1 Siangphahrang 9 - Zanniat Bible

Solomon Hnenah Bawipa Lar I

¹ Kumpibawi Solomon in Biakinn le kumpibawi inn a sahnak hmuahhmuah a ben fangin,

² Bawipa tu Gibeon khua a hnenah a lar awng bangin, a hnenah lar i.

³ Bawipa in a hnenah, “Na sawngenhnak za zo ing. Kaimah i biahnak hrang na sahnak hemi Biakinn tu cianghlimruai ai he inn ah i hming dah zo ing. Kilkhawl tuhai a kumzangza in um tuh ing.

⁴ Na pa David in dikcang ngai in le fel ngai na i ruaih bangin nang inkhai kaimah na i ruaih ai i thupehnak le i dan pehnak hmuahhmuah hlun lesikhaw,

⁵ na pa David hnenah, ‘Na tesinfate in Israel uk tuh ngio i,’ tiin i thukhamhnak heh khimruai tuh ing.

⁶ Ikhalselai nangmah ituseh na tesinfate ituseh kaimah i hlun loin i dan pehnak le i thupehnakte bal ai khuavang dangdang na ruaih in bia le i sikhaw,

⁷ i minung Israel mite tu i pe cia ram songin piak tuh sio i. Kaimah i biahnak hrangah i thianghlimruaihnak hemi Biakinn heh hnawl tuhai laivum ai mi zongzong in Israel mite tu zohsuam tuhai nautat tlang tuh i.

⁸ Hemi Biakinn tu inn rop ah cang tuhai a hiangai a vaktu hmuahhmuah mangbang tlang tuhai, ‘Zaimanin he ram le he Biakinn vumah Bawipa in hetih hlaihlawr in bawn ini?’ tiin ti tlang tuh hnelhno i.

⁹ Ciafangin midangte in, “Israel mite in a pupate Egypt ram an a hoisuaktu Bawipa amahte Pathian zam in khuavang dangdang ruaih tlang manin amahte vumah Bawipa in hebang siatsuahhnak hlengruai i,’ ti tlang tuh i,” tiin ti i.

Solomon Le Hiram Lungkhimdunhnak

¹⁰ Solomon in Biakinn le a kumpibawi inn heh kum kul song sa ai ben i.

¹¹ A naperhnak hrangah a kulhnak cedar thing, farthing le suite hmuahhmuah Tyre kumpibawi Hiram in pe i. Innte a sa ben fangin Galilee peng ai khuate khua kul heh Solomon in Hiram pe i.

¹² Ciami khua kul sik tuhin Hiram khiah feh ai a sik fangin daih hangngial lo i.

¹³ Ciamanin Solomon hnenah, “Na pehnak khuate tu hemite heh im, i unau pa! tiin ti i. Ciamanin cia ram heh Kabul tiin tunnia tian ko i.

¹⁴ Hiram in Solomon heh sui phurh za le phurh kul hluan nga kuat zo i.

Solomon Naperhnak Dangdang

¹⁵ Kumpibawi Solomon in khengkhebel in a naper har a perruai mite in Biakinn le kumpibawi inn sa tlang i. Khuapui ai nisuah lamah laipua silh in Millo khua dingsuak ai khuapui kulhhnak ving khai tiang tlang i. Cen hazor khua, Megiddo khua le Gezer khuate khai saleh i.

¹⁶ Egypt ram kumpibawi in Gezer khua heh tawng ai lang awng i. Khua song mite rek ai amahte khua heh mai in tai awng sek i. Cen a fanu in Solomon a paa fangin a pasal naihnak lehsawng ah cia khua heh a fanu sum i.

¹⁷ Cen Solomon in saleh i. Ciahlaiah khengkhebel ai ruaihnak a napertute hmang in hlang lam Beth Horon,

¹⁸ Baalah le Judah hampalak ai um Tamar khua,

¹⁹ a rong dahhnak khuate le a siphuh le a siphuhleng dahhnak khuate, Jerusalem ah ituseh, Lebanon ah ituseh, a ukhnak ram song hmundang hmuahhmuah ah ituseh, a sa nuamhnak khuate heh Solomon in sa i.

^20-21 Ciatihin a hmanghnak a napertute tu Israel mite in Canaan ram a lang fangin a rek lohnak Canaan mite ai tesinfate i. Ciamite tu Amor mi, Hit mi, Perez mi, Hiv mi, le Jebus mite i ai amahte tesinfate tu tun san tianin sal cang lai i.

²² Solomon in Israel mite tu sal ah hmang lo i. Anite tu a ralkapte, a kuthnia tlangsuakte, a ralkap hotute, a leng mawngtute le a siphuh vumto ralkapte ah hmang i.

²³ Solomon in a sahnak inn a phunphun a pertute hmuahhmuah hotu tuhin hotute za nga le sawmnga dah i.

²⁴ Egypt ram kumpibawi fanu, Solomon ai nupui tu David khuapui an suak ai Solomon in amah ca sakhnak kumpibawi inn ah thawn i; cia hnuaah Solomon in laipua silh ai Millo khuapui sa i.

²⁵ Kum khat ah vel thum Solomon in maitai hibawl le rualrem hibawlhnak Bawipa caah a dawlhnak puleng vumah sel i. Bawipa hnenah rimhmui khai tai ai sel i. Ciatihin Solomon in Biakinn sa khiah ben i.

²⁶ Kumpibawi Solomon in Eziongeber khua ah tangphawlawng tampui bawn i. Eziongeber khua tu Edom ram, Aqaba tifingriat tikawn ai um Elath khua hiangah um i.

²⁷ Kumpibawi Hiram in a tangphawlawng ralkap thiam ngai pawl heh Solomon ai tangphawlawng ralkapte thawn per tlang tuhin kuat i.

²⁸ Ciamite tu Ophir ramah feh tlang ai Solomon caah sui phurh za li dung phurh tlang i.