1 Samuel 29 - Zanniat Bible

Filistin Mite In David Hnawl Tlang I

¹ Filistin mite in a ralkapte tu Aphek ah khawm tlang ai, Israel mite tu Jezreel Phairawn ai cirhti hiangah cam tlang i.

² Filistin miukte panga tu a ralkap zakhat rual le thawng khat rual pawl thawn hmai lamah feh tlang hluahhlo ai David le a ralkapte in hnua lamin Achish thawn hlun kawm i.

³ Filistin ralbawite in, “Hemi Hebrew mite tu heta ah ziang bawn ve i?” tiin zawt i. Ciafangin Akhish in, “Hemi pa tu Israel kumpibawi Saul ai ralbawi David i. I hnenah a umhnak rai thah ihang. I hnenah a hleng ai panin tunnia tian thilsual a bawnhnak zaikhai hmu lo ing,” tiin ti i.

⁴ Ikhalselai Filistin ralbawite tu thinraw ai Achish hnenah, “Hemi pa tu umhnak na pehnak khua ah letruai leh tu. Kin hnenah fehruai hrimhrim mah. Zaimantifangin ral kin tawng fangin kinmah siatsuahtu kinmah ai ral lam sawn ah cang pang tuh i. A bawipa thawn rem kawm leh tuhin kin ralkapte ai thihnak heh amah caah lampui pha ber i!

⁵ Thungai in, nupangte in lam kongin: ‘Saul in a thawng a sawm in rek i; David cenin a thawng a za in rek i,’ tiin la puahhnak tu amah David heh in!” tiin ti tlang i.

⁶ Achish in David khiah ko ai a hnenah, “A nungmi Bawipa ai hming sal in na rel ing: kaimah ca rinsantlak ngaingai isi ai i hnenah feh in tawng ve silai i daih i. I hnenah na hleng ai panin na mawhhnak hmu lai lo ing. Ikhalselai Filistin a dang miukte in na daih lo i.

⁷ Ciamanin dap niu in let tu; amahte thinraw tuhhnak zaikhai bawn malaw,” tiin ti i.

⁸ Ciafangin David in, “Ziang i sual i? Na hnenah hleng ai na i ruaih ai panin, bawipa, i mawhhnak zaikhai hmu lo isi. Zaimanin i bawipa le i kumpibawi nangmah thawn feh tuh ve lo ing? Zaimanin na ralte tawng loin let tuh ing?” tiin el dekdo i.

⁹ Akhish in, “David, nang tu Pathian ai vancungmi tlukin mifel isi ti na ling hlen ing. Ikhalselai Filistin ralbawite in amahte raltawnghnak ah feh maseh, na ti zo i.

¹⁰ Ciamanin Saul kumpibawi zam in i hnenai a kawimi hmuahhmuah ning veksen in thangha khua a var sawng fangin let tuh i si,” tiin ti i.

¹¹ Ciamanin David le a minungte tu Filistin ramah let tuhin a thangha zingniu in suak tlang i. Filistin ralkapte tu Jezreel lamah feh tlang i.