1 Samuel 3 - Zanniat Bible

Samuel Hnenah Bawipa Lar I

¹ Cia can ah naupangpa Samuel tu Eli kuthnia Bawipa ai ruaihtu in um i. Bawipa ai ponkam tlawm deuhdeuh ai Bawipa ai larhnak khai um hang nawn lo i.

² Eli tu a mit mal ihang. Zankhat tu a ithmun khan ah mitmu ai,

³ Samuel khai Bawipa ai Thutiam Kuang dahhnak innkhan songah mitmu ve i. Varciang lai lo i, Bawipa ai maikhuat var lai i.

⁴ Samuel tu Bawipa in ko i. Samuel in, “Bawipa um hlen ing,” tiin ti i.

⁵ Eli hnenah dawp ai, “Kawi zo ing, zaiman i ko isi?” tiin ti i. Eli in, “Na ko lo ing, feh tulai it leh tu,” tiin ti i. Ciamanin Samuel khai it leh i.

⁶ Cen Bawipa in, “Samuel” tiin ko lala i. Samuel khai tho le Eli hnenah kawi ai, “Kawi zo ing, zaiman i ko isi?” tiin ti i. Eli in, “I fapa, na ko lo ing; feh tulai mitmu tu,” tiin ti i.

⁷ Samuel in Bawipa in i ko i, ti ling lo i; zaimantifangin Bawipa ai ponkam khiah Samuel hnenah phuang awng lai lo i.

⁸ Vel thum tian Bawipa in Samuel heh ko i. Samuel khai tho le Eli hnenah kawi lala ai, “Kawi zo ing, zaiman i ko isi?” tiin ti i. Ciafangin Samuel kotu heh Bawipa i, tiin Eli in ling ngah ai a hnenah,

⁹ “Feh tulai it leh tu; na ko lala lekhaw ‘Bawipa na rel nuamhnak rel tu; na aw na ngai hlen ing,” tiin ti tu. Ciatihin Samuel khai it leh i.

¹⁰ Bawipa tu kawi ai a hiangah ding i, “Samuel, Samuel,” tiin a hlanai bang thotho in ko i. Ciafangin Samuel in, “Bawipa, na rel nuamhnak rel tu na salpa in na aw na ngai hlen ing,” tiin ti i.

¹¹ Cen Bawipa in, “Israel mite vumah kihkul thil pakhat bawn tuhai ciami i bawnhnak a zatu hmuahhmuah in thin lau tlang tuh i.

¹² Cia nia fangin Eli ai songkhatte caah thusia i relhnak hmuahhmuah ponkam pakhat khai pelh loin khimruai tuh sio ing.

¹³ A fapate in thang i siatiar manin a songkhatte tu cawh tuh ing, tiin Eli heh rel cia zo ing. A fapate ai thilpha lo bawnhnak ling napui kham lo i.

¹⁴ Ciamanin zaibang hibawlhnak le thil a pehnak inkhai hetluk sual lian bawnhnak heh thianfai thil tuh nawn lo i, tiin Eli songkhatte hnenah fiang ngai in phuang ing,” tiin Samuel hnenah ti i.

¹⁵ Samuel tu khuavar tian mitmu i. Cia hnuaah tho ai biakinn dawngkhamte hong i. A hmuhnak le a zahnakte tu Eli hnenah rel ngam lo i.

¹⁶ Cen Eli in, “I fapa, Samuel,” tiin ko i. Samuel in, “Heta ah um ing,” tiin ti i.

¹⁷ Ciafangin Eli in, “Bawipa in ziang na rel pa? Zaikhai pheh malaw. I hnenah i rel sio hlahle sikhaw Pathian in a roh ngai in na cawh tuh i,” tiin ti i.

¹⁸ Ciamanin Samuel in rel sio i. A phehhnak pakhat khai um lo i. Cen Eli in, “Ani tu Bawipa i ai a mithmuh ah a pha ber a tihnak bawn tuseh,” tiin ti i.

¹⁹ Samuel tu khang betbo i. Bawipa a hnenah um ai a relhnak hmuahhmuah Bawipa in khimruai sio i.

²⁰ Ciamanin Israel mite hmuahhmuah in, amahte ramri ai a um mite tianin, Samuel tu Bawipa ai prophet i ti khiah ling tlang sio i.

²¹ Samuel hnenah a larhnak le a ponghnak hmun Shiloh ah Bawipa tu catloin lar ṭiode i. Cen Samuel a pong fangin Israel mite in ngai nuam tlang i.