1 Korin 3 - Zanniat Bible

Pathian Naruaihtute

¹ U le naute, thungai in ti lesingkhaw ning hnen ahcen Rauhla mite hnenah i rel bangin rel thil lo ing. Hemi laivum ai tisa mi bang le Khristian sanghnak lamai nausen niu bangin ning hnenah rel i kul i.

² Rong ngaingai ning ai ben lai lo manin hnawi ning pe ing. Tunah khai rong ngaingai ai ben lai lo i si,

³ zaimantifangin tunah khai tisa nun in nung lai i si. Pakhat le pakhat iksik dun ai ning hua dun fangin lai tisa ai ning imanin tisa dan in nung i si, ti khiah lar ilo im?

⁴ Ningmah lakah pakhat in, “Kai tu Paul ai minung ing,” ti ai a dang pakhat in, “Kai tu Apollos ai minung ing,” a ti ve fangin he laivum ai minung ning ihnak larruai ilo i sim?

⁵ Thungai in tifangin Apollos tu aisu i? Paul tu aisu i? Kinte tu sangtu ning cangthilhnak tuhin Pathian naruaihtu ian i ing. Bawipa ai ṭuanvo kin pehnak khiah bawn tlang ṭen i ing.

⁶ Kai in a ci cing ai Apollos in ti burh i, ikhalselai a khangruaitu cenin Pathian i.

⁷ Hlaici a cingtu le tiburhtu heh thupui lo i. A thupui ber tu Pathian i, hlaici po a khangruaitu heh Amah i.

⁸ A cingtu le tiburhtu heh a dangdunhnak um lo i; a naperhnak bangin Pathian in perman pe tuh i.

⁹ Zaimantifangin kin tu Pathian caah naper tlang i ing ai ningte tu Pathian naperhnak loramte i si. Pathian ai inn khai i si.

¹⁰ Pathian ai i pehnak i covo lehsawng hmang in inn sa thiam ngai bangin inn ham toh ai midang in cia vumah sa tlang i. Ikhalselai akontih in sa i ing ti khiah aisusu inkhai ralring kin kul ṭen i.

¹¹ Zaimantifangin Jesuh Khrih tu innham thupui ber tuhin dah zo ai innham dang toh bet thil lo i.

¹² Cia innham birhnak vumah sa tuhin mi hrekkhat in sui ihlahle ngun ihlahle lungmankhung hmang ai midang in thing maw, hampa maw, ihlahle fang kuangte maw hmang tlang i.

¹³ Cen amahte naperhnak ṭen ah zaibang i ti khiah Khirh Nia ah lar leh tuh i. Zaimantifangin cia nia ah a naperhnak khiah mai in larruai tuh i; zaibang naper i ti khiah mai in cu tuhai fiangruai tuh i.

¹⁴ Innham birhnak vumai inn sahnak khiah mai in siatsuah thil hlah lekhaw a satu in a perman ngah tuh i.

¹⁵ Ikhalselai mai in kang sek lekhaw sung tuh i, ikhalselai mai songin a luatmi bangin a nunhnak tu hup tuh i.

¹⁶ Ningte tu Pathian biakinn i si ai a Rauhla ning songah um khiah ling lo i sim?

¹⁷ Ciamanin aisu khai Pathian biakinn a hnawmcantu heh Pathian in hnawmcan tuh ve i. Zaimantifangin Pathian ai biakinn tu a thianghlim ai a biakinn heh ningmah i si.

¹⁸ Aisu khai amahte veve zawl dun maseh. Ningte lakah pakhatkhat in i fim i tiin laivumdan in ti dun lekhaw mifim taktak i tuhin mivoi ah cang hmasa tuseh.

¹⁹ Zaimantifangin laivum in fimhnak a tihnak tu Pathian mithmuh ah voihnak i. Lai Thianghlim in, “Mifimte tu Pathian in a amahte fimhnak lala in awkruai i,” ti i.

²⁰ Ciahlaiah Lai Thianghlim songah, “Mifimte ai ruathnak tu man nai lo menma i tiin Pathian in ling i,” tiin ngan i.

²¹ Ciamanin aisu inkhai minung ai bawnhnak vumah uardunhnak nai maseh. Thungai in tifangin zaizongza heh ningmah ai sio i;

²² Paul ituseh, Apollos ituseh, Peter ituseh, he laivum ituseh, nunhnak le thihhnak ituseh, tun san ituseh hmai lam san ituseh, a veksen in ningmah ai sio i!

²³ Cen ningte tu Khrih ai i si, cen Khrih tu Pathian ai i.