1 Korin 13 - Zanniat Bible

Ithnak

¹ Minung pong a phunphun le vancungmi pong khai thiam khal ingkhaw ithnak nai hlah lengkhaw i ponghnak heh a pau menma darkhuang le a pau lianglo darbu bang i.

² Prophet thurel thiamhnak lehsawng ituseh, fimthiamhnak a phunphun le thuthuk a phunphun lingthiamhnak khai ituseh, mual thawn thai sanghnak tian khai nai khal ingkhaw ithnak nai hlah lengkhaw a lovang i.

³ I naih hmuahhmuah mi pe sek in i ruangpui heh mai ah tai tuhin pe khal ingkhaw ithnak nai hlah lengkhaw kaimah caah zaikhai hnempui lo a lovang i.

⁴ Ithnak tu a thinsau ai mi ninghio thiam i; ithnak tu mi iksik lo i, tluangkhawng lo ai hngal fawn lo i.

⁵ Ithnak tu puar lo i, mah ca lek ruat lo i, a thin com lo i, cen thil tisualhnak vumah hih meng lo i.

⁶ Ithnak tu thilpha lo vumah a ang lo i, ikhalselai thutak vumah ang i.

⁷ Ithnak tu thinpit vansang awng lo i; zaizongza ah sang i, zaizongza umlam ai zaizongza tuar ben i.

⁸ Ithnak tu bo nia nai lo i. Ikhalselai prophet thurel thiamhnak tepawl tu bo tuh i; lin lo pon ai pongthilhnak khai bo tuh i. Thiamhnak le linghnak khai bo tuh i.

⁹ Zaimantifangin thiamhnak lehsawng kin ngahhnak le prophet thurel thiamhnak kin cohnakte heh a hrekniu lek i.

¹⁰ Ikhalselai a semkhimmi a hleng fangin a semkhim lote tu pai tuh sek i.

¹¹ I naupang laiah i pongdan, thil i hmudan le i thuruatdan heh naupang ngai i. Ikhalselai tun tu upa hang manin naupangdan heh hlun i hiam nawn lo i.

¹² Tunai thil kin hmudan heh hlalang songah fiang lo ai a hla kin hmuhnak bang i; ikhalselai ciafangin hmaicang rori in hmu tuh ising. Tunai thil kin linghnak heh a khim lo i; ikhalselai ciafangin tu a khimliang in ling tuh ising. Pathian ai i linghnak a khimliang bangin kin linghnak khai khim leh tuh ve liang i.

¹³ Tun ahcen a kho ngio thil pathum um ai sanghnak, umlamhnak le ithnak i; hemite lakah a lianber tu ithnak i.