1 Sansiarnak 12 - Zanniat Bible

David Hluntu Benjamin Mite

¹ Israel kumpibawi Saul, Kish ai fapa in a mithmuh ah David um tuh loin a hnawt hnuaah David tu Ziklag ah um i. Ciata ah mi tampui a hnenah kawi ai um ve i. Anite tu raltawng bangmi le rinsantlak ngaingai ralkapte ciang i ai,

² Kumpibawi Saul bangin Benjamin miphunte i. Li le conkiang ituseh, lunghersep ituseh, a nuamnuam in kekeh le kiahhan in sai le sep thiam i.

³ Amahte hotute tu Gibeah in Shemaah ai fapate Ahiezer le Joash i. A ralkapte tu a hnia lamai bangin i: Azmaveth ai fapa Jeziel le Pelet, Anathoth in Berakah le Jehu,

⁴ Ralkap hmingthang le “Sawmthumte,” songai hotu pakhat, Gibeon in Ishmaiah, Gederah in Jeremiah, Jahaziel, Johanan, Jozabad;

⁵ Hariph in Eluzai, Jerimoth, Bealiah, Shemariah le Shephatiah;

⁶ Korah hin in Elkanah, Isshiah, Azarel, Joerzer le Jashobeam;

⁷ Gedor in Jeroham ai fapate Joelah le Zebadiah.

Gad Hin In David Hluntute

⁸ Nelrawn ai ving kulhnak hmunai David a um laiah Gad mi ralkap hmingthang pawl kawi tlang ai a hnenah um i. Anite tu raltawng bangmi i ai lum le fai hmanghnak lamah thiam tlang ngaingai i; amahte mithmai tu sik fangin chintit bangin a laukul i ai a zual rangdan heh mual vumai kiho bang i.

^9-13 anite lakah hotuber in nauta ber tian a sangsang in hemite i: Ezer, Obadiah, Eliab, Mishmanah, Jeremiah, Attai, Eliel, Johanan, Elzabad, Jeremiah le Makhbannai.

¹⁴ Hemi Gad mite a hrek tu ralbawi upa i ai ralkap thawng khat hotute i; a hrek tu ralbawi nauta deuh i ai zakhat hotute i.

¹⁵ Kum khat songai hla hmasaber hla, Jordan Runpui ti lian ai tilun laitak ah runpui ti tan tlang ai runpui in nisuah lamah ituseh, nitlak lamah ituseh, a ummi minungte tu suk le so ah hnawt sek i.

Benjamin Le Judah Mi David Hluntute

¹⁶ Nikhat ah Benjamin le Judah hin in minungte hrekkhat tu David umhnak vingkulh songah hleng tlang i.

¹⁷ David in hmuak ai anite hnenah,” Kaimah i bawm tuhin rualpui pha in hleng le i sikhaw i hnenah kawi tu ih. Ikhalselai i ralte hnenah zuar tum in hleng le i sikhaw, ning tuahmawh tuh heh tum awng lo napui ingkhaw, ning tumhnak heh kin pupa ai Pathian in ning hmu tuhai ning cawh tuh i,” tiin ti i.

¹⁸ Ciafangin, “Sawmthumte,” songah hotu a canglehtu Amasai vumah rauhla hleng ai ani in: “Aw David, na minung i ing; Aw Jesse ai fapa, nangmah lam ṭang i ing. Na vumah daphnak um tuseh, Na bawmtute hnenah hlamuanghnak um tuseh, Pathian na hnenah um i,” ti i. Cen David in anite khiah amah ai minung tuhin bawn ai a ralkap songah hotu tuhin dah i.

Manasseh Hin In David Hluntute

¹⁹ David le Filistin mite tu kumpibawi Saul tawng tuhin a feh lakah Manasseh hin songin ralkapte hrekkhat tu David hnenah kawi tlang i. David in Filistin mite bawm ilo i; a feh tlang hnuaah Filistin miukte in a bawipa awng Saul hnenah kin zuar pang fangin ti lau manin David heh Ziklag ah letruai i.

²⁰ Ziklag ah a let kong in Manasseh hin a hnenah a kawitu ralkapte tu: Adnah, Jozabad, Jediael, Michael, Jozabad, Elihu le Zillethai i. Manasseh ramai a um laiah ralkap thawng khat hotu ṭen i.

²¹ Ralkap hmingthang ngaingai imanin David ralkapte hotu bawi ah cang tlang i. Hnuata lamah tu Israel ralkap songah ralbawite i.

²² Nisiar in David hnenah minung kawi betbo ai a rai hlanah David ralkap tu tampui ai hat ngai i.

David Ai Ralkapte Cazin

²³ Bawipa ai thukhamhnak bangin David tu Saul tumrul in kumpibawi cangruai tuhin raltawng bangmi ralkap tampui heh Hebron ah David hnenah kawi diamdo i. A kawitute tu a hnia lamai bangin i:

²⁴ Judah hin in ralthuam a awh fekfek mi thawng ruk le za riat; lum le faipui awh ṭen;

²⁵ Simeon hin in raltawng zir cialep ralkap thawng sarih le zakhat;

²⁶ Levi hin in ralkap thawng li le zaruk;

²⁷ Aaron ai tesinfate hotu Jehoiada a hluntu ralkap thawng thum le za sarih;

²⁸ Raltawng thiam mino Zadok ai songkhat minung kul hluanhnih; anite tu hotu ciang i;

²⁹ Benjamin hin in ralkap thawng thum; Saul tu Benjamin hin imanin Benjamin mite tam sawn in cia nia tian Saul ṭan tlang i.

³⁰ Epharaim hin in, a hin songai ralkap hmingthang, thawng kul le za riat;

³¹ Nitlak lamai Manasseh in, David kumpibawi cang ruaitu tuhin rilhnakte, minung thawng hlairiat;

³² Issakhar hin in hotu zahnih le amahte kuthnia ai ralkap ṭen thawn; hemite tu Israel caah ziang bawn singlai pha ber tuh i ti le zaifangin bawn tuh ising, ti a lingtute i.

³³ Zebulun hin in raltawng hiam roh le rinsantlak, zaibang fai le vang khai a hmang thiamtu ralkap thawng sawmnga;

³⁴ Naphtali hin in lum le faipui thawn a thuamtu ralkap bawi thawng khat le ralkap thawng sawmthum le thawng sarih.

³⁵ Dan hin in raltawng zir cialep ralkap thawng kul hluanriat le zaruk;

³⁶ Asher hin in raltawng zir cialep ralkap thawng sawmli;

³⁷ Jordan Runpui ai nisuah lamai a umtu Reuben, Gad le Manasseh hinte in ralvang a phunphun hmang thiam ngai ai zirh cialep ralkap thawng za le thawng kul;

³⁸ Ralkap hezah heh raltawng tuhin ralring cialep ai Hebron ah feh tlang i; amahte tumhnak tu David khiah Israel kumpibawi cangruai tuh lek i. Israel mite dangdang khai ciabang tumtekhnak nai in um sio i.

³⁹ Ramsong minungte ai tawlrelciahnak ti le rong, ding le ai in ciata ah David thawn ni thum song um tlang i.

⁴⁰ Sak lam pui ai a ummi Issakhar, Zebulun le Naphtali hinte tianin laak, kalauk, siphuh le kawlpawte in sangvut, thaihmin ai bawnhnak sang em, cabit ro, cabitti le olive thaute phur bialbo i. Amahte aih tuhin kawlpaw le tuu khai keng tlang i. Hetihin a kenghnak bial heh amahte ram pumpuhluk in anghnak a naidan a larruaihnak i.