مرقس 7 - ثريفيث 2020

لْعَادَاث نِّي إِي وَار د يُوْسِين شَا زِي أَربِّـي

¹ ڒْحِزب ن يفَرِّيسِيْين ذ شَان يمْسڒْمَاذن ن شَّرِيعَا زِي لْقُدْس مُوْنن-د خ عِيْسَى.

² ࢲْرِين شَان يمحْضَارن نّس تتّن اَغْرُوْم بْڒَا مَا ٱذ سِيرْذن يفَاسّن، يعْنِي بْڒَا مَا ٱذ ݣّن ڒُوْضُو نِّي.

³ ڒَاحقَّاش يفَرِّيسِيْين ذ مَارَّا أَيث-إِسْرَائِيل مڒَا وَار سِيرْذن شَا يفَاسّن نْسن وَار تتّن شَا، مِينْزِي طّْفن اَطَّاس ذِي لْعَادَاث ن ڒجْذُوْذ نْسن.

⁴ مڒْمِي مَا د ذوّْرن زِي سُّوق، مڒَا وَار سِيرْذن شَا اَتَاف وَار تتّن شَا. أَطّاس ن ڒحْوَايج نّغْنِي إِي ذْفَّارن، ڒمْذن-ثن تطّْفن-ثن أُو صَافِي، أَمشْنَاو اَسِيرذ ن ڒْكِيسَان ذ يغَرَّافن ذ ڒقْشُوْع ن نّحَّاس ذ ثَاسُّوْث.

⁵ سّقْسَان-ث يفَرِّيسِيْين ذ شَان يمْسڒْمَاذن ن شَّرِيعَا نَّان-اَس: "مَايمِّي يمحْضَارن نّش وَار تݣّن شَا لْعَادَاث ن ڒجْذُوذ نّغ؟ مَايمِّي وَار سِيرِيذن شَا يفَاسّن نْسن قْبڒ مَا ٱذ شّن اَغْرُوْم؟"

⁶ ينَّا-ٱسن عِيْسَى: "آ لْمُنَافِقِين! قَا نَّبي إِشَعْيَا ينَّا ڒْحَقّ وَامِي خَاوم يسِّيوڒ ذݣ يِجّن ن زْمَان: <شَّعْب-أَ يتْوقَّار-اَيِي س ؤُقمُّوْم وَاهَا، مَاشَا ؤُڒ نّس يݣّْوج خَافِي.

⁷ ئِوْذَان-أَ عبّْذن-اَيِي ذِي ڒْخَاوِي، ڒَاحقَّاش سڒْمَاذن ثِمسْڒَايِين ئِدْجَان ذ ڒُوْصِيَاث ن بْنَاذم وَاهَا.>

⁸ كنِّيو ثجِّيم ڒُوْصِيّث ن أَربِّـي، ثطّْفم ذِي لْعَادَاث ن يِوْذَان أُو صَافِي."

⁹ ينَّا-ٱسن عَاوذ: "إِيوَا! تْبطَّاڒم ڒُوْصِيّث ن أَربِّـي حمَا اَذ قِّيمنْت لْعَادَاث نْوم!

¹⁰ مُوْسَى، مِين ينَّا؟ ينَّا: وقَّر بَابَاش ذ يمَّاش. أَقَا ونِّي غَا يُوْكَّارن بَابَاس نِغ ذ يمَّاس، أَتَاف يتْخصَّا-يَاس اَذ يمّث.

^11-12 وَلَكِن كنِّيو ثقَّارم بلِّي وَار يدْجِي بُو لَابُد إِ يِوْذَان اَذ وقَّرن نِغ اَذ عَاوْنن لْوَالِدِين. تْمنْيَاث نِّي إِي غَا ؤُشن إِ لْوَالِدِين نْسن اَثنْت ؤُشن إِ ثمْزِيذَا.

¹³ أَمُّو كنِّيو ثْبدّْڒم ڒْمَعْنَا ن وَاوَاڒ ن أَربِّـي حمَا اَذ تݣّم مَامّش ذَاوم يعْجب ڒْحَاڒ س لْعَادَاث نْوم إي ثْڒمْذم. تݣّم اَطَّاس ن ثْمسْڒَايِين اَمشْنَاو ثِيْنَا."

¹⁴ ئِڒَاغَا-د عِيْسَى عَاوذ خ ڒْغَاشِي-يَا ينَّا-ٱسن: "صنّْطث غَارِي مَارَّا إِذْوم، فهْمث:

¹⁵ مَا ذِنِّي شَا ن ثْمسْڒَايْث يتَاذْفن ذِي بْنَاذم زِي بَارَّا تْحَرَّام-يث؟ لَّا، وَالُو. أَقَا مِين د يتفّْغن زِي بْنَاذم اَقَا ذ مَانَاينِّي إِي ث يتْحَرَّامن.

¹⁶ {صنّط مْلِيح آ ونِّي يتْسْڒَان!}"

¹⁷ وَامِي يجَّا ڒْغَاشِي، يُوْذف غَار ثدَّارْث. سّقْسَان-ث يمحْضَارن خ ڒْمَعْنَا-يَا مِين تخْس اَذ تِينِي.

¹⁸ ينَّا-ٱسن: "ؤُڒَا ذ كنِّيو عَاذ وَار ثفْهِيمم شَا؟ مَا وَار ثسِّينم بلِّي مَارَّا مِين يتَاذْفن ذِي بْنَاذم زِي بَارَّا وَار ث يتْحَرِّيم شَا؟

¹⁹ مِينْزِي وَار يتِّيذف شَا غَار وُوْڒ نّس. لَّا، يتْرَاح غَار وعدِّيس يتفّغ زِي دَّات." (س مَانَايَا عِيْسَى يَارَّا مَارَّا لْمَكْلَا حَلَال.)

²⁰ ينَّا-ٱسن: "وَلَكِن مِين د يتفّْغن زݣ وقمُّوْم ن بْنَاذم ذ مَانَايَا يتْحَرَّامن بْنَاذم.

²¹ مَايمِّي؟ ڒَاحقَّاش زِي ذَاخڒ يعْنِي زݣ وُوْڒ ن بْنَاذم إِي زِي د تكَّانْت لْأَفْكَار ثِعفَّانِين ذ لْفَسَاد ذ ثُوْكَّارْذَا ذ ثْمنْغِيوْث

²² ذ زّْنَا ذ طّْمَع ذ شَّرّْ ذ ڒْبَاطڒ ذ يخَرْوِيضن ذ ڒقْبَاحث ذ ثِيطَّاوِين ن يِوْذَان ذ تَّكبُّر ذ ثِبُوْهْڒِيَا.

²³ مَارَّا ثِمسْڒَايِين-أَ ثِعفَّانِين تفّْغنْت-يد زِي ذَاخڒ ن بْنَاذم تْحَرَّامنْت بْنَاذم."

لْإِيمَان ن ثمْغَارْث ن اَيْث-كَنْعَان

²⁴ ئِكَّر عِيْسَى يُوْيُوْر سّنِّي يرُوْح غَار جْوَايه ن ثنْدِينْت ن صُوْر يُوْذف ذݣ يِجّن ن ثدَّارْث. يرزُّو وَار يتسّن حَدّ بلِّي اَقَاث ذِنِّي وَلَكِن يوْذَان اَرِّين-د ڒخْبَار.

²⁵ ذِنِّي يجّن ن ثمْغَارث يدْجِيس ذَايس جّنّ ذ اَعفَّان. وَامِي د ثَارَّا ڒخْبَار ذغْيَا ثُوْسَا-د غَار عِيْسَى ثوْضَا-يَاس غَار يضَارن نّس.

²⁶ ثَمْغَارْث نِّي ذ ثَيُوْنَانِيث، لْأَصل نّس زِي سُوْرْيَا فِنِيقْيَا. ثتَّار زَّايس اَطَّاس حمَا اَذ يسُوْفغ جّنّ نِّي اَعفَّان زݣ يدْجِيس.

²⁷ ينَّا-ٱس عِيْسَى: "اجّ بَعْدَا يحنْجِيرن اَذ جَّاوْنن. مَاشِي مَعْقُوْل اَذ يتْوَاكّس وغْرُوْم ن يحنْجِيرن اَذ يمنْضَار إِ يقْزِينن."

²⁸ ثَارَّا خَاس ثمْغَارْث نِّي ثنَّا-ٱس: "غَارك ڒْحَقّ آ سِيذِي، وَلَكِن ؤُڒَا ذ يقْزِينن نِّي يدْجَان سْوَادَّاي ن طَبْڒَا تتّن يفتْوِيتّن ن وغْرُوْم إِݣ يتْوطَّان زݣ يحنْجِيرن."

²⁹ ينَّا-ٱس عِيْسَى: "عْلَاحْسَاب اَوَاڒ-أَ إِي ثنِّيذ شم، رُوْح اَقَا جّنّ نِّي يفّغ زݣ يدْجِيم."

³⁰ وَامِي ثذْوڒ غَار ثدَّارْث نّس، ثُوْفَا يدْجِيس ثࢲّڒ ذِي ثَاسُّوْث نّس يفّغ زَّايس جّنّ نِّي.

سِيذِيثْنغ عِيْسَى يسْݣنْفَا يجّن ن وذهْشُوْر

³¹ يفّغ عِيْسَى عَاوذ زي جْوَايه نِّي ن صُوْر يكَّا خ ثْمُوْرْث ن صَيْدَا، ئِرُوْح غَار ڒبْحَر ن لْجَلِيل ذ لْإِقْلِيم نِّي ؤُمِي قَّارن دِيكَاپْـلِس.

³² ؤُوِين-اَس-د يجّن ن وذهْشُوْر ذ اَزيْنُوْن، تَّارن إِ عِيْسَى اَخَاس يسرْس فُوْس نّس.

³³ ئِسْبعّذ-يث عِيْسَى خ ڒْغَاشِي غَار يجّن ن جِّهث نّغْنِي، ئِݣَّا يضُوْضَان نّس ذݣ يمجُّوْنن ن ورْيَاز نّي. يسُّوْسف عِيْسَى، ئِحَاذَا-يَاس يڒس نّس.

³⁴ ئِيْسِي ثِيطَّاوِين نّس غَار وجنَّا يسُّوْحرث ينَّا: "إِفَاتَح!" (أَوَاڒ-أَ يخس اَذ يِينِي تْوَارْزْمن.)

³⁵ ڒخْدّنِّي إِي ݣنْفَان يمجُّوْنن نّس يضْڒق يڒس نّس، ئِبْذَا يسَّاوَاڒ نِيشَان.

³⁶ ئِوصَّا-ثن ينَّا-ٱسن وَار تْعَاوَاذم مَانَايَا إِ حَدّ. وَلَكِن نِثْنِي مشْحَاڒ مَا يوصَّا-ثن تْخبَّرن خَاس اَطَّاس.

³⁷ تْعجّْبن اَطَّاس نَّان: مَارَّا مِين يتݣّ ذ اَصبْحَان. ئِتَارَّا حتَّا ذ يذهْشُوْرن تسْڒَان، حتَّا ذ يزيْنُوْنن سَّاوَاڒن."