1 Piter 1 - Zanniat Bible

¹ Jesuh Khrih ai nalang kaimah Peter in Pontus, Galatia, Kappadosia, Asia le Bithinia peng ah raltlan bangin a piak mite, Pathian ai rilhnak mite, ning hnenah lai ning kuat ing.

² Jesuh Khrih ai thu ning hlun tuhhnak le amah ai thisan ai thiangruaihnak ning cang tuhin ningmah heh kin Pa Pathian ai tumtekhnak bangin rilhnak le amah ai Rauhla in mi thianghlim in bawnhnak i si. Pathian ai ninghiohnak le daphnak heh ning hnenah a khimniu in um tu hram seh.

A Nungmi Umlamhnak

³ Kin Bawipa Jesuh Khrih ai Pa le Pathian tu thangphat ngasing. A ninghiohnak a lian manin Jesuh Khrih khiah thihhnak in thoruai ai nunhnak thar pe zo i. Ciamanin a nungmi umlamhnak in kin dim ai,

⁴ Pathian in a minungte caah a dahhnak ro co tuhin umlam in um ising. Cia ro heh ning ca vancung ah ning dah sah ai a hnawm thil lomi, aisu inkhai ru thil lomi le a ziam thil lomi i.

⁵ Ni hnuataber nia ah larruai tuhin tunai dahciahnak nunohnak heh sanghnak thawmin Pathian huham ai kilkhawlhnak ningmah in co tuh i si.

⁶ Ciamanin ang tu ih! Harsahnak a phuncang ning tawkhnak manin can comniu song lungsia in um khal i sikhaw lungawi in um tu thotho ih.

⁷ Zaimantifangin he harsa ning tuarhnak tu sanghnak ngaingai maw ngaingai lo ti linghnak tuhin i. A hnawm thaimi sui rin mai in cu de i. Ciatih bangin sui tahin songlawi sawn mi ning sanghnak heh harsa tuar bentu i tuhin cu kul ve i. Cen Jesuh Khrih a lar Nia ah thangphathnak le songlawihnak le upathnak ngah tuh i si.

⁸ Amah hmu awng lo napui it tlang i si; hmu awng lo napui sang tlang i si. Ciamanin ka in rel thil lohnak, a thawmlian mi le a songlawi mi anghnak nai i si.

⁹ Zaimantifangin Jesuh Khrih songai ning sanghnak in tumtekhnak a naimi ning rauhla nunohnak co ngah tuh i si.

¹⁰ Hemi nunohnak thu heh prophette ai sihnak le zonghnak i; Pathian in ning pe tuhhnak he ninghiohnak lehsawng thula heh prophette ai rel cia awnghnak i.

¹¹ Zaikom fangin cia can hleng tuh ini ti si tuh tum tlang i. Amahte songai a umhnak Khrih ai Rauhla in Khrih tuar tuhhnak harsahnak le ciahnua ai a co tuhhnak songlawihnak thu a rel cia fangin tun can heh a sawhhnak can i.

¹² Prophette ai naperhnak heh amahte ai hnempuihnak hrang ilo in ningmah ai phathnak hrang sawn i ti khiah Pathian in amahte hnenah larruai i. Ciatihin prophette ai rel cia awnghnak heh tunah vancung in hlathnak Rauhla Thianghlim ai hathnak thawmin Thuthangpha a phuangtu palaite hnenin ning zahnak i. Hemi thu heh vancungmite inrin ling nuamhnak thu i.

Thianghlim In Nung Tu Ih

¹³ Ciamanin naper pan tuhin ning thinlung ralring in um tu ih. Ring cialep in um tu ilai Jesuh Khrih a lar fangin ning ngah tuhhnak ninghiohnak vumah ning umlamhnak veksen in mun tu ih.

¹⁴ Pathian daihhnak hlun tu ilai ning voi lai can ai ning naihnak tisa daihhnak in ning nunhnak uk nawn mahang seh.

¹⁵ Ning kotu Pathian a thianghlim bangin nisiar ning nunhnak ah thianghlim in nung tu ve ih.

¹⁶ Lai Thianghlim songah, “Kaimah i thianghlim manin ning khai thianghlim tu ve ih,” tiin um i.

¹⁷ Pathian hnenai saw ning ngen fangin kin Pa tiin ko i si. Ciami ning Pa tu mi zongzong hlaihdanhnak nai loin amahte naperhnak bang ṭen in thu a khantu i. Ciatih imanin he laivum ning nun songah amah kihzahhnak thawn amah caah nung tu ih.

¹⁸ Ning pupate ai ro ning hluphnak zaikhai miathnak um lo ning nundan in ning tlantu ziang i ti ling hlen i si. A hnawm thai sui le ngun bang ilo i.

¹⁹ Ning luatruaitu heh a songlawi mi Khrih ai thisan i ai Khrih tu sawibang lo hibawlhnak pha tuufa bang i.

²⁰ Ani tu lailung sem hlanah Pathian ai ril zomi i ai tunah ningmah caah hnuataber can ah Pathian in a larruaihnak i.

²¹ Thihhnak in a thoruaitu le songlawihnak a petu Pathian heh Amah thawmin sang tlang i si. Ciatihin ning sanghnak le ning umlamhnak heh Pathian vumah ning munhnak i.

²² Tunah thutak ning hlunhnak manin cianghlimruai zo mite i si ai sangtu unau dangte khai ning thinlung taktak in it tlang i si. Ciamanin ning thinlung veksen in pakhat le pakhat it dun tu ih.

²³ A nungmi le kumzangza in a khomi Pathian ai ponkam thawmin te tharmi i si; a thi thaimi nu le pa ai fate i nawn lo i si, a thi thai lo mi ai fate ihang i si.

²⁴ Lai Thianghlim in, “Mi zongzong heh hampa bang i; amahte songlawihnak khai hampa par bang i. Hampa tu ro ai papar khai ria i.

²⁵ Ikhalselai Bawipa ai thu tu kumzangza in kho i,” tiin ti i. Ning hnenah phuanghnak Thuthangpha tu he thu i.