1 Samuel 21 - Zanniat BibleDavid Tlan I 1 David tu Nob khua suangbawi Ahimelech hnenah feh aiAhimelech in thinlau ngai in hmuak i; “Zaimanin nangmah lek kawi isi?” Aisu tal in na hlun lo im?” ti i. 2 Ciafangin David in, “Kumpibawi in naper i ruai manin kawi ing. Cia i ruaihnak thu tu aisu khai rel tuh loin i tiam fawn i. I ralkapte tu hmun khatkhat ah i tawk tuhin tiam dun i ing. 3 Cen ai tuh ziang nai isi? Sang zawl nga ihlahle na naihnak hmuahhmuah i pe tu,” tiin ngen i. 4 Cen Suangbawi in, “Sang menma pawl nai lo ing. I naihnak tu sang cianghlim i. Na ralkapte in tun dungso ah nupang thawn pawl dun hlah lekhaw ai thil tuh i si,” tiin ti i. 5 Ciafangin David in, “Nupang thawn pawl dun tlang hrimhrim lo i. Nupang hrimhrim kin hnenah um lo i. Thupui um hang lo ai khual kin tlawng inrin i ralkapte tu, a thilthuamte thawn, a cianghlim ngai in um tlang de i. Tun tu a hlaice in a thupui naper kin nai manin a hlaice in cianghlim tlang i,” tiin ti i. 6 Ciamanin suangbawi Ahimelech in David heh sang cianghlim pe i, zaimantifangin a naihnak sang heh Pathian caah selhnak sang lek i ai Cabuai cianghlim in a lang zohnak, a tumrul in sang thar khai a dah leh zohnak sang i. 7 Cen Edom mi Doeg tu Pathian bia tuhin ciata ah um ve ngelcel i. Doeg tu Saul kumpibawi ai tuukhalte hotu i. 8 David in Ahimelech hnenah, “I pe tuhin fai ihlahle vang tal nai lo isim? Kumpibawi in a rang ngai in i ruai manin ralvang zaikhai lang man lo ing,” tiin ti i. 9 Ciafangin Ahimelech in, “Elah rawn zawllai ai na rek awnghnak Goliath ai ralvang nai ing. Suangbawi kangbet angki ber ah pon in tuam ai um hlen i. Ciateng ah ciami ralvang lek um i. Na daih le lang tu,” tiin ti i. David in, “I pe tu. Akonah khai hebang ralvang um lo i,” tiin ti i. 10 Cen David khai feh leh i. Saul hmun an tlan ai Gath ram kumpibawi Achish hnenah hleng i. 11 Gath ramai tlangsuakte in amahte kumpibawi Achish hnenah, “Hemi pa tu amah ramai kumpibawi David ilo im? ‘Saul in a thawng a sawm in rek ai David cenin a thawng a za in rek i,’ tiin nupangte lam kongin la ai cuanhnak pa heh amah i,” tiin ti tlang i. 12 Amahte ponghnak heh David in za sio ai ciamanin Gath kumpibawi Achish khiah David in kih ngai i. 13 Ciamanin amahte veksen hmaiah mivoi bangin um khel i. Amahte hmaiah a umdan lamdang khel ai a khua ai kotka vum ahkhai thudon puipui ngan ai, a cil khai a khahmul vumah luangruai tliatlo i. 14 Ciamanin Achish in a kuthnia ai tlangsuakte hnenah, “Hemi pa tu a voi ilo im. Zaimanin i hnenah koih i si? 15 Mivoi i hlawhsam tuhin i ruat i sim? I innsong hnaihnoktu tuhin zaimanin he mivoipa koih tlang i si?” tiin ti i. |
Zanniat Bible © Bible Society of Myanmar, 2018.
Bible Society of Myanmar