1 Sansiarnak 14 - Zanniat Bible

Jerusalem Ah David Ai Permerhnak

¹ Tyre kumpibawi Hiram in David hnenah palai hlat ai kumpibawi inn sahnak caah cedar thingte, lung tat thiamte le zungthiamte khai kuat i.

² Bawipa in Israel kumpibawi tuhin i bawn zo ai amah ai minungte manin i ukhnak tu khangso i, ti khiah David in ling i.

³ Jerusalem khua ah David in nupui tampui hoi ai fapa le fanu a tampui nai i.

⁴ Jerusalem ai a naihnak a fapate ai hming tu: Shammua, Shobab, Nathan, Solomon,

⁵ Ibhar, Elishua, Elpelet,

⁶ Nogah, Nepheg, Japhia,

⁷ Elishama, Beeliada le Eliphelet i.

Filistin Ral Neh I

⁸ Filistin mite in Israel ram pumpuhluk vumah David tu kumpibawi cang zo i, ti a ling fangin amah pom tuhin a ralkapte thawn feh tlang i. Ciami heh David in a ling fangin Filistin raltawng tuhin suak i.

⁹ Filistin mite tu Rephaim phairawn hleng tlang ai cia dunghlun ai mite rok dekdo i.

¹⁰ Ciafangin David in Bawipa hnenah, “Filistin mite heh tawng tuh ing maw? Neh tuh ing maw?” tiin zawt i. Bawipa in, “Tawng tu, neh tuh isi,” ti i.

¹¹ Ciamanin David in Filistin mite tu Baal Perazim ah tawng ai neh i. Ciafangin David in, “Ralte neh tuhin Bawipa in tilian bangin i hmang i,” ti i. Ciamanin ciami hmun heh Baal Perazim tiin ko i.

¹² Ciata ah Filistin mite in a milimte khai zam tlang sek ai ciamite khiah mai in tai tuhin David in thupe ai tai sek i.

¹³ A rai hlanah phairawn ai umtute heh Filistin mite in rok tlang lala i.

¹⁴ David in Bawipa zawt lala ai Bawipa in, “Heta lam incen tawng mah; hel tulai balsam thaikungte umhnak hiangin tawng tu.

¹⁵ Ciami thaikung vuman mi vak thawm na za fangin tawng tu; zaimantifangin Filistin ralkap nehtu tuhin na hmaiah Kaimah feh tuh ing,” ti i.

¹⁶ David in Bawipa ai thupeciahnak bangin bawn ai Filistin ralte tu Gibeon in Gezer hleng tian hnawt sek i.

¹⁷ David ai hming tu khuahacang ah thang ai Bawipa manin miphun hmuahhmuah in ani tu kih tlang i.