مرقس 16 - ثريفيث 2020

سِيذِيثْنغ عِيْسَى يكَّر-د زِي ڒْموْث

¹ وَامِي يعْذُو نْهَار ن سّبْث ن لْعِبَادَا، مَرْيَم ثَمَݣْدَالِيث، ذ سَالُوْمِي، ذ مَرْيَم يمَّاس ن يَعْقُوب رُوْحنْت سْغِينْت لْعِطَر ؤُوِينْت-ث-يد اَذَاس ذهْننْت.

² نْهَار اَمزْوَارُو ن سِّيمَانَا زِيش اَك ڒفْجَر رُوْحنْت غَار ونْضڒ نّس.

³ سَّاوَاڒنْت جَارَاسنْت اَك وبْرِيذ قَّارنْت: "وِي ذَانغ غَا يكّْسن اَزْرُو خ وقمُّوْم ن ونْدڒ اَث يسقْنُوْنِّي؟"

⁴ وَامِي خْزَرنْت، ؤُفِينْت اَزْرُو نِّي يتْوَاكّس أُو نتَّا ذ اَمقّْرَان اَطَّاس.

⁵ ؤُذْفنْت غَار يِيفْرِي ن ونْضڒ نِّي ؤُفِينْت يج وحنْجِير يقِّيم خ جِّهث ثَفُوْسِيث، يݣَّا اَرُّوْض ذ اَشمْڒَار أُو قِّيمنْت ذهْشنْت اَطَّاس.

⁶ ينَّا-ٱسنْت: "وَار ذهّْشنْت شَا! كنِّينْت ثْرزُّونْت خ عِيْسَى نَاصِرِي يتْوَاصلّْبن. نتَّا وَار ذَا يدْجِي شَا، ئِكَّر-د زِي ڒْموْث. هَاقَا اَمْشَان نّس مَاني تُوْغَا ث سرْسن.

⁷ رُوْحنْت كنِّينْت ڒخُّو غَار يمحْضَارن نّس ذ بُطْرُس إِنِينْت-اَسن اَقَا عِيْسَى يرُوْح اَذَاوم يزْوَار غَار ثْمُوْرْث ن لْجَلِيل اَكنِّيو يرَجَا ذِنِّي. أَث تَافم اَمشْنَاو مَامّش غَارْوم د يوصَّا زِي قْبڒ."

⁸ ثِمْغَارِين نِّي ترْجِيجِينْت ذهّْشنْت، كَّرنْت رُوْحنْت ذغْيَا زݣ ونْضڒ نِّي اَروْڒنْت. وَار عَاوْذنْت مَانَاينِّي إِ حَدّ مِينْزِي نِثنْتِي ݣّْوْذنْت.

سِيذِيثْنغ عِيْسَى يتْوَارْفع غَار وجنَّا

⁹ {عِيْسَى وَامِي د يكَّر زِي ڒْموْث زِيش نْهَار اَمزْوَارُو ن سِّيمَانَا يمظْهَار-د ذ اَمزْوَارُو إِ مَرْيَم ثَمَݣْدَالِيث ثنِّي إِي زِي تُوْغَا يسُوْفغ سبْعَا ن جْنُوْن.

¹⁰ ثْرُوْح نتَّاث اَذ تْسِيْوض ڒخْبَار-أَ إِ يِنِّي تُوْغَا يدْجَان اَك عِيْسَى، ثُوْفِي-ثن حزْنن تْرُوْن.

¹¹ وَامِي ذَاسن ثْعَاوذ ثنَّا-ٱسن قَا ࢲْرِيغْ-ث يدَّر، وَار ت ؤُمِينن شَا.

¹² منْبَعْد إِ مَانَايَا يمظْهَار-اَسن-د عِيْسَى س يِجّن ن صِّفْث نّغْنِي إِ ثْنَاين إِذْسن وَامِي تُوْغَا ݣُّوْرن غَار ڒْكَامْپُو.

¹³ ذوْڒن-د اَذ عَاوْذن ڒخْبَار-أَ إِ أَيثْمَاثْسن، وَار ثن ؤُمِيْنن شَا.

¹⁴ منْبَعْد وَامِي قِّيْمن تتّن حِطَاش ن اَرُّسُل نّس، ئِمظْهَار-اَسن-د ينْهَا-ثن مِينْزي لإِيمَان نْسن ذ وقْلِيل ؤُڒَاون نْسن قسْحن. تُوْغَا نِثْنِي عَاوذ وَار ؤُمِيْنن شَا يِنِّي إِي ث يࢲْرِين وَامِي د يكَّر زِي ڒْموْث.

¹⁵ ينَّا-ٱسن: "رُوْحم غَار مَارَّا دُّنشْت، بشَّرم مَارَّا ڒݣْنُوْس س لْإِنْجِيل.

¹⁶ ونِّي يُوْمْنن اَذ يتْوَاطهَّار س وَامَان اَتَاف اَذ ينْجم. ونِّي وَار يُوْمِيْنن شَا اَتَاف اَذ يتْوَاحْكم.

¹⁷ ذ ثِيْنَا ذ لْعَلَامَاث إِي د غَا يمظْهَارن اَك يِنِّي يتَامْنن: أَقَّا نِثْنِي اَذ سُوْفْغن جْنُوْن عْلَاحْسَاب يسم ينُو، أَذ سِّيوْڒن س يِيڒسَاون ذ جْذِيذ.

¹⁸ أَذ يْسِين يفِيْغرَان س يفَاسّن نْسن. مڒَا سْوِين مِين ينقّن، أَتَاف وَار ثن يضَرِّي شَا. أَذ سرْسن يفَاسّن نْسن خ يمهْڒَاش اَذ ݣنْفَان."

¹⁹ ئِسِّيوڒ اَكِذْسن سِيذِيثْنغ عِيْسَى سّنِّي يتْوَارْفع غَار وجنَّا يقِّيم خ وفُوْسِي ن أَربِّـي.

²⁰ نِثْنِي فّْغن بشَّرن يوْذَان ذِي مْكُڒ اَمْشَان. سِيذِيثْنغ اَقَاث اَكِذْسن، ئِسْمظْهَار-د ڒْحَقّ ن يِنِّي يتْبشَّارن س وَاطَّاس ن لْعَلَامَاث إِي ثن يذفَّارن.}