لواحي ن يوحنا 10 - ثريفيث 2020

لْمَلَاك اَك لْكِتَاب اَمزْيَان

¹ ࢲْرِيغ يجّن ن لْمَلَاك نّغْنِي يجهْذ يهْوَا-د زݣ وجنَّا، ئِنّض-اَس-د وسيْنُو. خ وزدْجِيف نّس يجّن ن ثسْڒِيث ن ونْࢲَار، أَغمْبُوْب نّس يݣَّا اَم ثْفُوْشْت، ئِضَارن نّس ݣِّين اَم يـپِــيلَارن ن ثْمسِّي.

² ئِيْسِي ذݣ وفُوْس نّس يجّن ن لْكِتَاب ذ اَمزْيَان يرْزم. ئِسرْس ضَار نّس اَفُوْسِي خ ڒبْحَر، عَاوذ ذ ضَار نّس أَࢲڒْمَاض خ ڒْبَرّ.

³ ئِسْغُوْي س جّْهذ اَخْمِي يهِيرِّيو يجّن ن سّْبَاع. وَامِي يسْغُوْي، أَرِّين-د خَاس سبْعَا ن وَاجَّاجن س صُّوْت نْسن.

⁴ وَامِي د اَرِّين سبْعَا نِّي ن وَاجَّاجن، نش خْسغ اَذ اَرِيغ مَانَاينِّي وَلَكِن سْڒِيغ إِ يِجّن ن ثْمِيجَّا زݣ وجنَّا ثنَّا-ٱيِي-د: "لَّا، مِين نَّان سبْعَا-يَا ن وَاجَّاجن اجّ-يث غَارك ذ سِّرّ، وَار ث تَارِي شَا."

⁵ زْرِيغ لْمَلَاك نِّي يبدّن خ ڒبْحَر ذ ڒْبَرّ ييْسِي فُوْس نّس اَفُوْسِي غَار وجنَّا.

⁶ ئِجُّوْدْج س ونِّي يدَّرن إِ ڒبْدَا ن ڒبْدَاث يعْنِي ونِّي إِي د يخڒْقن اَجنَّا ذ مِين ذَايس ذ ڒْبَرّ ذ ڒبْحَر ذ مِين ذَايْسن. أُوْشَا ينَّا: "صَافِي، وَار ثقِّيم بُو ڒْوقْث عَاذ كْتَار.

⁷ أَقَا ذِي نْهُوْرَاث نِّي خْمِي غَا ثْصُوْض لْمَلَائِكَا وِيس سبْعَا ذِي زَّمَّار نّس قَا صَافِي سِّرّ ن أَربِّـي يكمّڒ مَامّش ذَاسن ث يعَوذ إِ لْعِبَاد نّس لأَنْبِيَا."

⁸ ثْمِيجَّا نِّي ؤُمِي سْڒِيغ زݣ وجنَّا زِي قْبڒ ثنْدق-د عَاوذ ثسِّيوڒ-د اَكِذِي وِيس مَرّْثَاين ثنَّا-ٱيِي-د: "رُوْح، إِيْسِي لْكِتَاب نِّي يرْزْمن ذݣ وفُوْس ن لْمَلَاك إِݣ يبدّن خ ڒبْحَر ذ ڒْبَرّ."

⁹ رُوْحغ غَار لْمَلَاك نِّي نِّيغ-اَس: "ؤُش-اَيِي-د لْكِتَاب نِّي اَمزْيَان!" ينَّا-ٱيي: "أَقَاث، اشّ-يث. أَذ يِيڒِي ذݣ وعدِّيس نّش ذ اَمرْزَاݣ، وَلَكِن ذݣ وقمُّوْم نّش نتَّا ذ مِيزِيض اَم ثَامّنْت."

¹⁰ يْسِيِغ لْكِتَاب نِّي اَمزْيَان زݣ وفُوْس نّس، شِّيغ-ث. ؤُفِيغ-ث ذݣ وقمُّوْم ينُو ذ مِيزِيض اَم ثَامّنْت. وَلَكِن وَامِي ث سغْڒِيغ يذْوڒ ذ اَمرْزَاݣ ذݣ وعدِّيس ينُو.

¹¹ ڒخْدّنِّي يتْوَانَّا-ٱيِي: "أُو لَابُد اَذ تسِّيوْڒذ عَاوذ س مِين يوْحَا أَربِّـي خ وَاطَّاس ن شُّعُوْب ذ ڒݣْنُوْس ذ لُّغَاث ذ يزدْجِيذن."