1 Siangphahrang 19 - Zanniat Bible

Sinai Tlang Ah Elijah

¹ Elijah ai bawnhnak hmuahhmuah, Baal prophet a rek zo sek thute heh kumpibawi Ahab in a nupui Jezebel rel sio i.

² Cen Jezebel in Elijah hnenah thucah ai, “Baal prophette vumah na bawnhnak bangin thangha tun camcu fangin na vumah bawn ve hlah lengkhaw khuavangte in kaimah i rek tuseh,” ti i.

³ Ciafangin Elijah tu a thinlau in tlan i. A hnenum pa thawn Judah ram Beersheba ah feh kawm i. Ciata ah a hnenum pa heh hlum ai,

⁴ Elijah tu hampalak ah ni khat song feh i. Thingpui hniaah com ai to i; thi nuam sawn i. “Bawipa, tawk tuhang seh, i zuam nawn lo ihang. I nunhnak lang tuhang. Zaimantifangin i pu le i pate tahin i pha cuang lo i!” tiin sawngen i.

⁵ Thingpui hniaah zau ai mitmu lio i. Mangrin loin vancungmi pakhat in tok ai, “Tho tulai rong ai tu,” ti i.

⁶ Cen a hiang a sik fangin a lu hiangah a em thar niu sangzawl khat le ti thawl khat hmu i. A ai ben fangin mitmu lala i.

⁷ Bawipa ai vancungmi khiah kawi lala ai a vel hnihhnak tok lala ai, “Tho tulai rong ai tu; lampui ah na har ze pang fangin,” tiin ti i.

⁸ Elijah tu tho ai sang a ai hnuaah a tha tlung leh ai, ni sawmli le zan sawmli, Pathian ai mual, mual thianghlim, Sinai Tlang ah feh i.

⁹ Ciata lungkhukua songah zan fangin cam i. Cammalak ah Bawipa in a hnenah, “Heta ah ziang bawn isi?” tiin ti i.

¹⁰ Elijah in, “Bawipa, Cungnungber Pathian, nangmah lek na ruaih ai nangmah caah ṭang ngai ing. Ikhalselai Israel mite in nangmah thawn amahte thukhamhnak heh bal zo i; na pulengte bal ai na prophette rek tlang sio i. Kaimah lek i tang ai tunin kaimah rin a rek i tum i,” tiin ti i.

¹¹ Ciafangin Bawipa in, “Suak tulai tlang vumah i mithmuh ah ding tu,” tiin ti i. Cen Bawipa tu a hiangniu in kan ai, hlisia zuangruai ai tlang khai hlin sio ai lungtote khai khoi sek i. Ikhalselai Bawipa tu hli songah um lo i. Hli a dap hnuaah hlinhlin dekdo i; ikhalselai Bawipa tu hlinhlin songah um lo i.

¹² Hlinhlin a ben hnuaah mai kang dekdo i; ikhalselai Bawipa tu mai songah um cuang lo i. Cen maikang hnuaah aw nemniu pakhat za i.

¹³ Ciami tu Elijah in a za fangin a pon in a hmai hup ai lungkhukua songin suak ai a kua rong ah ding i. Cen aw in, “Elijah heta ah ziang bawn isi?” tiin ti i.

¹⁴ Elijah in, “Bawipa Cungnungber Pathian, nangmah lek na ruaih ai nangmah caah ṭang ngai ing. Ikhalselai Israel mite in nangmah thawn amahte thukhamhnak heh bal zo i; na pulengte bal tlang ai na prophette khai rek tlang sio i. Kaimah lek i tang ai tunah kaimah rin a rek i tum tlang i,” tiin ti i.

¹⁵ Ciafangin Bawipa in, “Let tulai Damascus khua hiangai ramkhing ah feh tu. Khuapui song na hleng fangin Hazael tu Syria kumpibawi tuhin thau pawh tulai,

¹⁶ Nimshi ai fapa Jehu khiah Israel kumpibawi tuhin thau pawh tu. Nangmah na roltu tuhin Abel Meholah khuami Shaphat ai fapa Elisha heh thau pawh tu.

¹⁷ Hazael in ralvang thawn rek tuhai a rek ngah lo mite tu Jehu in rek tuh i.

¹⁸ Ikhalselai Israel ram songah minung thawng sarih zuah tuh ing. Kaimah i rinsanmi, Baal khuavang hnenah lu a ut lai lomi le Baal lim a thut lai lotute i,” tiin ti i.

Elisha Kohnak

¹⁹ Elijah tu feh ai Shaphat ai fapa Elisha khiah kawlpawcang thawn lo rawi thliahthlo hmu i. Lo a rawitu kawlpawcangte tu a veksen in kap hlaikhat i ai Elisha tu a hnuataber kap khat thawn per i. Elijah in a pon hawk ai Elisha vumah silh i.

²⁰ Cen Elisha in a kawlpaw kap hlum ai Elijah heh hnawh ai a hnenah, “I nu le i pa hnuksat in thut ta tuhai cia hnuaah na hlun tuh ing,” tiin ti i. Elijah in, “Pha i, feh ta tu; na kham lo ing,” ti i.

²¹ Elisha tu a kawlpawcang kap khat umhnak ah feh ai a ro hnuaah, kawlpaw sa suang i; kawlpaw hawngrolh khiah a suanghnak zanthing ah hmang i. A suanghnak kawlpaw sa tu mizapui pe ai ai tlang i. Cen Elijah heh hlun ai a bawmtu ah cang i.