1 Timote 4 - Zanniat Bible

Zirhtu Sual

¹ Can hnuata lamah mihrek in Khristian thupom heh zam tlang tuh i; zawltu rauhla sang tlang tuhai khuasia ai zirhhnak hlun tlang tuh i, tiin fiang ngai in Rauhla in rel i.

² Ciabang zirhhnak tu thudonrel mi zawl thiamte in zairuai i. A hnawm le pha thiathiamhnak thinlung tu thir ling ai hulhnak bangin a thimi i.

³ Ciamite in nupa hoidunhnak le rong hrekkhat ai khai pha lo i tiin zirh tlang i. Ikhalselai Pathian in ciami rongte heh ai tuhin bawn ai Pathian a sangtu le thutak a lingtute ca ahcen anghnak sawngenhnak thawn ai tuhin pha i.

⁴ Pathian ai bawnhnak hmuahhmuah ai pha sio i; zaikhai hnawl tuh um lo i. Ikhalselai zaizongza heh anghnak sawngenhnak thawn cosang tuhhnak i;

⁵ zaimantifangin Pathian thu le sawngenhnak in a thiang ah cangruai zo i.

Khrih Jesuh Ruaihtu Pha

⁶ Hemi zirhdunhnak heh Khristian kin unaute rel lesikhaw Khrih Jesuh ruaihtu pha i tuh i si. Ningmah khai a hlun hnelhno zomi a dikmi thuzirhhnak le sanghnak ponkam in rauhla lamah cawm dun i si.

⁷ Ikhalselai Pathian thu thawn pehzomhnak zaikhai a nai lomi rel tlak lo tluanthu menma pawl heh sang mah. Pathian daihdan ai nung tuhin zirh dun tu ṭio law.

⁸ Taksa nuncakhnak ai zirhhnak tu man nai ve napui rauhla nuncakhnak hrangah zirhhnakte tu zaizongza ah man nai i, Zaimantifangin tunah ituseh, hmai lam caah ituseh, a thukhamhnak tu nunhnak i.

⁹ Hetih ai i relhnak heh a dikmi ponkam i ai sang tlak le co tlak i.

¹⁰ Rimsu ze le harsa ze in naper ising; zaimantifangin kumzangza in a nungmi Pathian vumah umlam ising. Cia Pathian tu mi zongzong Nunotu i ai a hlaice in amah a sangtute caah i.

¹¹ Hemi hlun tuhhnak le zirhhnakte heh rel tulai zirh tu.

¹² Mino na imanin aisu inkhai nau na tat maseh. Ikhalselai na hmurka na pongdan le, na nuncan ziaza, ithnak, sanghnak le cianghlimhnak ahkhai a dang sangtute ai santeh tlak in nung tu.

¹³ Na hnenah i hleng hlan song mizapui hnenah Lai Thianghlim siar tulai, thurelhnak le thuzirhhnak in na can le na thazang hmang tu.

¹⁴ Prophette in thu phuang tlang ai upate in na lu vumah amahte kut suan sawng fangin na ngahhnak rauhla lehsawng heh zam zel menma mah.

¹⁵ Na khangso zia heh mi zongzong ai hmu tuhin hemite heh na can le na thazang pe in hmang tu.

¹⁶ Na umdan ralring tulai na zirhhnakte khai ralring tu. Hemite heh catloin bawn tu. Bawn ben ngio lesikhaw nangmah le na thurelhnak a zatute heh ohnak ngah tuh i si.