmuifu co tuseh tiin a hmasa ah ning mah ning tlawng tuhin tum lawk ing.

¹⁶ I tumhnak ah Macedonia i tlawng fangin ning tlawng kong tuhai i let lamah khai ning vun tuhin tum ing; Judea peng i hlengthilhnak tuhin bawmhnak khai i pe thil tuh i si, tiin i ruathnak i.

¹⁷ Hetihin paiciahnak i nai fangin ning hnenah thinlung taktai nai lo minung i bang awm? I khualtlawng tuhhnak i tawlrel fangin mah ca ian ruat in, “I, i ti hnuaah “I hlah, tiin” thu thleng leklo awng aw ing?

¹⁸ Pathian tu thudik phuangtu a i bangin ning hnenah thu i khamhnak tu “I,” ti le “I lo i” ti pahnih ceem lo i.

¹⁹ Zaimantifangin ning hnenah, Silas, Timothy, le kaimah in kin phuanghnak Pathian ai fapa Jesuh Khrih heh “I” ti le “I lo i,” ti a ceemcihtu ilo i. Pathian ai “I,” tiin a lungkhim mi fapa i.

²⁰ Zaimantifangin Jesuh Khrih tu Pathian thukhamhnak hmuahhmuah hnenah “I” tihnak i. Ciamanin Jesuh Khrih thawmin Pathian songlawihnak ah “Amen,” tiin kin ti dehnak i.

²¹ Kinmah ituseh, ningmah ituseh, hmunkhat ah Khrih thawn pumkhat ising, tiin lingfiangruaitu heh Amah Pathian i. Pathian in Amah bul ai i tuhin kin thiadang zo i.

²² Amah bul ai kin ihnak tu kin vumah hnikhnaihhnak dah zo ai kin caah dahciahnak a ummi hmuahhmuah ngah tuh ising ti amahkhan ah kin thinlung ah Rauhla Thianghlim kin pe zo i.

²³ Hemi thu lingtu ah Pathian ai hming sal ing: i thinlung a lingtu amah i. Corinth khua feh tuh loin i ruatcathnak tu ningmah ning zawnruat manin i.

²⁴ Ning sanghnak thu ah hemi heh sang tu ih, hemi heh sang mah ih tiin thu nai tum lo ing. Ning sanghnak ah lungawi thanuamhnak caah ningmah thawn naper tlang in kin umhnak i.