2 Johan 1 - Zanniat Bible

¹ Pawlpui upa kaimah in i ithnak mi le upatmi Nu le fate ning hnenah he lai ning kuat ing. Kaimah lek ilo in thutak a lingtu hmuahhmuah in ning it tlang i.

² Zaimantifangin thutak kin songah um ai kumzangza in kin hnenah um tuh i.

³ Pathian kin Pa le a Fapa Jesuh Khrih, Pa ai Fapa, ning kin hiohnak, ngaihharhnak le daphnak kin pe tu hram selai thutak le ithnak nai tlang hlen ngasing.

Thutak Le Ithnak

⁴ Kin Pa Pathian ai thupehnak bangin na fate hrekkhat tu thutak songah um tlang i ti i hmu fangin i ang ngai i.

⁵ Ciamanin i ithnak mi le upatmi Nu, pakhat le pakhat it dun ngasing ti ning ngen ing. Hetih ai i ngenhnak tu thupehnak thar ilo i; a hampan in kin lingciahnak thukham i.

⁶ Hemi ithnak i tihnak tu Pathian thukham heh hlun kin kul i tihnak i. Ciami thukham tu, a hampan in ning ling zohnak bangin, ithnak thawn nung tuh i si, tihnak i.

⁷ Mi zawltu tampui laivum ah hleng zo i, Jesuh Khrih tu minung in hleng lo i, a titute i! Ciabang minungte tu mi zawltute i ai Khrih ai ralte i.

⁸ Ciamanin ning perciahnak pairuai tuh loin le perman heh a khimliang in ngah thil tuhin ralring ngai in um tu ih.

⁹ Aisu khai Khrih thuzirhhnak songah um loin a hlaifuan in a nungmi heh Pathian nai lo i. Ikhalselai Khrih thuzirhhnak songai a ummi in Pathian nai ai a Fapa khai nai i.

¹⁰ Ciamanin mi pakhatkhat ning hnenah hleng ai he thuzirhhnak keng hlah lekhaw ning inn ah hlengruai mah ih. “Na vumah daphnak um tuseh,” ti rin ti nuam mah ih.

¹¹ Zaimantifangin phatlohnak a bawntu heh, “Daphnak na vumah um tuseh,” a titu in phatlohnak a bawnhnak songah tel ve i.

Pon Tawphnak

¹² Thu ning rel tuh tampui nai ing, ikhalselai lai le laiti in ning rel tuh lo ing. Kin anghnak a semkhim thil tuhin ning hnenah tlawng in pumpak in ning pon tum ing.

¹³ Ning ithnak mi ning unau Nu ai fate in hnuk ning sat i.