1 Samuel 10 - Zanniat Bible

Saul Tu Samuel In Thau Pawh I

¹ Cen Samuel in Olive thau palang pakhat lang ai Saul lu vumah burh ai Saul heh a thut hnuaah, “Bawipa in a miphun Israel mite uktu tuhin Nangmah heh thau na pawh i. A minungte uk tuhai amahte ral kut songin luatruai tuh isi. A minungte uk tuhin na ril zo ihang, ti lingthilhnak tu hetihin i tuh i:

² Tunnia kin khek sawng fangin Benjamin ram songai um Zelzah khua ai Rachel hlan hiangah mite pahnih tawk tuh isi. Ning sihnak thliahthlo laakte tu hmu tlang zo ai na pa tu laak hrangah a thin poi nawn loin ningmah caah thin poi ai, ‘I fapa caah ziang bawn tuh ing?’ tun le tun mi zawt leklo i, tiin na rel tuh i.

³ Ciata in feh bet tuhai Tabor tihnak hmunah cianghlim thingkung na hleng fangin Bethel khua ah Bawipa hnenah sazarh pe tuhin a fehtu pasalpuite pathum tawk tuh isi. Pakhat pa in me faniute lu thum hoi tuhai, pahnihhnak pa in sangzawl thum keng tuh i. A pathumhnak pa incen savun thawl khat in cabitti keng tuh i.

⁴ Nangmah heh hnuk na sat tlang tuhai sangzawl hnih na pe tuh i. Ciami heh lang tu.

⁵ Cen Filistin ralkapte ai riahbuk Gibeah khua ai umhnak Pathian Tlang ah feh tu. Khua song luthnak khuahnar ah, tlang vum puleng in prophet burpui, congcing le khuang, titilu le sengserelte tum kongin a tlung lianglo tawk tuh isi. Anite tu prophet pon in pong tuh murhmo ai lam kong au kong tuh murhmo i.

⁶ Cen Pathian rauhla in na pom tuh ve i; anite bangin prophet pon in pong tuh ve isi; lam kong au kong in um tuh ve ai mi phundang pui na cang tuh i.

⁷ Ciatihin na vumah a khim sio fangin Pathian in na hoihnak bangin bawn tu.

⁸ I hlanah Gilgal ah feh cia tu. Ciata ah na tawk tuh ing, maitai hibawlhnak le rualrem hibawlhnakte khai Pathian hnenah sel tuh ing. I hleng hlanlo ni sarih song i iang tulai cia hnuaah na bawn tuhhnak na rel tuh ing,” tiin Samuel in ti i.

⁹ Samuel tu feh tuhin a her laitak ah Pathian in Saul khiah thinlung thar pe i. Samuel ai relhnak hmuahhmuah heh cia nia ah khim sio i.

¹⁰ Saul le a hnenum pa tu Gibeah ah a hleng kawm fangin prophette in tawk tlang i. Pathian ai rauhla in Saul khiah pom lio ai prophette bangin prophet pon in pong ai lam kong in au kong ve dekdo i.

¹¹ A hlanai a lingtute in Saul khai ciatihin a um khiah a hmu tlang fangin, “Kish ai fapa heh ziang cang lio ipa? Saul khai prophet cang zo i awm? tiin pakhat le pakhat ti dun i.

¹² Cia khua ai a ummi pasalpui pakhat in, “Midang prophette tang a pate prophet cia ṭen im? tiin ti i. Ciatihin, “Saul khai prophet cang zo im? ti khiah ponghnak ah hmang tlang de i.

¹³ Saul tu prophette bangin a lam a au ben fangin tlang vumai puleng ah feh i.

¹⁴ A pakhatta in Saul le a hnenum pa heh, “Kon kawi kawm i si?” tiin zawt i, Ciafangin Saul in, “Kin laakte si i ing, hmu kawm lo manin Samuel hnenah zawt kawm i ing,” tiin ti i.

¹⁵ “Samuel in ziang na rel i?” tiin a pakhatta in zawt lala i.

¹⁶ “Laakte tu hmu leh zo ihang tiin i rel i,” tiin ti i. Kumpibawi na cang tuh i ti ai Samuel ai relhnak tepawl tu a pakhatta hnenah rel lo i.

Saul Tu Kumpibawi Cangruai I

¹⁷ Israel mite tu Mizpah ah, Bawipa hnenah, Samuel in kokhawm tlang i.

¹⁸ Samuel in anite hnenah, “Bawipa, Israel ai Pathian in, ‘Egypt ram an ning suakruai ai Egypt mite le ning naunehtute ai kut songin ning luatruai ing.

¹⁹ Kai tu ning harsahnak le ning rimsuhnak songin ning otu ning Pathian ing. Ikhalselai tunnia ah kai tu i hnawl tlang ai kumpibawi i ngen tlang i si. Ciamanin ning phun ṭen le ning hin ṭen in i hmaiah ding tu ih,” tiin rel i.

²⁰ Cen amahte phunnam ṭen in phunkhat hnua phunkhat Samuel in hmai lamah suakruai ai Bawipa in Benjamin phun ril i.

²¹ Cen Benjamin phun songin hinkhat hnua hinkhat Samuel in a dingruai fangin Matri ai hin heh Bawipa in ril i. Cen Matri hin tu amahte mipum in hmai lamah a suak tlang fangin Kish ai fapa Saul ril i. Ikhalselai Saul khiah si napui hmu tlang lo i.

²² “Midang ril tuh um aw im?” tiin Bawipa heh zawt tlang i. Ciafangin Bawipa in, “Khiata ah Saul um hlen i; thilri lakah relh i,” ti i.

²³ Ciamanin dawp tlang ai Saul khiah misenpui hmaiah suah tlang i. Midang lakah a ding fangin midang tahin pi khat sang deuh i.

²⁴ Ciafangin Samuel in, “Bawipa ai rilhnak tu he pa ihang. Kinmah lakah amah bangtu aisu khai um tlang lo ising,” tiin ti i. Ciafangin mi zongzong in, “Kumpibawi a san sau tuseh!” tiin au tlang thlurhthlo i.

²⁵ Kumpibawi a covo le ṭuanvote tu Israel mite hnenah Samuel in fel ngai in relfiang ai laihnahzual songah a ngan hnuaah ciami laihnahzual heh hmun thianghlim ah dah i. Cia hnuaah mizapui tu amahte inn ṭen ah tlungruai i.

²⁶ Saul khai Gibeah ah a inn ah tlung ve i. Pathian ai thinkhing cia mithahat le mi ralpha ngai hrekkhatte in Saul khiah a inn ah hlun tlang i.

²⁷ Ikhalselai milovang hrekkhatte in, “Hemi pa in akontih in kin ca thilpha bawn ben ni im,” tiin ti tlang i. Saul tu nautat ai lehsawng khai pe nuam tlang lo i.