1 Samuel 17 - Zanniat Bible

Goliath In Israel Mite Ngiar I

¹ Filistin mite tu raltawng tuhin ko dun ai Judah ram Socoh khua ah khawm tlang i. Cen Socoh le Azekah karlak ai a umhnak Ephes Dammim tihnak hmunah zancam tlang i.

² Saul le Israel mite tu kokhawm dun ai Filistin mite tawng tuhin ralring ai Elah Zawllai ah zancam tlang i.

³ Filistin mite tu mual pakhat vumah ṭang tlang ai Israel mite inkhai mual pakhat vumah ṭang tlang ve i. A karlak ah phairawn um i.

⁴ Gath khuami Goliath tihnak pa tu Filistin mite umhnak an Israel mite ngiar tuhin suak i. Goliath tu dong ruk le khap khat sang i.

⁵ Dar lukhuk a khuhnak le ralthuam a silhnak pawl tu cuai sawmli le cuai ruk tluk rit i.

⁶ A kete khai darphaw in tuam sio ai dar ai bawnhnak faipui heh a kodar ah suan i.

⁷ A faipui tu a vang lam thiamvang tia i ai a faipui lu tu cuai nga zolo rit i. A lum phursahtu ralkap pakhat a hmaiah feh i.

⁸ Goliath tu a ding kongin Israel mite heh, “Saul ai salrual pawl, raltawng tuhin suak i sim? Kai tu Filistin mi ing ai kaimah i tawng tuhin ningmah lakah pakhat ril tu ih.

⁹ I neh ai i rek lekhaw ning sal ah kin cang tuh i; ikhalselai kai in ning neh ai rek lengkhaw kin sal ah ning cang tuh i.

¹⁰ Tun rori in Israel ralkapte ning zuam ing. I tawng tuhin ningmah lakai pakhat ril tu ilai suak tuseh,” tiin au dekdo i.

¹¹ Ciami heh Saul le ralkapte in a za fangin lungsia ai thinlau tlang i.

Saul Cam hmun Ah David Hleng I

¹² David tu Judah ram Bethlehem khua ai Epharath mi Jesse ai fapa i. Jesse in fapate pariat nai ai Saul kumpibawi a cang fangin Jesse tu tar zo ihang.

¹³ A fapa upate pathum tu raltawnghnak ah Saul hnenah feh ve i. A upa ber tu Eliab i. A sangtu tu Abinadab i ai a pathumhnak tu Shammah i.

¹⁴ David tu a nauta ber i. A ute pathum Saul hnenah a tel lai in,

¹⁵ David tu a cancan ah Bethlehem ah tlung de ai a pa tuute khal de i.

¹⁶ Cen Israel mite tu Goliath in tawng dun tuhin zingsiar zansiar in ni sawm li song ngiar ṭiode i.

¹⁷ Vaikhat ah David tu a pa Jesse in, “Nimden theu bawm khat le sangzawl hra phur tulai ralkapte riahbuk ah na ute ken ta tu.

¹⁸ Cen a hnawi khal hlom hra in keng tulai ralkap hotu ralbawipa pe tu. Na ute cak le cak lo sik tulai, cak i ti lingthilhnak tuhin a thil pakhatkhat tlun tu.

¹⁹ Saul kumpibawi le na ute le Israel ralkapte tu Filistin raltawng ai Elah Zawllai ah um tlang i,” tiin ti i.

²⁰ Ciamanin David tu a thangha zingniu in tho ai tuute khaltu tuhin mi pakhat a tumrul ah dah ta ai a pa Jesse ai ruaihnak bangin aih tuh rongte kengin feh i. Israel ralkapte tu Filistin raltawng tuhin au kongin raltawnghnak hmunah a feh diamdo laitak ah David tu ralkapte riahbuk ah hleng i.

²¹ Filistin ralkapte le Israel ralkapte tu tawng dun tuhin ralring cialep veve ai hmaiton in um tlang i.

²² Ciafangin David in rong lamai ṭuanvo langtu ralbawi hnenah a rong kenghnak hlum ai raltawng hmunah dawp ai a ute cak maw cak tlang lo ti sik i.

²³ A ute thawn a pon dun hnelhno laitak ah Goliath tu hmaiah suak ai a hlanai a ti dehnak bangin Israel ralkapte heh ngiar lala i. Ciami heh David in za i.

²⁴ Goliath tu Israel ralkapte in a hmu fangin lau ai tlan sio i.

²⁵ Pakhat le pakhat, “Sik tu ih, khia pa hlaihlawr heh! A mi ngiardan ngai tu ih! Khia pa a rek bentu heh kin kumpibawi in milian ah bawn tuh rori i; a fanu hoiruai tuhai a pa songkhatte tu siahkhon luatruai tuh i,” tiin ti dun tlang i.

²⁶ Ciafangin David in a hiangai umtute hnenah, “Hemi Filistin pa a rektu le hebang zakthi phurhnak in Israel mite a luatruaitu in ziang ngah tuh i. Thungai in ti fangin, a nungmi Pathian ai ralkapte a zuamtu tuhin he Pathian sang lo Filistin pa tu ziang ce i,” tiin ti i.

²⁷ Cen Goliath a rektu khiah lehsawng tampui ngah tuh i, tiin rel tlang i.

²⁸ Ciatihin David le ralkapte a pon dun hnelhno khiah David ai u Eliab in a za fangin a thinraw ai, “Heta ah ziang bawn isi? Hampalak ai na tuute aisu in na khalh i? Nang mi pawlok pa! Raltawng tuh sik in kawi ibang si!” tiin hau i.

²⁹ David in, “Ziang sualhnak bawn ing? Thu tal mi zawt thil tuh lo ing maw?” ti i.

³⁰ Cen hmundang ah hoi ai midang hnenah thu zawt lala i. Thu a zawthnak hmuahhmuah in amahte sawndan bang tlang sio i.

³¹ Mi hrekkhat in David ponghnak a za fangin Saul hnenah rel tlang i. Cen Saul in David heh ko i.

³² Ciafangin David in Saul hnenah, “Aw kumpibawi pa, he Filistin pa heh aisu inkhai lau tuhhnak ilo i. Kaimah in tawng tuh ing,” tiin ti i.

³³ Saul in, “I lo i, akontih in tawng ben tuh isi? Nang tu naupang isi ai ani tu a san song hmuahhmuah ralkap i,” ti i.

³⁴ Ikhalselai David in, “Aw kumpibawi kai tu i pa ai tuu khal de ing. Chintit ihlahle vom in i tuuniute a tlanpui fangin,

³⁵ sahrang heh hnawh in tawng dekdo ai tuuniute hupsuak de ing. Cen chintit ihlahle vom in i bot fangin, a tukkhum hmul in pom ai vit le thi de i.

³⁶ Chintit le vom tampui rek ngah zo ai ciamite i rek bangin he Pathian sang lo Filistin pa, a nungmi Pathian ai ralkapte a ngiartu heh rek tuh ve ing.

³⁷ Chintit le savomte hnenin i huptu Bawipa in he Filistin pa kut song inkhai i hup tuh i,” tiin ti i. Ciafangin Saul in, “Pha i, feh ta tulai Bawipa Pathian in na bawm tuseh,” tiin ti i.

³⁸ Cen Saul in a ralthuam heh David in sil tuhin pe i. David heh a lu ah dar lukhuk khuruai ai a ralthuam silruai i.

³⁹ David in a silhnak ralthuam vumah Saul ai ralvang pai in feh tum i. Ikhalselai a sil awng lohnak imanin vakpui ben lo i. Ciafangin David in, “Hebang thawn tu tawng ben tuh lo ing. I silawnghnak ilo i,” tiin Saul hnenah ti i. Ciamanin hawk sek i.

⁴⁰ A tuu khalhnak fungkek awh in runti kam ai lungto pum cikniu panga khul ai a dip ah thun i. Ciatihin a lunghersep thawn Goliath tawng tuhin feh i.

David In Goliath Neh I

⁴¹ Filistin mi Goliath in David lamah nong i. A raltawnghnak lum a phurtu pa tu a hmaiah fehruai i. Nong deuhdeuh i.

⁴² Phaniu in David a hmuthilhnak hmun an a sik fangin, David tu mipiang tlangval dawnniu ngawn ilo im tiin nautat i.

⁴³ Ciafangin David hnenah, “Cia fungkek tu zaihnak tuhin awh isi? Uico i vuah isim? tiin au ai amah ai khuavang hming ko in David heh cukcam dekdo i.

⁴⁴ David heh ngiar ai, “Kawi tucuk, na sa tu vaniu le ramsate airuai tuh ing,” tiin ti i.

⁴⁵ Ciafangin David in, “Nang cenin vang le fai le thal keng in i tawng tum isi. Ikhalselai kai incen na zuamhnak Israel mite ai Pathian Hmualnaiber Bawipa hming in na tawng tuhin kawi ing.

⁴⁶ Tunnia rori ah Bawipa thawmin nangmah heh i kut songah na hleng tuh i, na neh tuh ing. Na lu na tan tuh ing. Filistin ralkapte sa tu vaniu le ramsate aih tuhin pe tuh ing. Israel in Pathian nai i, ti khiah he ram mi zongzong in ling tuh i.

⁴⁷ Pathian in amah minungte o tuhin vang le faite kulruai lo i, ti khiah mi zongzong in hmu tuh ihang. Bawipa tu ralnehtu i ai ningmah khai heh ning veksen in kin kut songah ning hlengruai tuh i,” tiin ti i.

⁴⁸ Cen Goliath in David heh nong amam ai David in amah tawng tuhin Filistin mite hnen lamah rang ngai in dawp ve i.

⁴⁹ David in a dip song pur ai lungto pum niu a lang hnuaah lunghersep in Goliath khiah sep i. Goliath calpang ah kha ai a luruh khoi i. Ciamanin Goliath tu bokkhup in sawn i.

⁵⁰ Ciatihin ralvang hmang loniu in David in Goliath heh lunghersep le lungto in neh i.

⁵¹ David tu dawp ai Goliath vumah ding i. Cen Goliath ai ralvang heh a kawng songin phok ai a hawng tan ai Goliath tu thi i. Filistin ralkapte tu a mi thahat ber pa thi hmu fangin tlan tlang sio i.

⁵² Cen Israel le Judah ram an a kawitu ralkapte in cia sawngpah in hnawh ai au kongin Gath le Ekron kotka tian hnawh tlang i. Filistin ralkapte luang tu Gath le Ekron tian Shaaraim lampui ah leu linglung i.

⁵³ Cia hnuaah Israel ralkapte tu let ai Filistin ralkapte riahbuk ai thilri lang sek i.

⁵⁴ David in Goliath lu heh lang ai Jerusalem ah phur i. Ikhalselai Goliath ralthuamte tu amah buk songah dah i.

David In Saul Tawk I

⁵⁵ Goliath tawng tuhin David a feh khiah Saul in a hmu fangin a ralkap hotu ralbawipa Abner ko ai, “Khia naupang pa tu aisu i? tiin zawt i. Abner in, “Aw kumpibawi pa, aisu i ti ling lo ing,” tiin sawn i.

⁵⁶ “Feh ta tulai aisu ai fapa i ti hliah ta tu,” tiin Saul in ti i.

⁵⁷ Cen Goliath a rek hnua a riahbuk ah David a hleng fangin, David tu Abner in Saul hnenah fehpui i. David in Goliath lu heh awh hlen lai i.

⁵⁸ Ciafangin Saul in, “Tlangval pa, aisu isi? tiin zawt i. Cen David in, “Bethlehem khuami na sal pa Jesse ai fapa ing,” tiin ti i.