لواحي ن يوحنا 16 - ثريفيث 2020

سبْعَا ن ثْمجْمَارِين ن ؤُغْضَب ن أَربِّـي

¹ سْڒِيغ إِ يِجّن ن ثْمِيجَّا ثنْدق-د زِي ثمْزِيذَا ثَمقّْرَانْت ثقَّار-اَسنْت إِ سبْعَا نِّي ن لْمَلَائِكَاث س جّْهذ: "رُوْحنْت زدْجْعنْت سبْعَا ن ثْمجْمَارِين ن ؤُغْضَب ن أَربِّـي خ ثْمُوْرْث."

² ثكَّر ثفّغ-د لْمَلَائِكَا ثَمزْوَارُوْت ثْزدْجع ثِمجْمَارْث نّس خ ثْمُوْرْث فّْغنْت-يد ثْحبَّا ذ ثِعفَّانِين ثِنِّي إِي تݣّنْت ڒحْرِيق ڒقْفنْت يوْذَان نِّي إِي ذِي يدْجَا طَّبَع ن ڒْوَحْش تْسجَّاذن إِ لْأَصْنَام نّس.

³ ثكَّر لْمَلَائِكَا وِيس ثْنَاين ثْزدْجع ثِمجْمَارْث نّس ذِي ڒبْحَر، ڒبْحَر يذْوڒ ذ يذَامّن اَم يذَامّن ن ونِّي يمُّوْثن، مِين يدَّرن ذي ڒبْحَر قَاع يمُّوْث.

⁴ ثكَّر لْمَلَائِكَا وِيس ثْڒَاثَا ثْزدْجع ثِمجْمَارْث نّس خ يغزْرَان ذ ڒَعْنَاصر ن وَامَان ذوْڒن ذ يذَامّن.

⁵ سْڒِيغ إِ لْمَلَائِكَا ن وَامَان ثقَّار: "شك اَقَاش نِيشَان ذِي ڒحْكَامَاث نّش ذ شك ذ لْعَظِيم. ذ شك ذ ونِّي إِݣ يدْجَان، تُوْغَا ثدْجِيذ.

⁶ أَقَا وَامِي سِيزّْڒن يذَامّن ن ڒْمُوْمِنِين صَّالِحِين ذ لْأَنْبِيَا، ثُوْشِيذ-اَسن اَذ سْون يذَامّن ؤُڒَا ذ نِثْنِي ڒَاحقَّاش سْذَاهدْجن مَانَاينِّي."

⁷ سْڒِيغ إِ يِجّن ن صُّوْت يقَّار-د زِي ڒْمذْبَح: "وَاه آ سِيذِي أَربِّـي نّغ إِݣ يزمَّرن إِ كُڒْشِي، ڒحْكَامَاث نّش ذ ڒْحَقّ، أَقَاثنْت نِيشَان."

⁸ ثكَّر لْمَلَائِكَا وِيس اَرْبعَا ثْزدْجع ثِمجْمَارْث نّس خ ثْفُوْشْت يتْوَاسْمح-اَس إِ ثْفُوْشْت اَذ تْسشْمض يوْذَان س ثْمسِّي.

⁹ شمْضن يِوْذَان س لْحَرَارَا يجهْذن. وَاخَّا اَمنِّي قَّارن اَوَاڒن وَار يحْڒِين ذݣ يِيسم ن أَربِّـي ونِّي غَار ثدْجَا سُّلْطَا خ لْمُصِيبَاث-أَ. وَار تُوْبن شَا، وَار ث سمْغَارن شَا.

¹⁰ ثكَّر لْمَلَائِكَا وِيس خمْسَا ثْزدْجع ثِمجْمَارْث نّس خ لْعَرْش ن ڒْوَحْش ثهْوَا-د ثَادْجسْت خ لْممْلَكَا نّس. ئِوْذَان تْغࢲَّاࢲن يڒسَاون نْسن س ڒحْرِيق.

¹¹ عْلَاحْسَاب ڒحْرِيق ذ ثْحبَّا إِي ذَايْسن نِثْنِي قَّارن اَوَاڒن وَار يحْڒِين خ أَربِّـي يدْجَان ذݣ وجنَّا، وَار تُوْبن شَا زِي ڒفْعَايڒ نْسن.

¹² ثكَّر لْمَلَائِكَا وِيس ستَّا ثْزدْجع ثِمجْمَارْث نّس خ يغْزَار ن لْفُوْرَات اَمقّْرَان ؤُزْغن وَامَان إِي ذَايس، حمَا اَذ يتْوَاسّوْجذ وبْرِيذ إِ يزدْجِيذن ن شَّرْق.

¹³ ࢲْرِيغ ثْڒَاثَا ن جْنُوْن يعفَّانن ݣِّين اَم يجرْوَان: ئِجّن يتفّغ-د زݣ وقمُّوْم ن ونِّي اَم دَّيْنَاصُوْر؛ ئِجّن يتفّغ-د زݣ وقمُّوْم ن ڒْوَحْش؛ ئِجّن يتفّغ-د زݣ وقمُّوْم ن ونِّي يتَارَّان يخف نّْس ذ نَّبِي.

¹⁴ يِيْنَا ذ اَرُّوْحَاث ن شَّيَاطِين تݣّن لْمُعْجِزَاث زَعْمَا. تْرَاحن غَار يزدْجِيذن ن ثْمُوْرْث مَارَّا حمَا اَثن سْمُوْنن إِ ڒْحَرْب ذِي نْهَار نِّي اَمقّْرَان ن أَربِّـي إِݣ يزمَّرن إِ كُڒْشِي.

¹⁵ ("صنّْطث، قَا نش اَذ د اَسغ اَم د يُوْسَا يج وشفَّار. سَّعْذ ن ونِّي إِي غَا يِيڒِين عْلَابَال اَذ يحْضَا اَرُّوْض نّس حمَا وَار يݣُّوْر شَا ذ اَعرْيَان اَذ ࢲرن يِوْذَان ثُوْعَرْيَنْت نّس.")

¹⁶ سْمُوْنن-ثن غَار يِجّن ومْشَان س لْعِبْرِيَا قَّارن-اَس <هَرْمَݣِدُوْن.>

¹⁷ ثكَّر لْمَلَائِكَا وِيس سبْعَا ثْزدْجع ثِمجْمَارْث نّس ذِي لْهَوَا سْڒِيغ إِ يِجّن ن ثْمِيجَّا زِي ثمْزِيذَا ثَمقّْرَانْت إِي د يكِّيْن زِي لْعَرْش يقَّار س جّْهذ: "صَافِي، يتْوَاكمّڒ!"

¹⁸ ئِوْقع وَاسَّام ذ يغُوْيَان ذ وَاجَّاج ذ زِّنْزَال يجْهذ. عمَّارْص وَار يوْقِيع اَم زِّنْزَال-أَ يجهْذن زݣ وَامِي يدْجَا بْنَاذم خ ثْمُوْرْث.

¹⁹ ثْشقّْ ثنْدِينْت ثَمقّْرَانْت خ ثْڒَاثَا، نْهذْمنْت ثْندَّام ن ڒݣْنُوْس. وَار يتُّو شَا أَربِّـي ثَنْدِينْت ن بَابِل ثَمقّْرَانْت، فَا إِنَّمَا، يُوْشَا-ٱس اَذ تْسو زِي ڒْكَاس ن وَامَان وضِيڒ يعْنِي لْعِقَاب نّس اَمقّْرَان.

²⁰ كُڒ ثَيْزِيرْث ثنْهزّ، فْسِين يذُوْرَار.

²¹ ئِوْضَا-د يشَرَّا ذ اَمقّْرَان زݣ وجنَّا خ يِوْذَان، كُڒ اَبْقُوْق يوزّن اَزْين وقنْدَار. يِوْذَان قَّارن اَوَاڒن وَار يحْڒِين خ أَربِّـي خ سَّبَاب ن لْمُصِيبَا-يَا ن يشَرَّا ڒَاحقَّاش لْمُصِيبَا-يَا ذ ثَمقّْرَانْت اَطَّاس.