1 Sansiarnak 15 - Zanniat Bible

Thutiam Kuang Dah Hmun Thawn Tum I

¹ David in amah pumpak ca Jerusalem khuapui ah inn tampui sa i. Pathian ai Thutiam Kuang hrangah hmun pakhat zuah ai ciata ah ponhlam sa i.

² Cen David in, “Levi mite tu Thutiam Kuang phurtu tuhin le amah ai a kumzangza in a naruaihtu tuhin Pathian ai rilhnak imanin anite lekin Thutiam Kuang phur tlang tuh i,” tiin ti i.

³ Ponhlam a sahnak songah Thutiam Kuang dah tuhin Israel mite tu David in Jerusalem ah ko sio i.

⁴ Cia hnuaah Levi mite le Aaron ai tesinfate ko i.

⁵ Kohath hin Levi mite songin Uriel kawi ai a hinpui minungte za le kul hotu i.

⁶ Merari hin in Asaiah kawi ai a hinpui minungte zahnih le kul hotu i.

⁷ Gershom hin in Joel kawi ai a hinpui minung za le sawmthum hotu i.

⁸ Elizaphan hin in Shemaiah kawi ai a hinpui minung zahnih hotu i.

⁹ Hebron hin in Eliel kawi ai a hinpui minung sawmriat hotu i.

¹⁰ Uzziel hin in Amminadab kawi ai a hinpui minung za le hlaihnih hotu i.

¹¹ Cen David in suangbawi Zadok, Abiathar le Levi mite paruk Uriel, Asaiah, Joel, Shemaiah, Eliel le Amminadab khiah ko ai,

¹² anite hnenah, “Ning tu Levi hinte ai hotu isi. I saciahnak inn songah Bawipa, Israel Pathian ai Thutiam Kuang ning dah thil tuhin ningmah le ning Levi hinte tu cianghlim tu ih.

¹³ Hetihin Thutiam Kuang phurhnak ai ning tel heh a hmasaber ilo i; Bawipa thinkhing in kin bia lo manin Bawipa kin Pathian in kin cawh ina khaw,” tiin ti i.

¹⁴ Cen Bawipa, Israel Pathian ai Thutiam Kuang lang tuhin suangbawite le Levi mite tu cianghlim dun tlang i.

¹⁵ Levi mite in Thukham kuang heh amahte kodar ah lang in zawng tlang ai Bawipa in Moses hnenah thupeciahnak bangin bawn i.

¹⁶ David in Levi mi hotute hnenah a unau Levi mite tu la satu, congcing tumtu le dar tumcelte tumtu tiin khan tuhin thupe i.

^17-21 La satute songin Joel ai fapa Heman, a songkhat Berechiah ai fapa Asaph le Merari hinte in Kushaiah ai fapa Ethan tu dartumcel tumtu tuhin ril tlang i. Anite bawmtu tuhin a hnia lamai Levi mite tu congcing awfem tumtu tuhin ril tlang i: Zechariah, Jaaziel, Shemiramoth, Jehiel, Unni, Eliab, Maasaiah le Binaiah i. Cen congcing awpawr tumtu tuhin a hnia lamai Levi mite ril tlang i: Mattithiah, Elifelehu le Miknaiah, Azaziah le Biakinn kiltu Obed Edom le Jaiel i.

²² Levi mi awmawi tumtute hotu tuhin la thiamtu Chenaniah ril i;

²³ Thutiam Kuang kiltu tuhin Berechiah le Elkanah ril i.

²⁴ Thutiam Kuang hmaiah thirhlung hmuttu tuhin suangbawite Shebaniah, Joshaphat, Nethanel, Amasai, Zechariah, Binaiah le Eliezer ril i. Obed Edom le Jehiah khai Thutiam Kuang dahhnak dawngkham kiltu i ve i.

Jerusalem Ah Thutiam Kuang Thawn Tlang I

²⁵ David, Israel hotute le ralkap hotu ralbawite tu Thutiam Kuang lang tuhin Obed Edom inn ah feh tlang ai anghnak puai lianpui bawn i.

²⁶ Pathian ai bawmhnak Thutiam Kuang a phurtu Levi mite in co tuh rori in kawlpawcang lu sarih le tuu lu sarih ro in hibawlhnak sel i.

²⁷ David le awmawi tumtute, amahte la hoitu Chenaniah le Thutiam Kuang a phurtu Levi mite tu pon mawi le pon mankhung sil tlang i. Ciahlaiah David in suangbawi angki kangkhaih sil i.

²⁸ Ciatihin Israel mite hmuahhmuah in Thutiam Kuang hlun tlang ai au kongin thirhlung, tuuki, dartumcel le congcing tum kongin Jerusalem ah fehpui i.

²⁹ Thutiam Kuang tu khuapui song a lutpui fangin Saul ai fanu Michal in tukvirh in sik ai kumpibawi David dawk kongin lam khiah a hmu fangin hmuhheh ai nautat roh i.