1 Korin 4 - Zanniat Bible

Khrih Ai Nalangte

¹ Kin tu Khrih cengfa, Pathian thuthup kiltu a cengfa in kin ruat tuhhnak i.

² Ciabang thil kiltu caah a thupui ber heh a bawipa ai rintlak cang tuh khiah i.

³ Tunah nangmah in ituseh, midang in ituseh, minung dan in i thu tan tuh i lau lo i. Kaimah veve khai thukhan dun lo ing.

⁴ I thinlung muril heh thiang i; ikhalselai thiang ing i ti fangin i sual lo i tihnak ilo i. I vumah thukhanhnak a bawntu tuh ngaingai heh Bawipa i.

⁵ Ciamanin a can a khim hlanah aisu khai a thu rel mah ih. A tawphnak thukhanhnak tu Bawipa a kawi fangin i tuh i. Amah in khuathim songah suahpui tuhai minung thinlung ai tumtekhnakte khiah phuang ai lar tuh sio i. Ciatihin aisusu khai Pathian hnenin amahte co tuhhnak covo thangphathnak ngah tlang tuh i.

⁶ U le naute, ningmah hnempuihnak caah he thu hmuahhmuah heh kaimah le Apollos santehhnak hmangin ning rel ing. Hetihin i rel fangin, “Nganciahnak khiah kan mah ih,” tihnak santehhnak ning lingthilhnak tuhin i. Aisu ning ita inkhai mi pakhat khiah uar in a dang khiah zohsuam tuh lo i si.

⁷ Aisu in midang tahin cuang tuh deuh in ning bawn ini? Ning naihnak hinkhim heh Pathian pehnak sio ilo im? Ciatihin lehsawng ai ning ngahhnak ilekhaw akontih in uar dun thil i si?

⁸ Ning daihhnak hmuahhmuah ngah aw sio hang i sim? Ning lian ngai aw hang im? Kumpibawi tang ning cang aw zo im? Kin tu ilo i ing! Kumpibawi ngaingai i si lai i daih bang ngai! Ciatihin hmunkhat ah uk tuh napui ising!

⁹ Kin, nalangte tu Pathian in nauta ber ah kin dah i tiin ruat ing; puai sikhnak hmun mizapui hmaiah rek tuh tlak minung, vancungmite le laivum mi hmaiah hnihsarelhnak minung ai hmanghnak minung menma i ing.

¹⁰ Kinte tu Khrih caah mivoi i ing; ning tu Khrih songah mifim i si! Kin tu kin ṭawnṭai i; ning tu ning hat ngai i! Kin tu zohsuam mi i ing; ning tu upatmi i si!

¹¹ Tun can ah khai rikam le tihal in um i ing. Kin hnikpon tu dat fawmhnak i; vit le beng tuar i ing;

¹² Kin thitha ai zo nawn lo tianin kin kut in naper i ing. Cukcamhnak kin tuar fangin hmuifu pe i ing; cawhhnak kin tawk fangin tuar cuahco menma i ing;

¹³ Zohsuamhnak kin tawk fangin pongnem niu in pon i ing. Kinte tu laivum ai hnawmborh bang fang i ing; tunnia tianin mi in daih lo ai hnawl mite i ing.

¹⁴ Hetihin ning hnenah i ngan fangin zak ning thi tuseh i ti nuamhnak ilo i; ikhalselai i daih zemi i fate bangin nunthutiam i hiam i.

¹⁵ Zaimantifangin Khrih songai nundan ahcen zirhtu thawng tampui ning nai inkhai pa ngaingai tu pakhat lek nai i si. Thuthangpha ning hnenah i phuang manin Khrih Jesuh thawn ning pehzomhnak ah ning pa ing.

¹⁶ Ciamanin i nundan heh i hlun tu ih, tiin ning forh ing.

¹⁷ Ciamanin Timothy khai ning hnenah i hlathnak i. Ani tu Bawipa songah i ithnak le i rinsanhnak i fapa i. Amah in Jesuh Khrih songai i hlunhnak nunhnak lampui le khuahacang pawlpui hmuahhmuah hnenah ciatih ai nunhnak lampui i zirhhnakte tu ning rel tuh i.

¹⁸ Mi hrekkhat in, “Kin hnenah kawi tuh nawn lo i,” tiin i ruat ai puarthau tlang dekdo i si.

¹⁹ Bawipa lungkhim lekhaw hleng cing tuhai he mihngal pawl in huham ning naidan amahte hmurka ai phuanghnak lek ilo in zaibang rori bawn ben peupeu i ti khiah kaimah rori in hmu tuh ing.

²⁰ Zaimantifangin Pathian Ukhnak tu ponka menma ilo i, hathnak huham i.

²¹ Ciamanin akon sawn ril i si? Fungkek thawn kawi tuh ing maw, ihlahle ithnak le remhnak thinlung thawn kawi tuh ini ing?