1 Piter 3 - Zanniat Bible

Nupui Le Pasal Thu

¹ Ciabang thotho in nupuite, ning pasalte thu ngai tu ih; ciatihin bawn le i sikhaw Pathian thu a sang lotu ning pasal pakhatkhat um lekhaw ning ziaza phathnak in sangtu ah cangruai tuh i. Kam khat khai pong kul tuh lo i si,

² zaimantifangin, thianghlim le upathnak nai ai ning nung khiah hmu tuh i.

³ Pualam mawihnak: ning sam bawndan, ning hlawnthil sui le ngun thawn ning thuam dan le ning hnikpon sildan in mawihnak si mah ih.

⁴ Pathian ai mithmuh ah a songlawi ber mawihnak taktak heh ning thinlung songai a ummi a tar thil lo thinnemhnak le thindaphnak sawn i.

⁵ Pathian a kihzahtu khuahlan nupang, Pathian ah umlamhnak a naitute ai mawihnak tu amahte pasal thu ngaihnak ah um i.

⁶ Sarah heh ciabang awng i. Abraham upat ai, “I bawipa,” tiin ko i. Ningte khai thil pha bawn ai lauhnak zaikhai nai loin um le i sikhaw Sarah ai fanute i si.

⁷ Ciabang thotho in pasalte, ning nupui thawn ning um kawm fangin a tha nau deuhmi i tiin lingthiam tu ilai upat tu ih, zaimantifangin ningmah thawn hmunkhat ah Pathian ai pehnak nunhnak lehsawng ro co tuh ve i. Ning sawngenhnak tu zai inkhai hnaihnok thil tuh loin ciatih bangin bawn tu ih.

Dikcanghnak Manin Tuarhnak

⁸ A tawphnak ah i forh hiamhnak tu: ruathnak khat le thinlung khat in um tu ih; unau bangin pakhat le pakhat it dun tu ilai ninghiohnak nai in thinlung nem in um tu ih.

⁹ Phat lohnak heh phatlohnak in rulthun mah ih, cukcamhnak khai cukcamhnak in rul mah ih; hmuifu pe in rul tu sawn ih. Zaimantifangin Pathian in ning ko fangin hmuifu petu tuhin ning ko i.

¹⁰ Lai Thianghlim songah, “Nunnuam hiam ai can pha a daihtu in pong sia ai pong sup tu selai thudonrel nawn maseh.

¹¹ “A pha lo heh zam tu selai a pha bawn tuseh. A thinlung veksen in daphnak hrangah per tuseh.

¹² Zaimantifangin Bawipa in midikcangte heh kilkhawl ai amahte sawngenhnak ngai sah i. Ikhalselai phatlohnak a bawntu heh engsan i,” tiin ti i.

¹³ Phathnak bawn hiamtu ile i sikhaw aisu in harsahnak ning pe tuh i?

¹⁴ A phami bawn manin harsahnak tawk khal silai zaitlukin mihmuifu isi! Zaikhai lau mah; na don khai har mah.

¹⁵ Ning thinlung in Khrih upat tu ih. Ning thinlung songai ning pomhnak ning umlamhnak heh ning zawttu pakhatkhat um lekhaw amahte thu zawthnak sawn thil tuhin ralring cialep in um tu ih.

¹⁶ Amahte thu zawthnak ning sawn fangin thinnem le upathnak thawn sawn tu ih; ciatihin bawn le i sikhaw Khrih hluntu ning i bangin ning ziaza pha heh mi in ning sawi inrin ziaza pha i ti mi in hmu tuhai amahte lehlam zakthi tuh i.

¹⁷ Phat lohnak bawn manin harsahnak tuar tahin Pathian lungkhimhnak um lekhaw phathnak bawn manin harsahnak tuar pha sawn i.

¹⁸ Zaimantifangin Khrih tu minung sualhnak manin kumzangza hrangah thi i; ningmah Pathian hnenah fehpui tuhin mipha pa heh misualte caah thi i. A taksa in thihhnak tuar i, ikhalselai rauhla in nungruai leh i.

¹⁹ Ciatihin rauhla in nung leh manin rauhla thawngto mite hnenah feh ai thu rel i.

²⁰ Hetih ai thu a relhnak rauhlate tu Noah in lawng a bawn awng laiah Pathian in thinsau in iang napui a thu ngai nuam tlang lo i. Lawng songai a luttu mi tlawmniu, a veksen in mi pariat ian i; anite tu ti songin osuak mite i.

²¹ Ciami tu tunai ning otu baptisma heh a sawhhmuhtu i. Hemi tu ning takrim somcianghnak tuh ilo i, a hnawm a pha thiahnak thinlung thiang thawn Pathian hnenah thukhamhnak bawn sawn i si. Ciami baptisma heh Jesuh Khrih a tholehhnak thawmin nunohnak a hlenpuitu i.

²² Amah tu vancung ah kai ai Pathian kiahhan lamah um ai vancungmi hmuahhmuah le van ai thunaihnak le huham hmuahhmuah vumah thunaitu i.