1 Korin 9 - Zanniat Bible

Nalang Ai Covo Le Ṭuanvo

¹ Miluat ilo ing maw? Nalang ilo ing maw? I Bawipa Jesuh hmu zo ilo ing maw? Cen ningte khai Bawipa caah i naperhnak ai a thai ilo i sim?

² Midang in nalang in i ruat ta lo inkhai ning in i ruat i si, zaimantifangin Bawipa thawn ning pehzomhnak manin nalang ihnak khiah a nemhngettu i si.

³ Midang in i relsiat fangin hetihin pong de ing:

⁴ Kin naperhnak hrangah ti le rong hlawh tlak ve ilo i ing maw?

⁵ A dang nalangte, Bawipa ai naute le Peter ai bawnhnak hlun in amahte nupuite fehpui betbo bangin i khualtlawnghnak ah kai inkhai sangtu nupui fehpui thilhnak thu nai ve lo ing maw?

⁶ Ihlahle Barnabas le kaimah ian maw pumcawmhnak hrang naper kul dekdo i ing?

⁷ Aisu in mah ai paisa hmangin ralkap per awng ini? Lovai pa in a lo songin a suakhnak cabit khiah ai loin um awng aw im? Tuukhal pa in a tuu hnawi ding loin um awng ni im?

⁸ Nisiar kin nunhnak ai kin tawkhnak ian in santehhnak lang thil i ti mah ih. Dan inkhai hetih thotho in rel i.

⁹ Moses dan songah, “Fang a ciltu hnelhno kawlpawcang heh a ka hen mah ih,” tiin um i. Hetih ai a um fangin Pathian heh kawlpawcang lek ngaihhar ini im? Ihlahle kinmah ngaihhar in a tihnak ini?

¹⁰ I, a rel sanhnak tu kinmah i ing. Lovaitu ituseh, fang attu ituseh, fangcang covo nai tuh ve ruat in per tlang ṭen i.

¹¹ Ningmah lakah kin in rauhla hlaici vorh i ing. Thilri lamin cohnak kin nai ve fangin a tam ze i tiin ruat tlang i sim?

¹² Midang in ning hnenah hebang ngah tuh umlam lekhaw kinmah in tang tam deuh co tuh umlam tuh nai sawn lo i ing maw? Ikhalselai tun tian ning ti awng de hlai ah Khrih ai Thuthangpha heh khamtu nai pang fangin ti lau ah zaizongza a tuar in tuar lam sawn i ing.

¹³ Ningmah inkhai Biakinn ai napertute in Biakinn in rong ngah tlang ai puleng ai bawlhnak inkhai covo nai tlang i, ti ling sio hlen i si.

¹⁴ Ciabang pahin thuthang a phuangtute khai a thuthang phuanghnak in pumcawmhnak ngah tu ve seh, ti khiah Bawipa ai thupehnak i.

¹⁵ Ikhalselai tun tian tu hebang i cothilhnak heh lang i nuam hang lo i; hetih ai lai i nganhnak khai i cothilhnak co nuam manin ilo i. Ciatih ai i bawn tuh tahin thi i nuam sawn i. A dik lo zawng ai tluangkhawnghnak heh aisu inkhai thulovang ah cangruai tuh i daih lo i.

¹⁶ Thuthangpha i phuang manin tluangkhawng thil ing ti lo ing. Zaimantifangin i vumah hmahnak i! Thuthangpha phuang loin um lengkhaw i hmai lam pit ze i.

¹⁷ I naper heh kaimah daih bangin i rilhnak iselai perman ngah tuh ruat thaipang ing; ikhalselai tun tu i ṭuanvo in dahhnak i, zaimantifangin Pathian in i hnenah i pehnak i ṭuanvo i.

¹⁸ Perman cohnak le ngahhnak ziang nai pa ing? I perman ngahhnak tu man lang loin Thuthangpha i phuangthilhnak le hlawhman lang loin Thuthangpha hrang i perhnak sawn i.

¹⁹ Kai tu miluat ing; aisu ai sal khai ilo ing. Ikhalselai mi tam thai tawp in hoi ngah tuhin mi zongzong ai sal i cang i.

²⁰ Judah mite lakah naper i per fangin Judah mi hoi ngah tuhin Judah mite bangin um ing; kaimah heh Moses dan hniaah um nawn lo napui dan hnia ai a umtute hoi ngah tuhin dan hniaah a nung bangin um ing.

²¹ Ciabang thotho in Gentile mite lakai naper i per fangin Gentile mite hoi ngah tuhin Judah dan hlun loin Gentile mite bangin um ing. Hetih ai i um fangin Pathian dan hlun lo ing, tihnak ilo i; Khrih ai dan hniaah um ing.

²² Sanghnak a niar mite lakah anite hoi ngah tuhin sanghnak niar bangin nung ing. Ciatihin zaibang ita inkhai anite hoi ngahhnak tuh ilekhaw mi cangcang hnenah zaizongza ah cang zianzo ing.

²³ Hemi hmuahhmuah heh Thuthangpha hrangah i bawnhnak i ai a hmuifu hlawm tuh ve in i daihhnak i.

²⁴ Dawp zuam hmunah mi tampui tel de napui pakhat lekin dawp zuamman ngah i, ti ling sio i si. Ciamanin zuamman ngah tuhin dawp tu ih.

²⁵ Sal zuamhnak ai a teltute in a zir laiah dan kho ngai hlun tlang ai amahte taksa thari rin kul i. Ciatih ai amahte zuamhnak heh a vawi thai papar lukhip ngah nuam manin i. Ikhalselai kin tu a vawi thai lo papar lukhip ngah hiam in dan kho ngai in hlun ai sup dun ve ising.

²⁶ Ciamanin hmui sung hmun hleng tuhin dawp ai hlivua a thongtu pa bang menma ilo ing.

²⁷ Sal zuamhnak hmunah tel tlang tuh ṭen in midang sawm hnelhno hnuaah kaimah lehlam i hnawl pang nga i si khaw, ti lau in i taksa heh hrem ai uk ing.