1 Timote 3 - Zanniat Bible

Pawlpui Konghoitu

¹ Aisusu inkhai pawlpui konghoitu cang nuam lekhaw naper pha daihtu i,” tihnak tu thudik i.

² Pawlpui konghoitu cenin sawibang lomi i tuh i. Nupui pakhat lek a naitu, ri thai thil a sup benmi, a uk dun benmi, felfai mitsih mawi ai a nungmi, mikhual a sikthiam mi le mi zirh a thiam mi i tuh i.

³ Zuri hmang i tuh lo ai, thinsup ben lo, midang thawn a tawng dun detu khai i tuh lo i. Ikhalselai mi lungnem le daphnak a daihtu i tuh i. Tangka a daih zemi i tuh lo i.

⁴ A innsang phatak niu in a ho bentu i tuhai a fate tu mi thu a ngaitu le mi upat thiammi i tuh i.

⁵ Amah ai innsang rin phantak in kilkhawl ben hlah lekhaw akontih in Pathian ai pawlpui kilkhawl ben tuh i.

⁶ Sanghnak lamah thinthleng sawngniu i tuh lo i; ciahlah lekhaw hngal pang tuhai Satan khiah hnawlhnak a tuar bangin hnawlhnak tawk pang tuh ve i.

⁷ Pathian sang lo mizapui ai upathnak i tuh i; ciabang ihlah lekhaw mi ai relsiahnak tawk tuhai Satan ai thang songah awk tuh i.

Pawlpui Upa

⁸ Pawlpui upate tu ziaza pha a naimi le pong tam lo thinlung tluangmi ituseh. Zu ding le tangka a daih zemi i maseh.

⁹ Pathian in a phuanghnak thutak heh a hnawm le pha thiathiamhnak thinlung thiangniu in kho ngai ai a pomtu i tuh i.

¹⁰ Upa a per nuamtute tu cu hmasa tuhai sawibang hlah lekhaw per tuh i.

¹¹ A nupuite khai ziaza phami i tuhai mi relsia ai pong tammi i tuh lo i. Zu ding lomi i tuhai zaizongza ah mifel i tuh i.

¹² Pawlpui upa tu nupui pakhat lek a naitu i tuhai a innsang le a fate phatak niu in a uk bentu i tuh i.

¹³ Amahte naper felniu in per bentu upate heh upat co ai Khrih Jesuh sanghnak thu khiah ralpha ngai in phuang ngam i.

Thuthup Lianpui

¹⁴ Na hnenah he laikuat i ngan laiah a rai hlanah ning tawk tuh ing tiin ruat ing.

¹⁵ Ikhalselai khua i hnua pang lekhaw Pathian ai innsang a pawlpui songah zaibang in um tlang tuh ising, ti khiah he laikuat in ning rel tuh ing. Pathian innsang tu kumzangza in a nungmi Pathian ai pawlpui i ai ciami pawlpui tu thudik hamtohhnak ah kho ngai ai a dingruaitu khuam i.

¹⁶ Kin biahnak songai thuthup heh a lian ngai i, ti khiah aisu inkhai kin el thil tuh lo i: Ani tu minung taksa in suak i, a dikmi a ihnak thu Rauhla in larruai i; Cen vancungmi inkhai hmu i; A thula tu miphun cang hnenah phuang i ai Laivum khuahacang ah sang tlang i. Cen songlawihnak ah hon dang teu i.