1 Timote 6 - Zanniat Bible

¹ Sal in bawi khiah upat pe tlak i, tiin ruat tuseh. Ciatihin bawn lekhaw aisu inkhai kin Pathian hming le kin thuzirhhnak relsia tuh lo i.

² A bawite Khristian cang fangin salte in, “Khristian kin unau pam ngawn i,” tiin zohsuam maseh. Amahte naper heh pha amam in per tuh sawnhnak i; zaimantifangin a naperhnak ai phahnemhnak a cotute tu a ithnak a sangtute i. Hemi bangin thuzirh tulai rel tuh i si.

Zirh Sualtu Le Lianhnak Taktak

³ Aisu khai Bawipa Jesuh Khrih ponkam a dikmi le kin biahnak ai zirhhnak thawn bang dun lomi thu a zirhtu heh,

⁴ zaikhai ling lem loin mipuarthau menma i. Ciapa tu ponkam pakhat thu ahkhai eldunhnak le haudunhnak hiam ai lungkhim ti nai lo i. Ciami iksikhnak, thutamhnak, mi nautathnak, mi sang lohnak le,

⁵ thutak a pom thil lo mite le thinlung in thu a ruat ben nawn lo mite thawn catloin thu eldunhnak suakruai i. Biahnak heh lianhnak lampui pakhat i tiin ruat tlang i.

⁶ Biahnak in minung heh lianruai taktak i, a naih zah vumah lungkhimhnak a nai hnua lamin!

⁷ Kin te sawngniu ah he laivum ah ziang kin suahpuihnak um i? Zaikhai um lo i! Hemi laivum in kin keng thilhnak ziang um i? Zaikhai um lo i!

⁸ Ciatih imanin ai tuh rong le sil tuh hnikpon nai lesingkhaw kin caah tawk zo i.

⁹ Ikhalselai lian a hiamtute tu sualforhhnak songah tlok ai voithu in naper le a kihkul taksa daihhnak thang songah awk tlang i. Ciami thil in amahte khiah hnawmhnak ah tlokruai ai hnawmcan i.

¹⁰ Zaimantifangin paisa daih ze heh sualhnak phuncang pantu a hampui i. Mihrek in paisa nai hiam ze manin kin sanghnak zam ai lungsiahnak in vel tampui amahte thinlung khoi i.

Pumpak Thuzirhhnak

¹¹ Ikhalselai nang tu Pathian minung na imanin hemite heh pial tu. Dikcanghnak, thianghlimhnak, sanghnak, ithnak, tuar benhnak le thinnemhnak tepawl nai tuhin roh ngai in zuam tu.

¹² Sanghnak hrang tawngdunhnak ah na tha naih tawp suah tu. Lingpuitu tampui mithmuh ah na sanghnak felfai ngai in na phuang fangin Pathian ai na ko sanhnak kumkhua nunhnak heh kho ngai in awh tu meng.

¹³ Zaizongza nunhnak a petu Pathian le Pontius Pilat hmai ai a sanghnak felfai ngai ai a phuang bentu Khrih Jesuh hmaiah na ruai ing:

¹⁴ Kin Bawipa Jesuh Khrih a lar leh Nia tian he i thupehnakte heh semkhim liang in hlun tu.

¹⁵ Cia nia tu, songloih mite le amah pakhat lek thil hmuahhmuah Uktu, Kumpibawite lakai kumpibawi ber, bawite lakai Bawi ber Pathian in, a thiahciahnak can ah khimruai tuh i.

¹⁶ Amah lek heh thih nia nai lo Pathian i; a tlanglenghnak hmun heh a tleu ze manin aisu inkhai nong thil lo i. Ani tu aisu inkhai hmu awng lo i; hmu thil tuh awng lo i. Kumzangza huham le upathnak tu a hnenah um tu ngio selaw! Amen.

¹⁷ Miliante heh, “Laivum thilri sumsaw ning nai manin hngal mah ih,” tiin rel tu. Rinsan tlak lo lailung vum lianhnak ah umlam mah ih; kin hiamhnak hrangah zaizongza kin petu Pathian ah hamsa tu sawn seh.

¹⁸ Thilpha bawn tuhin le naper phahnak ah milian cang tuh sawn in le hmunthiammi i ai amahte naihnak heh midang kawm siang tuhin ralringhnak pe tu.

¹⁹ Ciatihin hlun lekhaw, hmai lam hrangah a pha in hamsatu i tuhai ro songlawi khawl tuh i. Ciatihin nunhnak taktak co tlang tuh i.

²⁰ Timothy, na kilkhawl tuhin na kut songai aphnak mite veksen in himniu in kilkhawl tu. Upathnak zaikhai tel lo, voithu eldunhnak, mi hrekkhat in “Fimthiamhnak” tiin a dik lo lamin tihnak ponkam heh Pial tu.

²¹ Zaimantifangin mi hrekkhat in ciami tu co ngah zo i ing tiin ti ai sanghnak lampui in pial tlang zo i. Pathian ninghiohnak tu ning veksen hnenah um tu hram seh.