مرقس 8 - ثريفيث 2020

سِيذِيثْنغ عِيْسَى يسشّ اَرْبعَاڒَاف ن يِوْذَان

¹ ذِي ڒِيَّام نِّي، مُوْنن-د خَاس عَاوذ ڒْغَاشِي اَطَّاس أُو نِثْنِي وَار غَارْسن مِين غَا شّن. ئِڒَاغَا-د عِيْسَى إِ يمحْضَارن نّس ينَّا-ٱسن:

² "نش قّْسن-اَيِي يِوْذَان-أَ. ثڒْتِيَّام زݣ وَامِي اَقَاثن اَكِذِي وَار غَارْسن شَا مِين غَا شّن.

³ مڒَا سّكّغ-ثن غَار ثُوْذْرِين نْسن وَار شِّين شَا اَتَاف اَذ سخْفن ذݣ وبْرِيذ، ذِنِّي شَا زَّايْسن ؤُسِين-د زِي ڒݣّْوَاج."

⁴ نَّان-اَس يمحْضَارن نّس: "ذِي ڒخْڒَا-يَا مَانِي غَا نَاف اَغْرُوْم إِي زِي غَا نْسشّ قَاع لْعَدَد-أَ ن يِوْذَان؟"

⁵ ينَّا-ٱسن عِيْسَى: "شْحَاڒ غَارْوم ن وغْرُوْم؟" نَّان-اَس: "غَارْنغ سبْعَا ن ثشْنِيفِين."

⁶ يُوْمَر عِيْسَى ڒْغَاشِي نِّي اَذ قِّيمن ذِي ثْمُوْرْث. ئِطّف سبْعَا نِّي ن ثشْنِيفِين يشكَّر أَربِّـي، يرْزِي-ثنْت يُوْشِي-ثنْت إِ يمحْضَارن نّس اَثنت فرْقن خ يِوْذَان نِّي. ڒخْدّنِّي فرْقن-ثنْت.

⁷ غَارْسن ذِنِّي عَاوذ ڒبْعَاض ن يسڒْمَان ذ يمزْيَانن. عِيْسَى يشكَّر أَربِّـي ينَّا-ٱسن: "فرْقم ؤُڒَا ذ يِيْنَا خ يِوْذَان-أَ."

⁸ شِّين جِّيوْنن، شطّنْت سبْعَا ن ثقْرَابِين عمَّرنْت س يڒقُّوْزن.

⁹ تُوغَا ذِنِّي شَان اَرْبعَاڒَاف ن يِوْذَان. سّنِّي يمْسَافَاض خَاسن ؤُيُوْرن.

¹⁰ ڒخْدّنِّي ينْيَا عِيْسَى ذݣ يِجّن ن ثْغَرَّابُوْت اَك يمحْضَارن نّس يرُوْح غَار جْوَايه ن دَلْمَانْيُوْثَا.

ئِوْذَان وَار تفْهِيمن شَا مِين عْنَانْت لْمُعْجِيزَاث ن سِيذِيثْنغ عِيْسَى

¹¹ ؤُسِين-د غَارس ڒْحِزب ن يفَرِّيسِيْين بْذَان تْمنْغَان اَكِذس، تَّارن زَّايس يجّن ن لْعَلَامَا ثَمقّْرَانْت زݣ وجنَّا بَاش اَث جَرّْبن.

¹² ئِحْرق وُوْڒ نّس اَطَّاس ينَّا-ٱسن: "مَايمِّي يوْذَان ن ڒْوقْث-أَ تتَّارن لْعَلَامَا ثَمقّْرَانْت؟ أَقَا تسْڒَام ڒْحَقّ: ئِوْذَان ن ڒْوقْث-أَ وَار ذَاسن تِيشّ بُو لْعَلَامَا ثَمقّْرَانْت، قَاع."

¹³ ئِجِّي-ثن عِيْسَى ينْيَا ذِي ثْغَرَّابُوْت يرُوْح غَار وجمَّاض-ين ن ڒبْحَر.

¹⁴ ئِمحْضَارن تُّوْن اَغْرُوْم وَار ث يْسِين شَا، غَارْسن غِير يجّن ن ثشْنِيفْث وَاهَا ذِي ثْغَرَّابُوْت.

¹⁵ ئِوصَّا-ثن عِيْسَى ينَّا-ٱسن: "شُوْف! حْضَام يخف نْوم زݣ ونْتُوْن ن ڒْحِزب ن يفَرِّيسِيْين ذ ونْتُوْن ن وزدْجِيذ هِيرُوْدُس."

¹⁶ بْذَان سَّاوَاڒن جَارَاسن نَّان قَا نشِّين وَار غَارْنغ ذَانِيتَا بُو وغْرُوْم.

¹⁷ ئِسّن عِيْسَى مِينْخف تُوْغَا سَّاوَاڒن ينَّا-ٱسن: "مَايمِّي ثقَّارم جَارَاوم وَار غَارْنغ بُو وغْرُوْم؟ مَا عَاذ وَار ثسِّينم؟ مَا عَاذ وَار ثفْهِيمم؟ ؤُڒَاون نْوم، مَا تْوَاقْسْحن نِغ؟

¹⁸ غَارْوم ثِيطَّاوِين، مَا وَار تْوِيڒِيم شَا نِغ؟ غَارْوم يمجُّوْنن، مَا وَار تسْڒِيم شَا نِغ؟ مَا وَار ثعْقِيڒم شَا نِغ؟

¹⁹ وَامِي رْزِيغ خمْسَا نِّي ن ثشْنِيفِين إِ خمْسَاڒَاف نِّي ن يِوْذَان، مشْحَاڒ ن ثقْرَابِين إِي ثشُّوْرم س يڒقُّوْزن يشطّن؟" نَّان-اَس: "ثنْعَاش ن ثقْرَابِين."

²⁰ ينَّا-ٱسن: "إِيوَا عَاوذ، وَامِي رْزِيغ سبْعَا نِّي ن ثشْنِيفِين إِ أَرْبعَاڒَاف نِّي ن يِوْذَان، مشْحَاڒ ن ثقْرَابِين إِي ثشُّوْرم س يڒقُّوْزن يشطّن؟" نَّان-اَس: "سبْعَا ن ثقْرَابِين."

²¹ ينَّا-ٱسن: "مَا عَاذ وَار ثفْهِيمم شَا؟"

سِيذِيثْنغ عِيْسَى يسْݣنْفَا يجّن ن وضَرْغَاڒ ذِي بَيْت صَيْدَا

²² وَامِي ؤُوْضن غَار وبِيلَاج ن بَيْت صَيْدَا، ؤُوِين-اَس-د يجّن ن وضَرْغَاڒ إِ عِيْسَى تَّارن زَّايس اَث يحَاذَا.

²³ ئِطّف اَضَرْغَاڒ نِّي س وفُوْس يسُوْفغ-يث غَار بَارَّا ن وبِيلَاج نِّي. ئِسُّوْسف-اَس خ ثِيطَّاوِين نّس يݣَّا خَاس يفَاسّن نّس ينَّا-ٱس: "مَا تْوَاڒِيذ شَان ڒْحَاجث مَا لَّا؟"

²⁴ ئِخْزَر ينَّا-ٱس: "تْوَاڒِيغ يوْذَان ݣِّين اَم ڒْشجُّوْر ݣُّوْرن-د."

²⁵ ئِݣَّا خَاس عَاوذ يفَاسّن نّس خ ثِيطَّاوِين ن وضَرْغَاڒ نِّي. صَافِي يݣنْفَا، ثِيطَّاوِين نّس نُوْزْمنْت يبْذَا يتْوَاڒَا مْلِيح.

²⁶ يسّكّ-يث غَار ثدَّارْث نّس ينَّا-ٱس: "وَار تْروَّاح شَا غَار وبِيلَاج ن بَيْت صَيْدَا."

أَرَّسُوْل بُطْرُس يشهّذ خ لْمَسِيح

²⁷ ئِرُوْح عِيْسَى نتَّا ذ يمحْضَارن نّس غَار ڒدْشُوْرَاث ن ثنْدِينْت ن قَيْصَارِيَا ن فِيلِيـپَّـاس. ݣُّوْرن خ وبْرِيذ يسّقْسَا يمحْضَارن نّس ينَّا-ٱسن: "مِين خَافِي قَّارن يِوْذَان؟"

²⁸ أَرِّين خَاس نَّان-اَس: "ئِجّن يقَّار شك ذ يَحْيَى، ئِجّن يقَّار شك ذ إِلْيَاس، ئِجّن يقَّار شك زِي لْأَنْبِيَا."

²⁹ ينَّا-ٱسن عِيْسَى: "ئِي كنِّيو، مِين ذَايِي د تَارَّام نش؟" ئِنْدق-د بُطْرُس ينَّا-ٱس: "شك ذ لْمَسِيح."

³⁰ ئِعْڒم-اَسن عِيْسَى ينَّا-ٱسن: "وَار قَّارم شَا مَانَايَا خَافِي إِ حَدّ."

سِيذِيثْنغ عِيْسَى يسَّاوَاڒ خ ڒْموْث نّس

³¹ ئِبْذَا يسڒْمَاذ-يثن ينَّا-ٱسن: "أَقَا مِّيس ن بْنَاذم يتْخصَّا-يَاس اَذ يتْوَاعدّب خ وَاطَّاس ن ثْمسْڒَايِين، أَث عِيفّن يمقّْرَانن ن أَيث-إِسْرَائِيل ذ اَرُّوْيَاس ن ڒْفُقَهَا ذ يمْسڒْمَاذن ن شَّرِيعَا. أَث نْغن، وِيس ثڒْتِيَّام اَذ د يكَّر زِي ڒْموْث."

³² ئِسِّيوڒ اَكِسن نِيشَان خ مَانَايَا. ئِسْبعّذ-يث بُطْرُس ينْهَا-ث.

³³ وَلَكِن عِيْسَى ينقْڒب غَارس يخْزَر غَار يمحْضَارن نّس، ئِنْهَا بُطْرُس ينَّا-ٱس: "أَݣّْوج خَافِي غَار ذفَّار آ شِّيطَان! شك وَار تْفكَّرذ شَا اَمشْنَاو أَربِّـي؛ لَّا، شك تْفكَّرذ اَمشْنَاو بْنَاذم."

³⁴ ئِڒَاغَا-د خ يمحْضَارن نّس ذ ڒْغَاشِي ينَّا-ٱسن: "ونِّي يخْسن اَذَايِي يذْفَار نش، لَابُد اَذ يسْمح ذݣ يِيخف نّس اَذ يكسِّي صَّلِيب نّس مِينْخف غَا يعدّب اَذَايِي يذْفَار.

³⁵ ڒَاحقَّاش ونِّي يخْسن اَذ يسنْجم ثُوْذَارْث نّس اَتَاف اَت يخْسَر. ونِّي إِي غَا يخْسَرن ثُوْذَارْث نّس خ سَّبَاب ينُو ذ سَّبَاب ن لْإِنْجِيل اَتَاف اَت يسنْجم.

³⁶ مِيزِي غَا ثنْفع بْنَاذم مڒَا يرْبح دُّنشْت قَاع، وَا يخْسَر ڒَعْمَر نّس؟

³⁷ شُوْف، بْنَاذم وَار يزمَّر اَذ يبدّڒ وَالُو ذݣ ومْشَان ن ڒَعْمَر نّس.

³⁸ ونِّي خَافِي غَا يعفَّرن نش نِغ اَذ يعفَّر خ وَاوَاڒ ينُو ذِي زْمَان-أَ اَعفَّان يخدّْعن أَربِّـي، أَتَاف اَخَاس يعفَّر مِّيس ن بْنَاذم خْمِي د غَا يَاس س لْعَظَمَا ن بَابَاس اَك لْمَلَائِكَاث يقدّْسن.