1 Samuel 22 - Zanniat Bible

Suangbawite Rek Tlang I

¹ Gath khua an David tlan ai Adullam khua hiangai umhnak lungkhukua ah hleng i. Ciata ah um ti khiah a unaute le a songkhatte in a ling fangin a hnenah feh tlang i.

² Nauneh a tuarhnak le laiba a naimi le lungkhim lohnak a naimi hmuahhmuah khai a hnenah feh tlang ai ciamite hotu ah cang i. A veksen in minung za li dung i.

³ Cen David tu Moab ram, Mizpah khua ah feh ai Moab kumpibawi hnenah, “Pathian in kaimah ca a tumhnak fiang ngai in i ling hlanlo na hnenah i nu le i pa um thil hram selai tiin ninghio na ngen ing,” tiin ti i.

⁴ Ciamanin David in a nu le a pa tu Moab kumpibawi hnenah hlum ai lungkhukua ah a relh song hmuahhmuah Moab kumpibawi hnenah um kawm i.

⁵ Cen prophet Gad tu David hnenah kawi ai, “Hemi hmunah um nawn mahang. Rang ngai in Judah ramah feh tu,” tiin ti i. Ciamanin David tu Hereth tupui songah feh i.

⁶ Saul tu Gibeah khua ah um ai ni khat tu a faipui awh in tlang vumai makeng kung hniaah to i. A kuthnia tlangsuakte in kil tlang liang i. Cen David le a minungte umhnak ling i ing, tiin Saul hnenah rel tlang i.

⁷ Ciafangin Saul in a kuthnia tlangsuakte hnenah, “Benjamin mite i ngai tu ih! David in lo le cabit vuan kin pe tuhai a ralkap songah thawng khat hotu le zakhat hotu ralbawi ah kin bawn tuh sio i, tiin ruat i sim?

⁸ Ciamanin maw siatsuah tuhin i phiar tlang i si? i fapa rori David hnenah ṭang ai thukhamhnak a bawn heh aisu inkhai i rel lo i si. Aisu inkhai lung i siapui hrimhrim lo i si? I song suak i fa rori in a forh manin i minung David in tunin kaimah rekthilhnak can lek si i, tikhai aisu inkhai i rel awng lo i,” tiin cam dekdo i.

⁹ Saul ai kuthnia tlangsuakte hnenah Edom mi Doeg khai ding ve ai ani in, “Nob khua ai a ummi Ahitub ai fapa Ahimelech hnenah David a kawi hmu ing.

¹⁰ David ca Ahimelech in Bawipa hnenah sawnget ai rong khai pe in Filistin mi Goliath ai ralvang khai pe i,” tiin ti i.

¹¹ Ciafangin Saul kumpibawi in suangbawi Ahimelech le Nob khua ai a songkhat suangbawite hmuahhmuah ko ai a hnenah kawi tlang i.

¹² Cen Saul in, “Ahitub ai fapa Ahimelech i thurelhnak ngai tucuk,” tiin ti i. Ahimelech in, “Na ngai hlen ing, bawipa,” tiin ti i.

¹³ Cen Saul in, “Zaimanin David le nangmah in kaimah heh i engsan kawm ṭaiṭo i si? Zaimanin David tu rong le ralvang pe ai Pathian hnenah sawnget isi? Tunin David tu kaimah i ral ai i rek tuh can pha lek bawh ihang,” tiin ti i.

¹⁴ Ciafangin Ahimelech in, “Na kuthnia ai tlangsuak hmuahhmuah lakah David bangmi rinsantlak aisu um i. Na makpa rori i, nangmah na kiltu ralkapte ai bawi i; cen a kuthnia tlangsuak hmuahhmuah in upat sio i.

¹⁵ Amah ca saw kin ngethnak tu tun heh a hmasaber ian ilo i. Ikhalselai nangmah siatsuah tuhin engsanhnak thu ah kaimah ituseh, i songkhat ituseh kin hluk hrimhrim mah. Hemi thu tu samfang tia khai i linghnak um lo i,” tiin sawn i.

¹⁶ Ciafangin kumpibawi in, Ahimelech, “Nangmah le na songkhatte heh ning rek tuh sek ing,” tiin ti ai,

¹⁷ a hiangai a dingmi ralkapte hnenah, “Bawipa ai suangbawite heh rek tusek ih. David thawn i zuar ai David tlan zo i tikhai ling napui hlen in i rel nuam tlang lo i,” tiin thupe i. Ikhalselai Pathian ai suangbawite rek tuhin nuam lo manin ralkapte tu amahte kut peu khai mer tlang lo i.

¹⁸ Ciamanin Saul in Doeg hnenah, “Nangmah in suangbawite heh rek tusek,” tiin ruai ai, a ruaihnak bangin Doeg in rek berh i. Cia nia ah Pathian ai suangbawite sawmriat le panga rek i.

¹⁹ Ciahlaiah suangbawi khuapui Nob khua songai a ummi zongzong khai rek tuh sek in Saul in thupe manin pasal ituseh, nupang ituseh, naupang ituseh, nau te sawng ituseh, kawlpaw, laak, tuute tianin rek berh i.

²⁰ Ikhalselai Ahimelech ai fapa Abiathar tihnak pa tu luat ai David hnenah tlan i.

²¹ Pathian ai suangbawite tu Saul in rek berh i, tiin David hnenah rel i.

²² Ciafangin David in, “Nikhat ai Doeg i hmu fangin Saul rel tuh tengteng i, tiin um cia zo ing. Ciamanin Abithar, na songkhatte thihnak heh kaimah manin i.

²³ I hnenah um tulai na thinlau mah. Nangmah le kaimah rek tuh heh Saul ai a daihhnak ber i. Ikhalselai i hnenah tu na him tuh i,” tiin Abithar hnenah ti i.