1 Samuel 31 - Zanniat Bible

Saul Le A Fapate Thi I

¹ Filistin mi le Israel mite tu Gilbon mual ah a roh ngai in tawng dun i. Ciata ah Israel mite tampui thi ai, a tanghnakte tu Saul le a fapate thawn tlan sio i.

² Filistin mite in Saul le a fapate khiah man ai a fapate Jonathan, Abinadab le Malkhishua heh rek berh i.

³ Ral luar amam ai Saul tu conkiang in ngah ai a roh ngai in maliam i.

⁴ Ciamanin Saul in a ralvang awhtu tlangval pa hnenah, “Hemi zarhtan lo Filistin mite hngalsakhnak menma in i hmang ai i rek tuhhnak tahin na ralvang phok tulai nangmah in i rek tu sawn hang,” tiin ti i. Ikhalselai tlangval pa in ngam lo i. Ciamanin Saul in a ralvang hmurzum vumah tlu ai thi i.

⁵ Saul thi heh tlangval pa in a hmu fangin ani khai a ralvang phok ai a hmurzum ah tlu in thi ve i.

⁶ Ciatihin Saul le a fapate pathum le tlangval pa tu hmun khat ah thi tlang i. Cia nia ah Saul ai minungte tu thi sio i.

⁷ Jezreel phairawn ralkhat ai a ummi le Jordan runpui nisuah lamai a ummi Israel mite in Israel ralkapte tlan sio ai Saul le a fapate khai thi sio i, ti a ling fangin a khuate heh zam ai tlan sio i. Cia hnuaah Filistin mite kawi ai cia khuate heh khur tlang i.

⁸ A tawng dun nia ai a thangha fangin a thi mite ai ralthuam lang tuhin Filistin mite kawi tlang ai Gilboa mual a hleng fangin Saul le a fapate pathum ai luang leu bial khiah hmu i.

⁹ Saul ai lu khiah a tan hnuaah a ralthuamte lang sek i. Cen ciami thuthang heh amahte milimte le mizapui hnenah rel tuhin Filistin khuahacang ah mi hlat diamdo i.

¹⁰ Cen Saul ai ralthuam tu Astartes khuazingnu bia hmun inn ah dah ai a luang tu Bethshan khuapui kulhhnak ving vumah tar i.

¹¹ Filistin mite in Saul luang vumah a bawndan heh Gilead ramai Jabesh khua mite in a ling fangin,

¹² amahte lakah ral pha ber pawl suak ai zankhuavar in Bethshan khua ah feh tlang i. Ving kulh vuman Saul le a fapate luang heh lang ai Jabesh khua ah zawng ai ciata ah mai in tai tlang i.

¹³ Cen a ruhte tu lang ai a khua song makeng kung hniaah phum ai ni sarih song rong ul tlang i.