1 Korin 2 - Zanniat Bible

Khenbetmi Khrih Ai Thuthang

¹ U le naute, ning hnenah kawi in Pathian thuthup i phuang fangin pongkhung le minung fimhnak hmang lo ing.

² Zaimantifangin ning hnenah i um laiah Jesuh Khrih le thinglamteh vumai a thihnak siarlo thildang zaikhai ngaisung tuh tum lo ing.

³ Ciatihin ning hnenah i hleng fangin ṭawnṭai ngai le lau le hlawng kongin hleng ing;

⁴ I thuzirhnak le i thuphuanghnak ah ning thinlung lut tuhin minung fimhnak pongkam tel lo i, ikhalselai Pathian Rauhla le a hathnak larruaihnak ian i.

⁵ Ciamanin ning sanghnak tu minung fimhnak vumah hngaihngam loin Pathian hathnak vumah hngaihngam sawn i.

Pathian Ai Fimhnak

⁶ Ikhalselai Rauhla lamai puitling ciami hnenah fimhnak thu ning rel ing. Ikhalselai cia fimhnak thu i relhnak heh laipua ai fimhnak ilo i, he laipua a uktu ai hathnak khai ilo i; ciami hathnakte tu a bo zianzo hathnak lek i.

⁷ Kai ai i phuanghnak fimhnak tu Pathian thuthup fimhnak, minung aisu inkhai ling lohnak, laipua sem hlan in Pathian in kinmah songlawihnak tuhin a tumtekciahnak fimhnak i.

⁸ Hemi lailung a uktute aisu inkhai ciami fimhnak ling tlang lo i. Ling awng ta selai songlawi mi Bawipa khiah thinglamteh vumah rek tuh lo i.

⁹ Ikhalselai Lai Thianghlim in, “Minung aisu inkhai hmu awng lohnak, aisu inkhai za awng lohnak, cang thil tuh i tiin aisu inkhai ruat awng lohnak, ciami rori heh Pathian in Amah ittute caah a tumtekhnak i,” ti i.

¹⁰ Ciami a thuthup heh Pathian in kin hnenah a Rauhla in phuang i. Akontih in i tifangin Rauhla in zaizongza khiah si sio ai Pathian ai tumtekhnak thuk ber rin pur ngah i.

¹¹ Minung tu a songai ummi a rauhla ian in a thinlung songai thu heh ling i. Ciabang thotho in Pathian Rauhla ian in Pathian ai song thu khiah ling i.

¹² Kin ngahhnak rauhla tu laivum ai rauhla ilo i; Pathian ai hlathnak Rauhla sawn i. Pathian in kin pehnak lehsawng hmuahhmuah heh kin lingthilhnak tuhin Pathian ai Rauhla ngah zo ising.

¹³ Ciamanin Rauhla a naitute hnenah rauhla lam thudik relfiang fangin minung fimhnak ai zirhhnak ponkam hmangin rel lo ising.

¹⁴ Rauhla minung a ilo mite in Pathian Rauhla hnenin a hlenghnak lehsawng co thil lo i; a ling khai ling thil lo i. Zaimantifangin ciami lehsawngte ai songlawi zia heh rauhla thinlung ian in lingthilhnak i ai ciami tu anite ca ahcen voihnak i.

¹⁵ Rauhla a naitute in zaizongza heh a hnawm a pha bangin thia thiam i; ikhalselai amah khiah aisu inkhai mawhhluk thil lo i.

¹⁶ Lai Thianghlim in, “Bawipa thinlung khiah aisu in ling i? Aisu in ruathnak pe thil ti i?” ti i. Ikhalselai kin tu Khrih thinlung naitu ising.