1 Siangphahrang 10 - Zanniat Bible

Sheba Kumpibawinu In Tlawng I

¹ Sheba ram kumpibawinu in Solomon hmingthang zia a za fangin a lek tuhin thuzawthnak har phuncang thawn Jerusalem ah feh i.

² A hnenum tampui thawn feh tlang ai, rimhmuite, lungmankhung pawl le sui tampui phurtu tuhin kalauk tampui kengin Jerusalem khuapui ah hleng i. A tawk dun fangin Sheba kumpibawinu in a thinlung ai suakhnak hmuahhmuah thu tampui zawt i.

³ Solomon in a thuzawthnak sawn ben i. A sawn ben lohnak zaikhai um lo i.

⁴ Solomon ai ngaihsunurkul a fimhnak khiah Sheba kumpibawinu in ling ai, kumpibawi inn a sahnak khai hmu i.

⁵ Cabuai vumai a rong aihnak, a kuthnia tlangsuakte ai umdan, a naruaihtute ai silhnak hnikpon a mawidan, a hnenumte merdan le Biakinn ai hibawl a selhnakte, sik ai a hmu fangin Sheba kumpibawinu tu multing ai a thinkhing roh i. A hmuhnak hmuahhmuah in kumpibawinu heh aicanruai ngai ai a lu khai am sek i.

⁶ Cen kumpibawi Solomon hnenah, “I ram an na thula le na fimhnak thute i zahnak heh dik rori i.

⁷ Ikhalselai heta ah kawi in i mit rori in i hmu hlan ahcen sang thil awng lo ing. I zahnak tu tun i mit ai i hmuhnak a hrek khai ilo i. Na fimhnak le na lianhnak heh mi in i relhnak tahin thupui sawn i.

⁸ Na nupuite a bawngpha ze i! Na hnenah um in na fimhnak ponkam a zatu thliahthlo na hnenumte tu a bawngpha ze i!

⁹ Bawipa na Pathian thangphat in um tuseh! Israel kumpibawi ah na bawn manin na vumah a lungawi i, ti khiah larruai zo i. Israel mite a ithnak heh kumzangza in a kho manin dikcanglairelhnak le felhnak thawn anite uk tuhin nangmah heh amahte kumpibawi tuhin na bawn zo i,” tiin ti i.

¹⁰ Cen Sheba kumpibawinu in Solomon heh sui phurh zakhat le phurh kul hluannga zolo le rimhmui le lungmankhung tampui pe i. Sheba Kumpibawinu in a pehnak rimhmui heh Solomon in nawk khat a ngahhnak lehsawng hmuahhmuah lakah a tamber i.

¹¹ Hemi thilri hmuahhmuah hlaiah Ophir ram an sui phurhnak Hiram ai tangphawlawngte in sandal thing le lungmankhung pawl tampui phurh fawn i.

¹² Hemi thing tu Solomon in Biakinn le kumpibawi inn kulhhnak ah hmang ai awmawi tumtute caah tingriset le congcing ah bawn i. Israel ram songai amahte phurhhnak sandal thing hmuahhmuah lakah thing a pha ber pawl i. Ciabang thing pha heh hmu tuh awng lo ihang.

¹³ Sheba ram kumpibawinu ai ngenhnak hmuahhmuah Solomon in pe sio i. Hemi a pehnak tu kumpibawi pakhat in a dang kumpibawi hnenah a pehnak de lehsawng hlaiah i. Cia hnuaah Sheba kumpibawinu tu a hluntute thawn Sheba ramah tlung tlang i.

Kumpibawi Solomon Ai Naihnak

¹⁴ Kumpibawi Solomon in kumsiar in sui phurh zaruk le phurh kul hluannga ngah ṭiode i.

¹⁵ Hemi tu sumtuahtute hnenin ngunkhuai langhnak le pursumtute hnenin a miat ngahhnak le Arabia kumpibawite le Israel ramkulh uktu bawite hnenin ngunkhuai langhnak ai hlaiah i.

¹⁶ Solomon in lum lian puipui zahnih bawn ai lum pakhat heh sui cuai nga thawn khuthnak i.

¹⁷ Ciahlaiah lum a cik deuh pawl za thum bawn ai lum pakhat heh sui cuai khat le a hrek thawn khut i. Hemi lumte tu Lebanon Tupui Khan tihnak a innkhan songah dah i.

¹⁸ Kumpibawi tohkham lianpui pakhat bawn ai vuiha le sui a pha ber pawl in khut liang i.

^19-20 Ciami tohkham vum a kaihnak ah kaipum paruk um ai kaipum pakhat ah chintit lim pakhat ṭen dah ai a veksen in chintit lim hlaihnih um i. Kumpibawi tohkham hnua lamah kawlpawcang lu lim um ai, tohkham vum kut dahhnak pahnih hmurah chintit lim pahnih, khat lamah pakhat veve in um i. Hebang tohkham heh aisu kumpibawi inkhai nai awng kel lo i.

²¹ Solomon ai hmanghnak khuat hmuahhmuah heh sui in bawn sio i. Lebanon Tupui Khan ai hmanghnak bel le hlengte khai sui ciang ai bawnhnak i. Ngun tu zaihnak ahkhai hmang lo, zaimantifangin Solomon san ahcen ngun heh a man nai loin ruathnak i.

²² Solomon in tifingriat ah a feh thai tangphawlawng khai tampui nai i, Hiram ai tangphawlawng burpui thawn feh tlang de i. Kum thum ah vel khat a burpui in tlung de ai sui, ngun, vuiha, le zawng tampui le a dang zawngte khai phur de i.

²³ Kumpibawi Solomon tu kumpibawi dang hmuahhmuah tahin lian deuh ai fim khai fim deuh i.

²⁴ Pathian ai pehnak fimhnak ling nuam in le ngai nuam in laivum khuahacang in mi tampui a hnenah kawi tlang de i.

²⁵ Kum khat hnua kum khat a hnenai a kawitute in lehsawng keng tlang de ai anite pehnak lehsawngte tu, sui le ngun ai bawnhnak thilri, angkifualte, ralthuamte, rimhmuite, siphuhte, le laakte i.

²⁶ Solomon in raltawnghnak siphuhleng thawng khat le za li nai ai siphuh tu thawng hlaihnih nai i. A hrek tu Jerusalem ah dah ai a hrek tu khua dang ah dah i.

²⁷ Solomon in ram a uk songah ngun tangka heh lungto zah in tam ai cedar thing tu Judah phairawn ai thaikung zah in tam i.

²⁸ A siphuhte tu Egypt le Cilicia in laihnak i. A minungte in a man a seh zah in Cilicia in lai de i.

²⁹ Egypt ramai raltawnghnak siphuhleng pakhat man tu ngun tangka zaruk i ai siphuh pakhat man tu ngun tangka za le sawmnga i. Solomon ai minungte in siphuh le raltawnghnak siphuhlengte heh Hit kumpibawi le Syria kumpibawi hnenah zuar salawn de i.