1 Samuel 28 - Zanniat Bible

¹ Can a rai deuh fangin Filistin mite in Israel tawng tuhin a ralkapte khawm diamdo i. Ciafangin David tu Achish in, “Nang le na ralkapte tu kin hnenah ṭang in Israel tawng tuh ilo i sim?” tiin zawt i.

² David in, “I, na sal pa ing ai i thilbawn bendan sik bang ngasi,” ti i. Ciafangin Achish in, “Pha i! A zomzet in kaimah kiltu ah na dah tuh ing,’ tiin ti i.

Saul In Tlahsanthiam leng I

³ Samuel tu thi zo ai Israel mite veksen in kah ai Ramah ah phum tlang i. Israel ram songin kutrin sikthiam le mipol hmuahhmuah heh Saul kumpibawi in hnawt sek i.

⁴ Filistin ralkapte tu khawm tlang ai Shunem khua hiangah cam tlang i. Israel ralkapte tu Saul in kokhawm ai Gilboa tlang vumah cam tlang i.

⁵ Saul in Filistin ralkapte a hmu fangin a thinlau i.

⁶ Ciamanin Saul in Bawipa thu zawt i. Ikhalselai Bawipa in mang in ituseh, Urim le Thummim sikhnak in ituseh, prophet in ituseh thu sawn hrimhrim lo i.

⁷ Ciafangin Saul in a kuthnia tlangsuakte heh, “Tlahsanthiam mipol nu pakhat i si sah tu ih,’ tiin thupe i. “Endor khua ah pakhat um i,” tiin ti i.

⁸ Ciamanin Saul in amah veve midang bangin um khel ai a hnikpon phundang sil in, a minungte pahnih thawn ciami nupang nu hnenah khuathim hnuaah feh tlang i. Cen Saul in, “Na khuavang i koh tulai hmai lamah ziang cang tuh i, ti i zawt sah tu. A hming i relhnak mithi pa i koh tu,” tiin ti i.

⁹ Ikhalselai nupang nu in, “Israel ram songin Saul kumpibawi in kutrin sikthiam le mipol hmuahhmuah hnawt sek i ti ling isi. Zaimanin mipol ing ti ling tu selai rek tuseh tiin thang i tawi isi?” tiin ti i.

¹⁰ Ciafangin Saul in thukhamhnak bawn ai, “A nungmi Bawipa ai hming sal in thu na kham ing: he mithi na ko manin na rek tuh hrimhrim lo i,” tiin ti i.

¹¹ Cen nupang nu in, “Aisu na koh tuh ing,” tiin zawt i. “Samuel ko tu,” tiin Saul in ti i.

¹² Nupang nu in Samuel a hmu fangin au dekdo i. “Zaimanin i zawl isi? Saul kumpibawi ibang si!” tiin ti i.

¹³ Ciafangin Saul in, “Lau mah. Ziang hmu isi?” tiin zawt i. Nupang nu in, “Lai songin mithi rauhla pakhat suak hmu ing,” ti i.

¹⁴ “A hmel zaibang pa?” tiin Saul in zawt i. “A suaktu heh patar ihang. Korfualpui sil i,” tiin nupang nu in ti i. Ciafangin Samuel i ti khiah Saul in ling ai upathnak in lai ah kun i.

¹⁵ Ciafangin Samuel in Saul hnenah, “Zaimanin i hnaihnok isi? Zaimanin i letruai isi? tiin zawt i. Saul in, “Van i sang ze i. Filistin mite in kin tawng ai Pathian in i zam zo i. I thuzawthnakte i sawn lo i. Prophet ituseh, mang in ituseh, i sawn hrimhrim lo i. Ciamanin ziang bawn tuh ing, ti i reltu tuhin na ko ing,” tiin ti i.

¹⁶ Ciafangin Samuel in, “Zaimanin Pathian in na zam zo hnuaah le na ral ai a cang hnuaah kai i ko na nuam lai i?

¹⁷ Bawipa in i hnenin na relhnak tu na vumah khimruai zo i. Na ukhnak ram tu na hnenin lang zo ai na aiawh ah David pe zo i.

¹⁸ Bawipa in a thupeciahnak hlun lo ai Amalech mite le amahte naih hmuahhmuah a veksen in siatsuah sek lo isi. Ciamanin Bawipa in hetihin na bawnhnak i.

¹⁹ Nangmah le Israel mite tu Bawipa in Filistin mite kut songah pe tuh i. Thangha ah nangmah le na fapate tu i hnenah kawi tlang tuh i si. Cen Israel ralkapte tu Bawipa in Filistin mite kut songah pe tuh sek i,” tiin ti i.

²⁰ Saul tu vaikhat pahin tlu ai laipua ah sawn i. Samuel ai relhnak tu lau ze lawmlam i. Sunnivui le zankhuavar zaikhai ai lo manin Saul tu a helhep in tha nai nawn lo i.

²¹ Mipol nu in Saul a tluhnak ah kawi ai a thinlau ze ti a hmu manin a hnenah, “Bawipa i nunhnak rin ruat loin na ruaihnak bawn ing.

²² Ciamanin tunin i ruaihnak bawn tu ve hang. Nangmah ca rong tlawmniu na bawt tuh ing. Ai tulai na lampui vakhnak ah tha nai tuh deuh isi,” tiin ti i.

²³ Saul in ai nuam lo i; “Zaikhai ai tuh lo ing,” ti i. Ikhalselai a kuthnia tlangsuakte inkhai ai tuhin ruai belbo ai hnuavai fangin amahte thu hlun leh i. Lai lakin tho ai khuahluan vumah to i.

²⁴ Ciafangin nupang nu in thau tuseh ti ai a cawmhnak kawlpaw niu lu khat rang ngai in ro i. Sangvut lang ai a hmet hnuaah col tello sang bawn i.

²⁵ Saul le a kuthnia tlangsuakte ai hmaiah rong koih sah hnuaah ai tlang i. Cen cia zan ah let tlang leh i.