1 Korin 15 - Zanniat Bible

Khrih Tholehhnak

¹ U le naute, ning hnenai i phuanghnak Thuthangpha heh tunah ning lingruai leh i nuam i. Ciami Thuthangpha heh ning pomciahnak le ning sanghnak kho ngai in a dinghnak hmun i.

² Ning hnenah i phuangciahnak Thuthangpha i ai kho ngai in pom le i sikhaw nun o mi i si. Kho ngai in pom hlah le i sikhaw ning sanghnak heh a lovang tuh i.

³ I pom ngahhnak tunah ning hnenah a thupui ber tiin i phuang salawnhnak tu hetihin i: Lai Thianghlim songah nganhnak bangin Khrih tu kin sualhnak manin thi i;

⁴ phum ai, Lai Thianghlim songai nganhnak bangin ni thumhnak nia ah thoruai leh i.

⁵ Peter hnenah lar ai a nalangte hlaihnih hnenah lar i.

⁶ Ciahlaiah nawk khat ah sangtu u le nau za nga zolo hnenah lar i; ciamite tu mi hrekkhat thi zo napui a tam sawn nung lai i.

⁷ Cen James hnenah lar ai cia hnuaah a nalang veksen hnenah lar i.

⁸ A hnuataber ah, nihla khim lo ai tehnak bang inapui ingkhaw i hnen ahkhai lar ve i.

⁹ Kai tu a nalangte lakah a tenau ber miangmo, a nalang ti tlak khai ilo ing; zaimantifangin Pathian ai pawlpui reemtu ing.

¹⁰ Ikhalselai Pathian ai ninghiohnak thawmin tunai bangin i cang ve ai i vumai ninghio a naihnak heh a lovang ilo i. A nalang dangte tahin roh sawn in naper ing; ikhalselai ciami heh kaimah ai perhnak ti tuhhnak ilo i; i hnenai a umtu Pathian ninghiohnak ai perhnak sawn i.

¹¹ Ciatihin Thuthangpha heh ning in ngah ai i hnenin ning ngah ita inkhai, anite hnenin ning ngah inkhai, kin veksen in phuang ai ning inkhai sang zo i si.

Tholehhnak

¹² Kin thu phuanghnak tu: Khrih tu thihhnak in thoruai leh zo i tihnak i ai tunah akontih in mi hrekkhat in mithi thoruailehhnak um lo i ti thil i si?

¹³ Ciatih ai ning tihnak tu dik bang selai Khrih thoruai leh lo i, ti ah cang tuh i.

¹⁴ Cen thihhnak in Khrih thoruai leh hlah lekhaw phuang tuh zaikhai nai lo ai sang tuh zaikhai nai lo i si.

¹⁵ Ciahlaiah Pathian thu ah thudonrel ah kin cang tuh i, zaimantifangin thihhnak in Khrih heh Pathian in thoruai zo i tiin rel ṭiode heh i ing in. Ikhalselai a thi mite nunhnak ah thoruai lo ngaingai lekhaw Pathian in Khrih khai thoruai lo i tuh i.

¹⁶ Zaimantifangin a thi mite thoruai hlah lekhaw Khrih khai thoruai ve lo i.

¹⁷ Cen Khrih thoruai hlah lekhaw ning sanghnak heh a kualawngpui i tuhai ning sualhnak songah a tang laimi i tuh i si.

¹⁸ Ciahlaiah Khrih sang ai a thitute khai pairal tuh ve i.

¹⁹ Khrih songah umlamhnak kin naihnak heh a konteng khai hleng loin he laivum kin nunhnak hrang ian ilekhaw laivum mite lakah ninghio kul ber i tuh ising.

²⁰ Ikhalselai thudik tu hetihin i: Khrih tu thihhnak in thoruai leh zo ai a thi ciamite thoruai leh tuh ve i, ti lingthilhnak tuhin a thai hmasaber amahkhan i.

²¹ Mi pakhat manin thihhnak a um bangin mi pakhat manin tholehhnak hleng ve i.

²² Adam thawn pehzomdunhnak manin mi zongzong thihhnak a tawk bangin Khrih thawn a pehzomdunhnak thawmin mi zongzong thoruai leh tuh ve i.

²³ Ikhalselai a sangsang niu in thoruai leh tuh i: a hmasaber ah Khrih, cen a hleng leh fangin Amah ai minungte i tuh i.

²⁴ Cia hnuaah can bohnak hleng tuh i. Khrih in rauhla lam uktute, thunaitute le huham naitute hmuahhmuah a neh sek hnuaah Ukhnak heh Pa Pathian hnenah pe tuh i.

²⁵ Zaimantifangin Pathian in ral hmuahhmuah neh sek ai a ke hniaah a dah sek hlanlo Khrih in uk tuh i.

²⁶ Ral hnuataber a neh tuhhnak tu thihhnak i.

²⁷ Zaimantifangin Lai Thianghlim in, “Pathian in zaizongza a ke hniaah dah tuh sio i,” tiin ti i. “Zaizongza,” tifangin Pathian amah tu tel lo i, ti khiah rel kulhnak ilo i. Pathian in thil hmuahhmuah heh Khrih hniaah dah tuh sio i.

²⁸ Ikhalselai zaizongza heh Khrih ukhnak hniaah dah sio fangin Fapa Amah khai thil hmuahhmuah a hniaah a dahsahtu Pathian ai hniaah dah dun tuh ve ai Pathian tu zaizongza vumah uktu tuh i.

²⁹ Cen a thi mite aiawh ah zaimanin mi hrekkhat in baptisma lang tlang ini? Amahte tumtekhnak heh ziang ini? A thi mite thoruai leh tuh ngaingai lo fangin tu zaimanin hemite in mithite aiawh ah baptisma lang nuam tuh hnelhno i?

³⁰ Kinmah lala ti singlai: thinlauhnak lakah zaimanin um kin hiam hnelhno ini?

³¹ U le naute, nisiar in i thi i. Khrih Jesuh thawn kin pehzomdunhnak thawmin ningmah heh i porhdunhnak i ai hetihin i pongthilhnak khai i.

³² Cen heta Ephesa khua ah “Sahrang” thawn tawng dun i ing, ti tlak khiah minung tumtekhnak lekin i bawnhnak iselai i miathnak ziang um i? A thi mite thoruai leh ngaingai hlah lekhaw santehhnak ai, “Thangha thi tuh ta lamlam, ai le ding menma ngasing!” tihnak bang i tuh ising.

³³ Mi zawlhnak i mah ih. Santehhnak ah, “Rualpui pha loin ziaza pha hnawmruai i,” ti i.

³⁴ Ning thinlung fimruai leh tu ilai ning sualhnak tu awl tuhang ih. Mi hrekkhat tu Pathian khai ning ling lo manin zak ning thi tuseh i tihnak i.

Tholehhnak Ruangpum

³⁵ Mihrek in, “Zaitin mithite tu thoruai leh tuh ini? Ziang bang ruangpum nai tuh ini?” tiin zawt tuh i si.

³⁶ Mivoite! lai songah hlaici ning cing fangin thi hmasa hlah lekhaw po thil awng lo i.

³⁷ Cen hlaici ning cing fangin sangvut ci ituseh, hlaici dang ituseh, a ci lek cing i si, a po tuhhnak a kung cing awng lo i si.

³⁸ Pathian in ciami hlaici hrangah a daihhnak kung pe i, hlaici hmuahhmuah hrangah a kung pe ṭen liang i.

³⁹ Nunhnak nai tu hmuahhmuah in amahte naihnak taksa bang dun ṭen lo i. Minung taksa tu phunkhat i ai ramsa ai taksa khai a phundang i; vaniu taksa tu phundang ai nga ai taksa khai dang lala i.

⁴⁰ Cen vancung ruangpum um ai laipua ruangpum um i. Vancung ruangpum songlawihnak le laipua ruangpum songlawihnak tu dang dun i.

⁴¹ Ni in amah ai songlawihnak nai ai hlapui in songlawihnak phundang nai i. Arsi inkhai songlawihnak phundang nai ṭen ai amahte songlawihnak tu a dang ṭen i.

⁴² Mithite thihhnak in thoruai leh fangin ciatih bangin i tuh ve i. Taksa pum tu phum fangin a hmon thai i; thoruai leh fangin a hmon thil lo i tuh i.

⁴³ Phum fangin mawi lo ai ṭawnṭai ze i; thoruai leh fangin mawi ngai tuhai hat ngai tuh i.

⁴⁴ Phum fangin taksa pum i; thoruai leh fangin rauhla pum i. Taksa pum a um bangin rauhla pum khai um i.

⁴⁵ Zaimantifangin Lai Thianghlim in, “Adam hmasa tu a nungmi minung i,” tiin ti i; ikhalselai Adam hnuata tu nunhnak petu Rauhla i.

⁴⁶ A hleng hmasahnak tu rauhla ilo i, taksa i; ciami hnuaah rauhla hleng i.

⁴⁷ Laivut ai bawnhnak Adam hmasa tu laipua in kawi i; ikhalselai Adam hnuata tu van in kawi i.

⁴⁸ Lailung ai naihnakte tu laivut ai bawnhnak bang i; vancung ai naihnakte tu van in a hlenghnak bang i.

⁴⁹ Laivut ai bawnhnak minung in hmuihmel kin nai bangin van in a hlengtu Mi ai hmuihmel bang tuh ve ising.

⁵⁰ U le naute, i relhnak tu hetihin i: thi le sa ai bawnhnak in Pathian Ukhnak co thil lo i; cen a thi thai in a thi thai lo co thil ve lo i.

^51-52 A dikmi thuthup heh ngai tu ih: kin veksen in kin thi tuh sek lo i, ikhalselai hnuataber thirhlung tum fangin mitkhep songah kin thleng tuh sek i. Akontih i tifangin thirhlung awthawm a thang fangin mithite thoruai tuhai anite tu thi tuh nawn lo i; cen kinte tu kin thleng tuh sio i.

⁵³ Zaimantifangin a thi thai heh a thi thai nawn lo ah thleng tuh sio i.

⁵⁴ Ciatih bangin a thi thai tu a thi thai nawn lomi ah thleng fangin Lai Thianghlim in: “Thihhnak tu hnawmruai sek i, Nehhnak tu a semkhim zo i,” a tihnak khim tuh i.

⁵⁵ “Aw thihhnak, na mi nehhnak tu akonah i? Aw hlankua, na ru akonah i?”

⁵⁶ Thihhnak ai ru heh sualhnak i ai sualhnak ai huham heh dan i.

⁵⁷ Ikhalselai kin Bawipa Jesuh Khrih hmangin nehhnak kin petu Pathian heh thangphat in um tuseh.

⁵⁸ Ciamanin i ithnak u le naute, tlu tuh loin kho ngai in ding tu ih. Pathian naper heh thakol ngai in per tu ngio ih; Bawipa ai na ruaih heh a lovang awng lo i, ti ling i si.