1 Korin 14 - Zanniat Bible

Rauhla Lehsawng Dangdang

¹ Ithnak nai tum tu ber ih. Ikhalselai Rauhla lehsawng dangdang khai ning tumtek tuhin um ai cialak ai ning daih ber tuhhnak tu prophet thurel thiamhnak lehsawng i.

² Lin lo pon ai a pongtu in minung hnenah pong lo i, Pathian hnenah pong i, zaimantifangin a ponghnak tu aisu inkhai ling sah lo i. Rauhla thawmin aisu inkhai ling lohnak thu pong i.

³ Ikhalselai prophet thu a reltu in minung hnenah pong i, cen mi bawmtu ah cang ai thathohnak le muanghnak ngah tlang i.

⁴ Lin lo pon ai a pongtu in amah veve ian bawm dun i; ikhalselai prophet bangin thu a reltu incen pawlpui pumpui heh bawm i.

⁵ Ning veksen in lin lo pon in pong tuh heh i daih i; ikhalselai prophet bangin thurelhnak lehsawng ning ngah tuh heh ning daih sah amam ing. Zaimantifangin lin lo pon in pong tahin prophet bangin thurel heh man nai deuh ngaingai i. Amahte ponghnak heh a let thiamtu um ai pawlpui cawmhnak ti siarlo lin lo pon heh prophet thurel thiamhnak tluk lo i.

⁶ Ciamanin u le naute, ning hnenah i kawi fangin lin lo pon in pong inglai ning caah ziang talah phathnem tuhhnak zaikhai um lo i! Pathian hnenin thuphuanghnak maw, ihlahle linghnak pakhatkhat maw, ihlahle prophet thurelhnak maw, ihlahle zirhhnak pakhatkhat maw, ning ken ben hlah lengkhaw ning caah phathnem tuhhnak zaikhai um lo i.

⁷ Nunhnak nai lo napui a aw suak thai awmawi lemlawi ituseh, congcing khai ituseh, ruat tucuk ih; amahte tumhnak aw khaih fiang ngai in suah hlah selai aisu in zai aw tum i, ti ling tuh i?

⁸ Raltawng paihnak thirhlung a tumtu in fiang ngai in tum hlah lekhaw aisu in raltawng tuhin pai tuh i?

⁹ Ciabang pah in ning ponghnak heh kin ling lohnak pong i ai zaikhai a fianghnak um lo fangin aisu in ling thil tuh i? Ning ponghnak heh hlivua lakah pai tuh zel menma i.

¹⁰ Laivum pumpuhluk ah pong dangdang tampui um i; ikhalselai sullam nai lo pong pakhat khai um lo i.

¹¹ Amahte ponghnak aw heh a sullam ling thil hlah lengkhaw ciatih ai a pongtu heh pong lin lo mikhual i ai kaimah khai a mah caah pong lin lo mikhual i ve ing.

¹² Rauhla lehsawng co tuh heh ning daih ze manin zai dang tahin pawlpui a tungdingtu lehsawng heh ning daih cuang tuhhnak i.

¹³ Lin lo pon ai a pongtu in a ponghnak let thilhnak sawngen tuseh.

¹⁴ Ciabang lin lo pon in sawngen lengkhaw i rauhla heh sawngen napui i thinlung tu ciata ah tel lo i.

¹⁵ Ciatih ilekhaw akontih in bawn tuh ini ing? Saw i ngen fangin i rauhla in sawngen tuhai i thinlung inkhai ngen tuh i. La i sa fangin i rauhla in sa tuhai i thinlung inkhai sa tuh ing.

¹⁶ Na rauhla lek thawn Pathian hnenah anghnak thu na rel fangin akontih in khawmhnak ai kawitu mi menma in na anghnak thu na relhnak ah “Amen” tiin na ti sah thil tuh i? Na ponghnak heh anite in a sullam zaikhai ling lo heh in.

¹⁷ Pathian hnenah anghnak thu na relhnak heh pha tuh ngai napui midang bawmtu i tuh hrimhrim lo i.

¹⁸ Ningmah tahin lin lo pon kaimah in tam sawn pong manin Pathian thangphat ze ing.

¹⁹ Ikhalselai Pathian biahnak hmunah midang zirhhnak hrangah lin lo pon ai ponkam thawng hra tahin linghnak ponkam kam nga pong tuh sawn ing.

²⁰ U le naute, ning thuruathnak ah naupang bangin um mah ih. Thilpha lo bawnhnak lamah naupang bang itu ih; ikhalselai ning thuruatdan ahcen puitling itu ih.

²¹ Lai Thianghlim songah, “I minungte hnenah pong phun dangdang a pongtute hmangin pong tuh ing; Ramdang mite ai hmurka hmang in amahte hnenah pong tuh ing; Ikhalselai i minungte in i thu ngai tuh cuanglo i; tiin Bawipa in ti i,” tiin nganhnak um i.

²² Ciatih imanin lin lo pon ai pongthilhnak lehsawng heh sang lotute caah hmuhsahhnak i. Prophet thurel thiamhnak lehsawng heh a sang lotute ca ilo in a sangtute caah lingthiamhnak i.

²³ Cen pawlpuite ning pumkhawm fangin a khawmtute ning veksen in lin lo pon in pong tlang ti bang selai cialak fangin minung hrekkhat, ihlahle Pathian sang lotute lut tlang selai a voi i ning ti tuh lo im?

²⁴ Ikhalselai ning veksen prophet bangin Pathian thu phuang tlang ai cialak fangin mi pakhatkhat, ihlahle Pathian sang lotu lut selai ning thurelhnak in a thinlung khoih tuhai a sualhnak khai ling dun tuh i.

²⁵ A thupniu ai a ruathnak thilte lar tuh amam ai amah khai cia hmunin Pathian bia tuh ve i; cen “Ning hnenah Pathian um ngaingai i,” tiin ti tuh i.

Pumkhawm Fangin Mitsih Mawi In

²⁶ U le naute, i rel nuamhnak tu hetihin i: Ning pumkhawm fangin mi pakhat in la sa nuam tuh i, a dang in thu zirh nuam tuh i, a dang pakhat in Pathian hnenah thuphuanghnak nai tuh i, a dang pakhat lala in lin lo pon in pong nuam tuhai a dang pakhat in lin lo pon ai ponghnak heh a sullam let nuam tuh i. Zaibang i ta inkhai pawlpui bawmhnak ca ianah bawn tuseh.

²⁷ Mi in lin lo pon in pong nuam lekhaw a tamber ah mi pahnih ihlahle mi pathum tian lek pong tuseh; cia inkhai a sangsang in pong tu selai pong lettu um tuseh.

²⁸ Ikhalselai pong lettu aisu khai um hlah lekhaw lin lo pon ai a pongtu heh dap niu in um tu selai amah le Pathian hnen lek ah pong tuseh.

²⁹ Prophet bangin thurel thiamhnak a ngahtu pahnih thum sawn in thurel tlang tu selai midang in amahte thurelhnak a pha le pha lo ngai tlang tuseh.

³⁰ Ikhalselai a khawmtu lakah pakhatkhat in Pathian hnenin thurel tuh ngah lekhaw thu a reltu hnelhno heh com rih tuseh.

³¹ Ning veksen in rin Pathian thu heh a sangsang in rel thil i si; ciatihin aisusu inkhai zir tlang tuh ṭen ai thahathnak ngah tlang tuh ṭen i.

³² Prophet thurel thiamhnak lehsawng a ngahtu in a relhnak thu heh luanruai loin uk ben kul i,

³³ zaimantifangin Pathian tu buaihnak le hnaihnokhnak Pathian ilo i; remhnak le daphnak Pathian i. Pathian pawlpui in hmun cangcang ah amahte bawnhnak i bangin,

³⁴ pumkhawmhnak ah nupangte dap niu in um tlang tuseh, Thurelthilhnak thu nai lo i; Judah dan ai a tihnak bangin hotu khai cang thil maseh.

³⁵ Thu pakhatkhat ling nuam lekhaw a pasal zawt tuseh. Pawlpui pumkhawmhnak ah nupang thurel heh zakthikul i.

³⁶ Pathian thu heh ning hnenin pan i awm? Ningmah hnen lek ah Pathian thu heh hleng i awm? ilo i!

³⁷ Mi pakhatkhat in Pathian ai prophet ing tiin ruat dun i, ihlahle rauhla lehsawng ngah ing tiin ruat dun lekhaw, hetih ai ning hnenah i nganhnak heh Bawipa ai thupehnak i, ti khiah a ling kulhnak i.

³⁸ Ikhalselai hemi heh zaikhai siar hlah lekhaw ani tu zaikhai siar ve mah ih.

³⁹ Ciamanin u le naute, prophet thurel thiamhnak heh daih tu ih; ikhalselai lin lo pon ai pong khai kham mah ih.

⁴⁰ Zaizongza heh rualrem niu le mitsih mawiniu in bawn tuhhnak i.