1 Piter 2 - Zanniat Bible

Lungto Nung Le Miphun Thianghlim

¹ Ciamanin phatlohnak hmuahhmuah heh lon tusek hang ih; thudonrel nawn mah ih; tikhel nawn mah ih; mi iksik mah ih; zohsuamhnak ponkam hmang nawn mah ih.

² Nau te sawng niu bang i tu ih, rauhla hnawiti duh tu ilai ciami hnawiti ning dinghnak thawmin ning khang tuhai nunohnak ngah tuh i si.

³ Lai Thianghlim in a tihnak bangin, “Bawipa ai ninghiohnak tep ngah zo i si.

⁴ Bawipa hnenah kawi tu ih, ani tu minung in santlai lo tiin hnawl khalselai Pathian in a songlawi tiin a rilhnak a nungmi lungto i.

⁵ Ning khai kawi tu ilai a nungmi lungto bangin rauhla biakinn sahnak hrangah Pathian ai hmanghnak lungto cang tu ih. Ciata ah suangbawi cianghlim bangin ruaih tuhai cosang tlak mi rauhla hibawlhnak Jesuh songin Pathian hnenah pe tuh i si.

⁶ Zaimantifangin Lai Thianghlim in, “A mankhung lungto ril ing ai, Zion ai inn ning lungphum ah ciami lungto hmang ing. Amah a sangtu pohpoh tu zaikom inkhai mualpho tuh awng lo i,” ti i.

⁷ A sangtu ningte caah he lungto heh a man khung ngai i. Ikhalselai a sang lotu ca ahcen, “Inn satute in santlai lo tiin a hnawlhnak lungto heh man nai ber lungto ah cang i,” tihnak i.

⁸ Cen Lai Thianghlim song hmundang ah, “Hemi lungto heh mi bahhnak ah le, tluhnak lungpui ah cang tuh i,” tiin um i. Amahte bahhnak heh thuthangpha sang tlang lo manin i; ciatih ai a umhnak heh Pathian ai tumtekhnak i.

⁹ Ikhalselai ning tu ril cia miphun, Kumpibawi ai suangbawi, miphun thianghlim, Pathian ai miphun hlaice i si. Khuathim songin aicankul tleuhnak songah ning kotu Pathian in ngaihsunurkul a thil bawnhnak tepawl tlangaupui tuhin a rilhnak i si.

¹⁰ Tun hlanah Pathian ai minung ilo i si, ikhalselai tunah amah ai i si; tun hlan ahcen Pathian ai ninghiohnak ling lo i si; ikhalselai tun tu a ninghiohnak co zo i si.

Pathian Ai Salte

¹¹ I ithnak i rualte, he laipua vumah mikhual le raltlan mi bangtluk i si ai ning hnenah ninghiohnak ning ngen ing. Rauhla thawn a ral dun ngiode tisa hiamhnak in ning neh hram maseh.

¹² Pathian sang lomi lakah ziaza sikṭhim tlak in nung tu ilai phatlohnak a bawntu tiin mawh ning hluk tlang khalselai, ning nuncan phahnak ning hmu tuhai Pathian a hleng Nia ah amah thangphat tlang tuh i.

¹³ Kin Bawipa manin ning vumai thunaitu bawite thu ngai tu ih; a sang ber ai thunaitu kumpibawi thu ngai tu ih.

¹⁴ Cen peng le ram uktu bawi upate khai, hrokhrawl mite reemtu tuhin le phathnak a bawntu lawmtu tuhin naper pehnak imanin amahte thu ngai tu ih.

¹⁵ Zaimantifangin zaikhai ling lo ai a pongtu mivoite ai ponghnak heh thil pha ning bawnhnak in dap tuseh tiin Pathian in ning daihsahhnak i.

¹⁶ A luatmi bangin nung tu ih; ikhalselai ning luathnak heh phatlohnak huptu ah hmang mah ih; ciatah in Pathian ai sal bangin nung tu sawn ih.

¹⁷ Mi zongzong upat tu ih, sangtu unaute it tu ih; Pathian kihzah tu ilai Kumpibawi khai upat hmaizahhnak pe tu ih.

Khrih Tuardan Santehhnak

¹⁸ Salte, ning bawite ai thu ngai tu ilai upat tu ih, ninghiohnak le upathnak a naitute lek upat loin mipuar bikraw pawl ai thu khai ngai tu ih.

¹⁹ Pathian daihhnak ning ling manin ning tuar kul lohnak harsahnak tuar le i sikhaw Pathian in hmuifu ning pe tuh i.

²⁰ Sualhnak ning bawn manin ning tuar tlak vithnak tuar le i sikhaw ning caah zai hnempuihnak um i? Ikhalselai phathnak bawn cing in tuar le i sikhaw Pathian in hmuifu ning pe tuh i.

²¹ Ciabang harsahnak tuar tuhin Pathian ai kohnak mi i si; zaimantifangin Khrih amah rori in harsahnak ning caah tuar ai a keniah hlun thil tuhin santeh tuh ning hlup i.

²² Khrih in sualhnak zaikhai bawn lo i; a hmurka in thudonrel i ti khai mi in za awng lo i.

²³ Mi in zohsuam fangin zohsuam thun ve lo i; harsa a tuar fangin lim thun ve lo i. Ikhalselai dikcanglairelhnak thawn thu a khantu Pathian sawn rinsan i.

²⁴ Khrih amah ai taksa rori in kin sualhnak heh thinglamteh vumah hlenpui zo manin kinte tu sualhnak ah mithi ising ai dikcanghnak songah a nung tuh mi ising.

²⁵ Lam a vaimi tuu bangin pai awng ising’ ikhalselai tun tu ning rauhla Khaltu le Kilkhawltu hlun tuhin ning lam vai hmunin letruai lehmi i si.