1 Sansiarnak 13 - Zanniat Bible

Thutiam Kuang Kiriath Jearim In Thawn Tlang I

¹ David in ralkap thawng khat hotu le zakhat hotu ralbawite thawn taikhawm i.

² Cen ciata ai a kawitu Israel mite hnenah, “Ning lung ning khim ai Bawipa kin Pathian khai lungkhim lekhaw kin ramsong minungte, suangbawi le Levi mite hnenah mi hlat tuhai kinmah hnenah pumkhawm tuh ve in rel tuh ising.

³ Cen feh tlang tuhai Saul kumpibawi a cang lai ai a paitiarhnak Pathian ai Thutiam Kuang lang tuh ising,” tiin thuthan i.

⁴ A thu sawmhnak tu lungkhim tlang ai lung khai awi tlang ngai i.

⁵ Ciatihin David hnenah Israel mite tu hlang lamah Egypt ramri in le sak lamah Hamath Tlangkawn ai a ummi tianin kawi tlang i. Kiriath Jearim khuapui an Thutiam Kuang lang tuhin khawm sio i.

⁶ Cen David le Israel mite tu Judah ram Kiriath Jearim khuapui, (ihlahle Baalah khuapui tihnak) ah Cherubim vum, songlawihnak hmunai a totu Bawipa ai hming a kengtu Thutiam Kuang lang tuhin feh tlang i.

⁷ Abinadab inn a hleng fangin Thutiam Kuang tu lang ai kawlpawleng vumah dah i. Uzzah le Ahio in kawlpawleng heh khor kawm ai,

⁸ David le Israel mizapui tu Pathian thangphat in amahte tha naihtawp in lam murhmo i. La sa tlang ai congcing, khuang, dartumcel le thirhlung tum tlang i.

⁹ Khidon tihnak hmunai fangcilhnak pum a hleng fangin kawlpawcangte tu bah kawm ai Uzzah in do ngah ai Thutiam Kuang heh dom i.

¹⁰ Cia sawngpah in Bawipa tu Uzzah vumah a thinraw ai Thutiam Kuang a dai manin rek lio i. Ciata Bawipa ai hmaiah thi i.

¹¹ Ciatihin Uzzah vumah Bawipa a thinraw manin David tu a thin raw roh i. Ciamanin ciami hmun heh Perez Uzzah tiin a hming bawn i.

¹² Cen David tu Pathian kihzah ai, “Hemi Thutiam Kuang heh akontih in tun tu fehpui ngam tuh ing?” ti i.

¹³ Ciamanin David in Thutiam Kuang heh Jerusalem ah fehpui lo i. Gath khuami pa Obed Edom tihnak pa inn ah hlum i.

¹⁴ Ciata ah hla thum um ai Bawipa in a innsang le a naihnak hmuahhmuah khiah hmuifu pe i.