1 Sansiarnak 17 - Zanniat Bible

David Hnenah Nathan Thurelhnak

¹ Kumpibawi David tu a kumpibawi inn ah um i. Nikhat ah David in prophet Nathan ko ai, “Kai tu cedar thing ai sahnak inn ah um ing, ikhalselai Bawipa ai Thutiam Kuang tu ponhlam songah dah ising,” tiin ti i.

² Ciafangin Nathan in, “Pathian tu na hnenah um manin na thinlung ai umhnak heh bawn tu,” tiin ti i.

³ Ikhalselai ciami zan ah Bawipa in Nathan hnenah,

⁴ “Feh tulai i cengpa David hnenah, “I umhnak tuhin biakinn satu tuh heh nang ilo isi.

⁵ Israel mite Egypt ram an i hoisuak ai panin tun nia tian biakinn songah um awng lai lo ing; i umhnak tu ponhlam i ai hmun khat in hmun khat ah thawn ing.

⁶ Israel mite thawn i khualtlawnghnak hmuahhmuah ah i rilhnak amahte hotu aisu inkhai, zaimanin cedar thing in kaimah ca biakinn sa tlang lo i, tiin ti awng lo ing,’ ti i,” tiin ti tu.

⁷ “I cengpa David hnenah rel ta tulai Kaimah Cungnungber Bawipa in amah i rel nuamhnak tu, ‘Hampalak ah tuu na khalh hmun in na ko ai i minung Israel uktu tuhin na bawn ing.

⁸ Na fehhnak hmuncang ah na umpui ai na lampui ai na ral hmuahhmuah na neh sah sio ing. Laivum ai mi thupui ber tlukin na hmingthangruai tuh ing,

^9-10 Aisu inkhai nauneh thil lohnak tuhin amahte ca hmun ril ai i miphun Israel mite khiah cia hmunah umruai ing, Hemi ramah amahte a hleng sawng fangin mi siatsuah lek a nuamtute in tawng ṭiode i; ikhalselai tun hnuaah tu ciabang heh um tuh nawn lo ihang. Na ralte hmuahhmuah neh tuhin le tesinfate tampui nai tuhin thu na kham ing.

¹¹ Na thi nia khim ai na pupate hnenah phum na i fangin na fapate songin pakhat tu kumpibawi tuhin bawn tuh ing.

¹² Kaimah ca ani in biakinn sa tuhai a ukhnak tu kumzangza in khoruai tuh ing.

¹³ Kai tu a pa cang tuhai ani tu i fapa cang tuh i. Nangmah kumpibawi cangruai nuam in i hnawthnak teu Saul i zam bangin ani tu zam tuh lo ing.

¹⁴ I miphun le i ukhnak siktu le kiltu tuhin kumzangza in bawn tuh ing. A ukhnak tu bo tuh awng lo i,’ ti ta tu,” tiin ti i.

¹⁵ Pathian ai phuanghnak hmuahhmuah Nathan in David rel sio i.

David Anghnak Sawngen

¹⁶ Kumpibawi David tu Bawipa ai umhnak ponhlam ah feh ai a to hnuaah sawngen i: “Aw Bawipa Pathian, kaimah le i innsang ca na thil bawnhnak tepawl i ruat fangin i tlak hrimhrim lo i.

¹⁷ Ciahlaiah hemi tahin thil thupui deuh sawn kaimah ca tumtek ai i tesinfate hmai lam kum tampui hrang tianin thukham zo isi. Bawipa Pathian kai heh mi thupui ngai bangin i sik isi.

¹⁸ Hemi vumah kai incen ziang rel thil tuh nawn ing? Na cengfa kaimah heh i ling sio napui sikhaw hetlukin i cawisang lawmlam isi!

¹⁹ Hetluk thil kaimah ca na bawn le hmai lam i songlawihnakte na bawnhnak heh na daihhnak le na tumhnak awng hrimhrim ihang!

²⁰ Aw Bawipa, nangmah bangtu aisu khai um lo i; nangmah lek Pathian isi. Kinmah hrimhrim in ling zo i ing.

²¹ Saltanghnak in osuak ai na miphun ai na bawnhnak Israel mite bangtu aisu khai um lo i. Amahte ca khuaruahhar le ngaihsunurkul na bawnhnak manin laivum pumpuhluk ah na hmingthang sio i. Egypt ram an na minungte tu suakruai ai hmaiah a nor tlang fangin a dang miphunte heh hnawt sek isi.

²² Kumzangza hrang Israel tu na minung ah bawn zo ai, aw Bawipa, nang tu amahte Pathian cang zo isi.

²³ “Ciamanin Aw Bawipa, kaimah ca le i tesinfate ca thukham na bawnhnak khimruai tulai, bawn tuh ing na tihnak tu bawnsuak tu hram.

²⁴ Na hmingthang tuhai mi zongzong in, ‘Cungnungber Bawipa tu Israel vumah Pathian i,’ tiin kumzangza in ti tlang tuh i. Cen i ukhnak tu san tong tianin khoruai tuh isi.

²⁵ Na sal pa i hnenah heh na tumhnak phuang ai, ‘Na tesinfate tu kumpibawi cang tuh i,’ ti tian i rel zo manin hemi sawngenhnak heh na hnenah i hlengruai ngamhnak i.

²⁶ Aw Bawipa, nang tu Pathian isi ai hetluk ngaihsunurkul thukhamhnak heh i hnenah bawn zo isi.

²⁷ Na mithmai pha anite in a zomzet in i tesinfate tu hmuifu pe tu hram law, tiin ninghio na ngen ing. Bawipa nangmah in hmuifu pe zo isi; na hmuifu heh anite vumah kumzangza in um tu hram seh,” tiin ti i.