1 Sansiarnak 10 - Zanniat Bible

Kumpibawi Saul Thi I

¹ Filistin mite le Israel mite tu Gilboa Mual ah tawng dun i. Israel mite tampui thi ai a tangtute tu, kumpibawi Saul le a fapate thawn tlan sio i.

² Ikhalselai Filistin ralkapte in Saul le a fapate tu man ai a fapa Jonathan, Abinadab le Malkhishua heh rek tlang i.

³ Saul umhnak cingkim ahcen a roh cuangin tawng dun ai ciamanin Saul tu ralte in conkiang in kha ngah ai a roh ngai in ma liam i.

⁴ Ciafangin a ralthuam awhtu tlangval pa hnenah, “Na ralvang phok tulai i rek tu; ciahlahle he zarhtan lomi Filistin mite kawi ai a nuam bangin hngalsakhnak in i hmang tuh i,” ti i. Ikhalselai ciami tlangvalpa in a tihik in ti ngam lo i. Ciamanin Saul in a ralvang phok ai a zum lamin net ai thi i.

⁵ Saul a thi khiah tlangval pa in a hmu fangin a ralvang suah ve ai a zum lamin net ai thi ve i.

⁶ Ciatihin Saul le a fapate pathum tu hmunkhat ah thi tlang ai a ram ukhnak khai bo ve i.

⁷ Cen Jezreel phairawn ai a umtu Israel mite in a ralkapte tlan sio ai, Saul le a fapate khai thi i, ti a ling fangin amahte khua ṭen in suak tlang ai a suk le a so ah tlan sio i. Filistin mite kawi ai ciami khuate khiah khur tlang i.

⁸ A tawng dun thangha fangin a thi mite ai thilri lang tuhin Filistin mite feh tlang ai Saul le a fapate ai luang tu Gilboa Mual vumah a leu bial khiah hmu i.

⁹ Saul ai lu heh tan ai a ralthuamte hawk sah ai a lu le a fai le vangte phur in amahte khuavang le minungte hnenah thuthangpha phuang tuhin mi hlat i.

¹⁰ Saul ai fai le vang tu a khuavang biakinn ah dah i, a lu tu amahte khuavang Dagon ai biakinn ah tar i.

¹¹ Filistin mite in Saul vumah ciatihin a bawnhnak khiah Gilead ram Jabesh mite in a za fangin,

¹² mi ralpha ber pawl suak tlang ai Saul le a fapate luang heh Jabesh khua ah phur i. Ciata ai hlokhli kungpui hniaah a ruh heh phum ai ni sarih song rong ul tlang i.

¹³ Saul tu Bawipa vumah a sual manin thihhnak tawk i; Bawipa ai thupehnak hlun lo i; Bawipa thuzawt ai a daihhnak hlun sawn loin,

¹⁴ mipolte leng in mithi khai ko sawn i. Ciamanin Bawipa in rek ai a ukhnak heh Jesse ai fapa David hnenah pe i.