1 Korin 11 - Zanniat Bible

¹ Khrih nundan i cung bangin ning inkhai cung tlang tu ve ih.

Lukhuk Tuhhnak Thu

² I thuzirh salawnhnak hlun tlang ai kaimah khai i hai lo manin thang ning phat ing.

³ Ikhalselai ning ling tuhhnak ah i daihhnak tu: mi zongzong ai lu tu Khrih i; nupui ai lu tu a pasal i ai Khrih ai lu tu Pathian i, tihnak i.

⁴ Ciamanin misenpui hmaiah sawngen, ihlahle prophet bangin thu a phuang fangin a lu a khuktu mipa heh Khrih mualphoruaitu i.

⁵ Ikhalselai misenpui hmaiah lukhuk loin sawngen i, ihlahle prophet bangin thu a phuangtu nupang heh a pasal mualphoruaitu i ve i. Ciabang nupang heh a lu met sio nupang bang i, dang dun lo i.

⁶ Nupang in a lu khuk hlah lekhaw a sam tan tusek lawlaw seh. Nupang caah lukolh le sam tan sek heh zakthikul imanin a lu khuk tu sawn seh.

⁷ Pasal in a lu khuk kul lo i, zaimantifangin Pathian ai hmuihmel le songlawihnak larruaitu i. Ikhalselai nupang tu pasal songlawiruaitu i.

⁸ Zaimantifangin pasal tu nupang songin bawnhnak ilo i, nupang sawn heh pasal songin bawnhnak i.

⁹ Pasal tu nupang caah bawnhnak ilo i, nupang sawn heh pasal caah bawnhnak i.

¹⁰ Ciamanin le vancungmite manin nupang in a lu khuk tuseh, ciatihin thunaihnak hniaah um i ti larruai tuh i.

¹¹ Ikhalselai Bawipa songai kin pawlkomhnak ah nupang heh amah bul in um tuhhnak ilo i; pasal khai amah a dangniu in um tuhhnak i cuanglo i.

¹² Zaimantifangin nupang heh pasal songin bawnhnak a i bangin pasal khai nupang songin tehnak i ve i. Cen Pathian in zaizongza semsuah i.

¹³ Mipui hmaiah lu khuk loin nupang in Pathian hnenah sawngen heh mawi i ti aw i sim? Ningmah hlanlam ruat tu ih.

¹⁴ Laivum umdan ah pasal in samsaupui zuah tuh heh zakthi kul i ti lar i;

¹⁵ ikhalselai nupang caah sam sau heh a songlawihnak i. A sam heh a lukhukhnak caah i.

¹⁶ Ikhalselai mi pakhatkhat he thu el nuam lekhaw kamkhat lek rel tuh ing: kinmah lakah ituseh, Pathian ai pawlpuite lakah ituseh, ciami siarlo bia nunphung dang nai lo ising.

Bawipa Ai Zanfak

¹⁷ A hnia lamai i zirh tuhhnak thu ahcen kaimah in ning thangphat thil lohnak thu um i: zaimantifangin pumkhawmhnak ah thil pha tahin thilpha lo tam sawn i.

¹⁸ A hmasaber ah pum ning khawm fangin bur khat le bur khat rem dun loin um i tiin mi in i rel i. Hemi heh a dikhnak zawn um tuh i tiin sang ing.

¹⁹ (Thudik linghnak ah a dikmi le a dik lomi bur dangdang ai um heh hnempuihnak um ve i).

²⁰ Ikhalselai hmunkhat ah pum ning khawm fangin ning ai ning dinghnak heh Bawipa ai zanfak i nawn lo i.

²¹ Zaimantifangin ciatih ai ningmah ai bul rong ning ai ṭen fangin mi hrekkhat tu rikam in um ai mi hrekkhat tu ning ai ning dinghnak tam ze manin a ri tianin ning ri i.

²² Ai hmun le ding hmun tuh inn nai lo i sim? Ihlahle Pathian ai pawlpui zohsuam in mifarahte mualpho in umruai tuh ning hiam sawn i awm? Hemi bang thu ah akontih in kin ti tuh ini, tiin sang tlang i si? Thang ning phat tuh ing maw? Thangphat lamlam hlah!

²³ Zaimantifangin i zirh salawnhnak thu tu Bawipa hnenin i ngahhnak i. Bawipa Jesuh in Amah a zuar zan ah sanghlom pakhat lang ai,

²⁴ Pathian hnenah anghnak thu a rel hnuaah khan ai, “Hemi tu ning caah i pehnak i taksa i. Kaimah i hih tuh ngiohnak in ai tu ih,” tiin ti i.

²⁵ Ciabang thotho in, zanfak ai ben hnuaah khuat khai lang ai, “Hemi khuat tu i thisan ai nemhngethnak Pathian ai thukham thar i. Ning ding cang fangin i hih tuh ngiohnak in bawn tu ih,” tiin ti i.

²⁶ A sullam tu sang ning ai cang fangin le khuat ning ding cang fangin Bawipa a let hlanlo a thihhnak thu phuang i si tihnak i.

²⁷ Ciatih imanin aisusu khai Bawipa ai hmingsiahnak tuhin sik mawi loin Bawipa sang ai ai a khuat a dingtu heh Bawipa ai taksa le thisan vumah sualhnak a bawntu i.

²⁸ Ciamanin aisusu khai he sang a ai hlan le he khuat a ding hlanah amah veve chek dun tuseh.

²⁹ Zaimantifangin he sang a ai fangin le he khuat a ding fangin Bawipa ai taksa a sullam ling hlah lekhaw a ai a ding fangin a vumah thukhanhnak bawn cih i.

³⁰ Hetih ning imanin ningmah lakah mi tampui tu ning ur i, ṭawn ning ṭai i, cen mi hrekkhat tu thihhnak tianin tawk i si.

³¹ Hmasaber ah kinmah veve chek dun ta lesingkhaw Pathian ai thinrawhnak kin vumah hleng tuh lo i.

³² Ikhalselai Pathian thukhanhnak kin vumah hleng ai Amah ai nun thu kin tiamhnak heh laivum mite thawn hnawmral cih tuh loin kin daih sah manin i.

³³ Ciamanin u le naute, Bawipa ai Zanfak hmang tlang tuhin pum ning khawm fangin pakhat le pakhat iang dun tu ih.

³⁴ Aisu khai rikam lekhaw a inn ah ai cia tuseh. Ciatih bangin pumkhawm le i sikhaw Pathian thukhanhnak tawk tuh lo i si. Cen a dang thulate tu i hleng fangin ruat tlang leh tuh ising.