1 Siangphahrang 16 - Zanniat Bible

¹ Bawipa in Hanani ai fapa prophet Jehu hnenah, Baasha rel tuhin hetihin thu rel i:

² “Laivut lakin na cawisang ai i minung Israel mite ai kumpibawi ah na bawn ing. Ikhalselai na sual ai Jeroboam bangin Israel mite hoisual isi. Amahte sualhnak in thin i rawtiar manin,

³ Jeroboam vumah i bawn zo bangin na vumah khai bawn tuhai, nangmah le na songkhatte tu ning lon tuh ing.

⁴ Khuapui songai a thimi na songkhatte tu uico in a luang ai tuh i. Hampalak ai a thitute tu langtar in a luang ai tuh i,” tiin ti i.

⁵ Baasha ai bawnhnak a dang hmuahhmuah le a ral phahnak thute tu Israel Kumpibawite Ai Tluanthu Laibu songah ngan sio i.

⁶ Baasha tu thi ai Tirzah ah phum tlang i. Cen a fapa Elah in kumpibawi tuhin sawng i.

⁷ Baasha le a songkhatte vumai Bawipa ai cukcamhnak ponkam a hlenpuitu heh prophet Jehu i. Baasha tu Bawipa vumah a sual manin hebang cukcamhnak a hnenah hleng i. A hlanai kumpibawi Jeroboam bangin Baasha khai phatlohnak a bawn lek zolo in Jeroboam le a innsangte a veksen in rek berh manin Bawipa thinrawtiar i.

Israel Kumpibawi Elah

⁸ Judah kumpibawi Asa in ram a ukhnak kum kulhluan ruk kum ah Baasha ai fapa Elah tu Israel kumpibawi cang ai Tirzah in kum hnih song uk i.

⁹ Cen a kuthnia ai tlangsuak pakhat, kumpibawi siphuhleng a hrekkhat hotu Zimri in engsan i. Kumpibawi tu a inn kiltute hotu Arza inn ai zu a ri lakah,

¹⁰ Zimri heh lut ai kumpibawi Elah a rek hnuaah amah kumpibawi cang i. Hemi tu Judah kumpibawi Asa in ram a ukhnak kumkul hluansarih kum ah i.

¹¹ Zimri tu kumpibawi a cang sawng fangin Baasha ai innsangte hmuahhmuah rek berh i. A songkhat le a rualpui pha pasal hmuahhmuah khai rek berh i.

¹² Prophet Jehu hmang in Baasha vumah Bawipa ai ponkam a umhnak bangin Baasha ai innsangte tu Zimri in rek berh i.

¹³ Baasha le a fapa Elah in milim bia kawm ai Israel a hoisual kawm manin Israel ai Pathian Bawipa thinrawtiar i.

¹⁴ Elah ai a bawnhnak dang hmuahhmuah Israel Kumpibawite ai Tluanthu laibu songah ngan tlang i.

Israel Kumpibawi Zimri

¹⁵ Judah kumpibawi Asa in ram uk kum kul hluan sarih kum ah Tirzah khua an Israel ram heh Zimri in ni sarih song uk i. Israel ralkapte in Filistin ram Gibbethon khuapui tawng tlang ai a kulh sio fangin,

¹⁶ Zimri in a kumpibawi engsan ai rek i ti khiah a za fangin, ciata rori ah a hotu ralbawi Omri heh Israel kumpibawi ah bawn i.

¹⁷ Omri le a ralkapte in Gibethon khua heh zam ai Tirzah khua sawn kulh tlang i.

¹⁸ Zimri in a ralkapte kut ah khuapui Tirzah hleng zo ti a hmu fangin, a inn song ralrelhhnak a songta khan ah lut ai kumpibawi inn heh mai in tai ai amah khai kang lio i.

¹⁹ Hemi bangtluk bawngsiahnak thil heh Bawipa vumah a sual manin a suakhnak i. A rol mi Jeroboam bangin ani inkhai sual ai Israel mite khai sualruai sio manin Bawipa heh a angruai lo i.

²⁰ Zimri ai a bawnhnak dangte hmuahhmuah, mi a engsanhnak thu thawn, Israel Kumpibawite ai Tluanthu Laibu songah ngan sio i.

Israel Kumpibawi Omri

²¹ Israel mite tu bur hnih in khan dun i: a hrek in Ginath ai fapa Tibni kumpibawi cangruai nuam tlang i, a hrek in Omri ṭan tlang i.

²² Hnuavai fangin Omri ṭantute in neh i. Tibni tu thi ai Omri tu kumpibawi ah cang i.

²³ Ciatihin Judah kumpibawi Asa in ram a ukhnak kum sawmthum le kum khat kum ah Omri tu Israel kumpibawi ah cang i. Israel ram kum hlaihnih song uk i. A hmasa kumruk song tu Tirzah khua an uk i.

²⁴ Cia hnuaah Shemer tihnak pa hnenin Samaria tlang heh tangka thawng ruk in lai i. Omri in Samaria tlang heh ving in kulh ai ciata ah khuapui toh i. A tlang naitu awng Shemer hming cuang in ciami khuapui hming heh Samaria tiin bawn i.

²⁵ A hlanai kumpibawite tahin Omri tu Bawipa vumah sual amam i.

²⁶ A hlanai kumpibawi Jeroboam bangin, amah ai sualhnak manin le Israel mite milim biahnak le sualhnak songai a hoilut manin, Israel ai Bawipa Pathian heh a thinrawtiar i.

²⁷ Omri ai bawnhnak dangte hmuahhmuah le a san songai thil canghnakte tu Israel Kumpibawite ai Tluanthu Laibu songah ngan tlang i.

²⁸ Omri thi ai Samaria ah phum tlang i. Cen a fapa Ahab in kumpibawi tuhin sawng i.

Israel Kumpibawi Ahab

²⁹ Judah kumpibawi Asa in ram a ukhnak kum sawmthum le kum riat kum ah Omri ai fapa Ahab tu Israel kumpibawi cang ai Samaria in kum kul hluan hnih song uk i.

³⁰ A hlanai kumpibawite tahin Bawipa vumah sual sawn i.

³¹ Kumpibawi Jeroboam bangin sualhnak bawn heh tawk ti lai lo ai Sidon kumpibawi Ethbaal ai fanu Jezebel hoi ai Baal khuavang tianin bia i.

³² Samaria khuapui ah Baal khuavang hrang biakinn sa in puleng bawn ai biakinn song ahhen Baal khuavang dah i.

³³ Khuazingnu Asherah bia hmun ah thingzarh khai dah i. A hlanai Israel kumpibawite hmuahhmuah tahin amah pakhat in Israel ai Pathian Bawipa heh luar sawn in thinrawtiar i.

³⁴ Amah in Israel ram a uk songah Bethel khuami Hiel in Jericho khua heh toh leh i. Ciafangin Nun ai fapa Joshua hmang in Bawipa in a rel cia bangin Jericho khua toh lehhnak a pan fangin Hail ai fapa upa ber Abiram thi ai kotkate a bawn laitak ah a fapa nauta ber Segub thi lala i.